Jone 8:44 - Verikariano Vou Na Baki

⁴⁴ Kamiu, karamemiu Sim̃aro, a kamiu tiniemiu jii ka m̃a kuvila tena bova tibe ka ga napano naio jidomio. Jikar nua ea tikariano binimei, naio be toro nam̃a muebin toro m̃aro a naio maka tinien tii ilirianiano, naio maka tumolu tua tivelinio ka naio leleio. Bajago na memedu na kiano, naio mil dam̃ariga ea burum̃ara kenieno sibiano nei, bior naio be burupati na sibiano nalo nonovio, naio be teta na bajago na sibiano.

Jone 8:44 ပူးပေါင်းရင်းမြစ်များ

Mataiu 12:34

Mia ea meuliano na toro kiano jibe na bunu, napano kiano iviso jibe kanio burupati tai, a iliano nalo napano amolmoluo ea kiano meuliano ajibe ka m̃arati nalo napano amolmoluo ea burupati nei. ?Mia kiniou nemial kenemiu burupati nalo amenunu ruei, mia tum̃abe ana m̃arati na bo tai mijikia rimoluo ea kenemiu iliano nalo? !Kamiu kube bajulukuti na maro nalo ga!

Mataiu 13:15

bior kamiu kumitibe ka tomu nalo napano kialo jidomiano nalo am̃arm̃aro, jibe ka napano ajinioko tilinielo nalo, a ajetavoko miralo nalo ruei. Verenio nalo ala re tibe na, p̃eli mia miralo rivitii dulu vite, p̃elina tilinielo rijoglubarbar vite, a p̃eli kialo jidomiano rijoglubarbar vite, ana tibe na ana amijikia aviliglo amei ka kiniou ka mia kiniou noim̃au ka vatitiglo.’ Aisaia 6:9,10

Mataiu 13:38

Mia kanano tiniavio nene, naio be yetemeriba nei. A kurukuti na bo nalo nei, nalo abe tomu nalo napano aju jouro ea navenatuboiano na Atua kanano. Mia soro va nalo nei nalo abe Sim̃aro kanano tomu nalo.

Jone 6:70

Ana Yesu berdop̃e, naio berinavo “Nao, kiniou nebijauia bulag kamiu duelimo ba juo [12] na be kanaku, ka kamiu kumonea kiniou tibe na, mia iviso bure kamiu, kamiu tai naio be sim̃aro memedu.”

Jone 7:17

Ver toro tai saaro ka rila ga Teta kiano jidomiano, mia naio rila toro nene mijikia rivitii vatitig kanaku verloglogiano nalo. Mia toro nene naio mijikia rivitilubar ka kiniou maka noto neverloglog tomu nalo selia ga siaku, mia mijikia rivitilubar ka verloglogiano nalo nei, be riano laka ka amaluvo ea Atua.

Jone 8:38

Bo ka kamiu kumonea kiaku iliano nalo, bior kiniou nojom̃a neberial ga venia napano kiniou nemial bogo napano nojo bija Teta, mia kamiu kumitum̃a kumila ga venia nam̃a kumijog karamemiu naio berenio.”

Jone 8:41

Makanio, kiniou nemial jibe ka maka naina, mia be karamemiu dolu tai napano naio jo, kamiu kumim̃au kiano.” Mia nalo aberinavo “!Jerei, venia na! !Kojidom kala kumemi nuve tete na m̃arabo nalo, kumemi maka nuvijikia karamememi! Karamememi takurano riano ga naio jo, naina be Atua.”

Jone 8:55

Naio, kamiu maka kuvijikiaio, mia kiniou nemijikia batitig naio. Kiniou maka nala sibi tibe ka kamiu, neber vatitigio ga na, ka kiniou nemijikia batitig naio bo, a kiano iliano nonovio, nemije batitig bo monea kiaku meuliano.

