Jone 4:36 - Verikariano Vou Na Baki

^36-37 Mia nalo nam̃a ava avario, mia nalo asaaro ve toru laka bior kanalo vuliano telisu naio jo ruei, ana bogo na avar sinaniano nene rimei vonuo na meuliano na maka ve togio nene, toro na toru na mebija, mia naio bunu saaro ve toru. Naio jibe ka ga iliano napano ber jibe nei, berinavo ‘Toro tai naio ba mebijo, mia toro dolu naio ba bario, mia burum̃ara saariano be tena nalo nonovio.’

Jone 4:36 ပူးပေါင်းရင်းမြစ်များ

Mataiu 19:29

Mia toro na verenio tuvan kunuano, p̃eli kuruano p̃elina kuvivinieno, p̃elina karam̃ano p̃elina kenieno, p̃elina kenerinio, p̃elina kiano borotano, mia verenio naio tuvan vite nalo nei rivior kiniou ga, mia naio mijikia rivar meran bereio ea yetemeriba nei, vite nalo napano juvanlo ruei, riva rivokar ve va duelimo toromomou, mia mave ka mia naio rijev meuliano na jo jobo jo.

Jone 3:36

“Tibe na, kito napano romonea naio, robokar ruei meuliano nei napano naio to tobo to. Mia toro napano maka m̃a rimonmonea naio, mia naio rijikia re rial meuliano nei bogo tai, mia Atua kanano tiniemimiano ve toru toa naio.”

Jone 4:14

Mia toro na naio rimunu uei nei napano nemijikia nesianio vanio, karina mia naio maka rijikia midouser naio bereio. Mia uei napano naio rimunuio, mia rimei tibe ka burupati uei bereio joomo ea kiano iviso, ve uei na meuliano napano maka ve togio eaio, naio jom̃a mieraro den naio dam̃ariga, maka rijikia tabo bogo tai.”

Jone 5:24

Ana Yesu mil lie vo, naio berinavo “Kamiu kuviagago vatitigio. Toro kei nam̃a monmonea kanaku iliano, a naio monea nana naio miila kiniou nabatove, ea bogo nei memedu mia naio rivokar meuliano. Naio maka totano yetano ka tibureiano tai leleio, bior naio jumolu den bajago na m̃ariano, ba bokar kiano meuliano vou ruei.

Romo 1:13

Banalo, nojidom kamiu kuvijikia ka va telabo ruei kiniou nemila vio jikili ka neviedu kean kamiu, mia dam̃ariga m̃arabo bisaro ea vite tealo, mila na maka neviedu vo. Mia nojidom toru ka neviedu, ka kanaku im̃auano mijikia rivar m̃arati tai bunu ea kamiu napano kumonea ruei, jibe na napano bar ruei ea nalo napano maka ave Ju ea vio dolu nalo.

Romo 2:7

Jibe na, tomu tealo, nalo ajurmaro ga, nalo aju ajudu bogo nonovio ka amila bajago na bo napano mijikia rila sialo rivu ea Atua mirano, a mijikia rilalo avokar mermerano na vio mave. Venia na mia Atua sian vanlo, naio be meuliano napano maka rijikia ribisi.

Romo 6:22

Mia vonganei, Atua naio midular kamiu den bajago na sidomiano na laiano na kariano neibano, kubinimei jibe naio kiano tomu na im̃auano nalo, mila napano bo laka ea kenemiu meuliano napano kubinimei kube lu bo ruei, a vonganei kuvitua m̃arabo na meuliano na maka rijikia ribisi.

Romo 6:23

Vuluiano napano kariano rila ka toro rijevio, naio be m̃ariano napano maka rijikia ribisi, mia kiado Tubo Yesu Kristo mila napano robokar meuliano na maka rijikia ribisi, napano maka rovulio, a naio be jidomiano tai napano Atua jianio ban kito jibe na ga.

1 Korin 9:17

Maka noto nala im̃auano na rivior kiaku jidomiano tai ga, maka kiniou ga neber bo ka nala ka Atua saaro ka kinion, p̃eli naio rijikia sian jidomiano van kiniou riviorio. Maka tibe na, mia Atua ga naio berialio, midu joa jum̃aku, mia monoka nomonea, monoka nala tibe na ga.

1 Korin 9:18

A jibe na, neber p̃eli mia kiniou nodu re jidomiano tai riviorio, mia nina bo ga, bior ka Atua jo mila todolu tai napano jibe vuluiano novo tai ban kiniou ruei. Vite na, naio be burum̃ara jogvuiano na nabar bogo napano nojo nomioliolu ka Ioluano Vou ban ea tomu nalo, napano nomila kurano ga jibe na banlo. P̃eli nemijikia never bo ka ajian vite ban kiniou bior, p̃eli avitikar vatitig kiniou bogo napano nojo nomilaio, mia maka nosidom nina, nojidom napano amijikia avokario tibe na ga, maka ve titai leleio napano tukovio kalo.

1Tesa 2:19

Ana ka venia numisidom laka ka nuvial bereio kamiu? Nina ka kei bereio numijikia nuvar tiniememi ealo? Kei bereio na mijikia rila kumemi nuvisaaro? Kei bereio nalo abe m̃arati na bo na kenememi im̃auano, napano nuvijog rivu kanio ea bogo na kiado Tubo Yesu riyotuba bereio? Maka toro dolu tai, mia kamiu na ga!

1 Timoti 4:16

Monoka kovitikar vatitigso rivu, a jau bunu monoka katakii batitig verloglogiano nalo nam̃a kojo kejian ban tomu dolu nalo. Ver jau kovokar rivu, mia kala napano jau kamliko nalo napano ajum̃a amiagago ka jau, kam nonovio kuvijikia kuvokar ioruriano.