Im̃auano 13:10

ana berkanio, berinavo “!Jau kobe Sim̃aro kenerinio memedu! Vite nonovio napano bo, mia jau maka kosidom leleio, ana jau kobujo ka sibiano a bajago va nalo ga. Atua kiano iliano nalo, jau kojom̃a kobilivilig lelario julaka ka rimei rive sibiano bereio.

Im̃auano 24:9

Ana bogo napano naio jom̃a milili jibe na, ana kulo Ju dolu nalo ajum̃a ap̃iliṽilig pariparilo, aju aberverenio aberinavo “Nina naruei, jibe na naruei, be riano ga na.”

Im̃auano 5:3

Naruei Pitere berkanio, berinavo “?Ananaias, jum̃abe ana jau komijamo ka Sim̃aro binimei mila lelan kiamo iviso jibe na, ana jau komila sibilili Niununo Lu, ka napano jau kobokar bokanio puruveru na borotano nei togio nene?

2 Korin 11:3

Mia kiniou bunu nomerou kija ver toro dolu rimei rivuru kenemiu jidomiano riva ve dolu bereio. Jibe nua na, maro nei binimei mila sibilili tira nei Iv, mila vonvon vatitig naio mila mijoru ea kariano, naruei maka nosidom leleio ka bogo tai kamiu kuve riano re bunu ea Kristo, tiniemiu tii vatitig re bunu naio ga ve takurano.

1 Pitere 5:8

Kiniou nojidom nover bunu iliano tai ka rilabon kamiu, ka monoka kuvitikar vatitig kamiu, monoka kuvitilubar m̃arabo kija. Kiado uolu nei Sim̃aro, naio jom̃a jeliviv ea kito dam̃ariga, naio javukia burum̃ara temeul deden tai napano jijer naio toru kar namoneano nalo ka tumolu ser niadualo.

2 Pitere 2:4

Bo ka kito rovitilubar Atua kiano bajago na tibure tomu a na milarur toro ea meuliano na nanua beamu. Moti, kuvilavon ka kuvisidomial Atua kiano nailiano nalo na beamu, napano tealo ajumolu amilavon ka atu loa naio. Naio maka riverenio maka ve titai, mia naio jumolu buk bulaglo vaarakurano abatove ea bulu joomo nalo na melijokouo ea sebi na lakoiano, ka atua vio na riva rivokar burum̃ara legiano na tibureiano na maariano.

1 Jone 1:8

Toro na m̃a jo mila bonua, ka ber maka ve na bova tai toa kiano meuliano, kiano iliano nei naio maka rive riano leleio, naio jom̃a mila sibilili naio bereio.

1 Jone 2:21

Kamiu kuver re ka kiniou nojidom neil van kamiu rivior jidomiano tai na berinavo kamiu maka kuvijikia vite, bior naio maka tibe na. Kiniou nomial ka kamiu kumijikia kuvitii veve masosoua ilirianiano a iliano na be sibiano mugaruei, kumijikia batitig ruei ka ilisibiano maka rijikia riyotuba ea ilirianiano, naruei kiniou nojidom neil van kamiu ka notunukakar kamiu ga.

1 Jone 2:4

Nina bior ver toro tai naio riverenio river naio mijikia batitig Atua, a naio be kanano, mia naio maka tom̃a rila vite nalo na m̃a Atua kanano tuboiano nalo aberenio, toro na naio maka to river riano na, naio mila sibi ga na.

1 Jone 3:12

Kuvisidomii Sim̃aro kanano toro na nanua beamu na, Ken, na naio maka tinien tii batitig kuruano kar garuei Epel, naio muebinio m̃aro. Maka rivu ka kito rala tibe na, mia bo ka rosidomii ka venia na naio mila jibe na? Nina bior kanano im̃auano nalo, Atua mialio abova ga, mia kuruano kanano, nalo amemedu bo, mia Atua naio jaaro kanio, tenene na mila na Ken mijoku m̃ele ka kuruano nei Epel, naio tinien jerio, ana naio muebinio m̃aro.

1 Jone 3:15

Toro na m̃a jerm̃i ka kiano m̃aratavo tai, naio jibe ka toro na muebin toro m̃aro ruei, a jibe ka na romijikia ruei, ka toro na m̃a muemue toro, meuliano na maka ve jukuti nene naio maka toa naio leleio.

M̃esi Napano JUT Bivitauiaio 1:6

Ana juo nene, naio be nailiano nalo na m̃a ajua vio mave beamu. Atua midulo ajua vio novo tai na naio loa laka ruei, mia nalo maka asidom, ajidom ka atua jeleigio bereio, ana mila na naio miorkakarlo ka m̃arimieni nalo napano maka ajikia ataluvo denlo bogo tai. Naio mila batitig jelelo dolu tai ea burumelijo, naio buk bulaglo aba ajuaio banbano bokar bogo na burum̃ara vironiano na legiano na maaro.

Navisip̃eiano 12:9

Mo burum̃ara kenieno niobi nei, abukulario den vio mave vaarakurano, naio batove ea yetemeriba, naio bija kanano nailiano nalo nei. Naruei ea bogo na mia kiniou nebitilubar ka burum̃ara kenieno niobi nene naina ga napano beamu nuanua laka naio midu maro mirano, naio be toro na m̃a napano abio ka Sim̃aro, p̃eli Setano, napano vonganei ea kiado bogo, naio kia ga navo, naio jom̃a buru yetemeriba reraio ba milaluvu m̃arabo julaka.

Navisip̃eiano 13:14

Naruei ea kijokijo nalo nei napano naio jo mila ea siano temeul na be moti, naio jom̃a mila sibilili tomu nalo na yetemeriba, naio burulo aba amiavovu laka. Naio berial kalo berinavo ate tavo-ru na temeul na be moti, napano iobogu na mira jeio mia naio meul bereio jo.

Navisip̃eiano 2:10

“ ‘ “Mia be riano, p̃eli mia vesiou re kamiu tealo monoka avar burum̃ara jogvaiano nalo rivior napano kumonea kiniou, mia kumerou re. P̃eli Sim̃aro naio mijikia rila ka mia avuku kam tealo avan ea nalakoiano, ka naio to rila vonvon kamiu, mia nemijikia never ka mia naio rijikia rila lelan kamiu ea jogvaiano nalo riva rivokar legiano ve duelimo ga. Ver tibe na, monoka kuvitu sikili riva rivokar bogo na mia adular kenemiu jegi, mia ver kuvijoru re ea bogo na, mia bogo na koviyotuba kean kiniou, mia nesian burum̃ara ijaiano van kamiu, nina be batubatu niogo na meuliano.

Navisip̃eiano 21:8

Mia tomu na vovaiano nalo, nalo bunu mia avokar kialo jajum̃ano tai. Nina be tomu nalo na m̃a maka atu sikili ea kiniou, napano maka amonea, napano kialo bajago naio kirivova laka, amuebinvin tomu, abijuku bova ka tira p̃eli sum̃ano, abar semei, amilotu ka tavoru, a abe tomu na sibiano. Nalo nei naruei mia ava avokar m̃ariano juo nene, nina ea kialo vio nene rimemedu ea bulukusebi napano bonoti kirivova, a naio maka rijikia ribisi.”

Navisip̃eiano 22:15

Mia kulo dolu nalo miroano maka ajikia amei jouro. Nina nalo napano ajum̃a amiel janea ga vio jibe ka kuli nalo, bija nalo napano m̃a abar semei, nalo napano m̃a amila siakiano a siakaiano, nalo napano m̃a amuebinvin kulorinio, nalo napano m̃a amilotu ka tavoru nalo, a nalo napano m̃a tinielo jii ka ala bajago na sibiano.

Navisip̃eiano 9:11

Nalo abe kanalo parinio tubo tai, naina be nailiano tai, mia maka ve Atua kanano nailiano, mia be nailiano napano naio bitikar m̃aratavo na bulukusebi. Toro nene siano jel ea Ipru, abio ka Abatono, a ea Krik, abio ka Apolion, napano sio juo nei nioti nene be toro na mila bulag saba.