Jone 20:1 - Verikariano Vou Na Baki

¹ Amidu Yesu mokotenano mon joomo ea buluvae nene, joa bano-o bokar legiano moti na sude dolu. A be tire nalo tealo kalo, jibe ka Mere na vio Maktala nalo, ajumolu kavijova niogoravo amiel ea vio bobogio abinimei ea buluvae. Mia bogo napano abinimei vaataro, amiilo va ka napano burum̃ara puruveru maka bunu toko buluniono buluvae, amelivilivilar kanio ruei jo mon tivelinio ka ga.

Jone 20:1 ပူးပေါင်းရင်းမြစ်များ

Yesu Kristo Kiano Ioluano Vou Napano MAK Bivitauiaio 16:9

Ana Yesu naio meul bereio jibe nei ea kavijo vio buru vurevure ka Sade nei ruei, napano naio be legiano moti na bogoti aluo. Naruei naio jo malmaluvo keanlo napano ajakisor naio, mia nana miyotuba kean beamu be Mere re Maktala, nina napano naio mijil bulag sim̃aro nalo aluo eaio nua ruei.

Mataiu 27:60

ana naio midu ba joa m̃ano buluvae vou, napano aje batitigio vonga. Ana amilivlivi ka puruveru na toru nene binimei, ajubonkokar buluvae nei m̃aratavo nene, ana Yoseve nalo aban bereio.

Yesu Kristo Kiano Ioluano Vou Napano MAK Bivitauiaio 15:46

Mia Yoseve naio je m̃ano buluvae tai be terivou ga maka vesiou vo, karina naio ba bulu kulum̃arauo vou tai, naio ba amidular Yesu mokotenano batove ea m̃akolkolo, ana amijuvuliko ka kulum̃arauo neibano, ana nalo amidu abano mon ea m̃ano buluvae napano. Ana amelivlivi ka puruveru na toru nene binimei, ajubonkokar m̃aratavo nene, ana aban bereio.

Jone 20:26

Tomas berial kanano jidomiano nei, mia sude takurano barlaka bano, na kumemi numitu vio takurano bereio ea vio nei nua. Ea bogo nene Tomas bunu jo kumemliko, a m̃aratavo nalo ajetavo batitigio bo aju, mia Yesu miyotuba ka kumemi vaarakurano bereio, berinavo “!Tum̃aroano to vija kamiu!”

Jone 19:25

Nalo ajelan Yesu mave ea kiano m̃akolkolo jibe na, a ea nalo napano m̃a ajikili aju vaataro ajum̃a abitio, be tira veri. Nalo nei be Yesu kenieno, a kenieno dolu na teliki, a Mere napano koano Klopas, a Mere na vio Maktala.

Navisip̃eiano 1:10

Naruei ea Legiano Lu tai nojo jibe na ana nomijog jibe Niununo binimei ea kiniou, nomijog jooa tai ju iorou ka kiniou, mil burutomoluo jibe ka pasimeduo miolu, mil ber jibe nei, berinavo:

Mataiu 27:64

Tenene na, kumemi numisidom nuvika denso, ka jau keiila kanamo kulo na mira nalo tai avan ka atukuku ka buluvae na riva ribisi ea legiano tolu nene. Tibe m̃a na mia kiano naiagagoano nalo amei avinalar ka mokotenano, ana mia nalo ala sibi, averial ka tomu nalo averenio ‘Naio meul bereio ea nam̃ariano.’ Verenio tibe na, mia kiano sibiano na iorou nene mia naio rivova laka, tovulu nana jukamu.”

1 Korin 16:2

Nojidom never tibe nei, ka kuvitu re ga tibe na kario kuvisuvan veru bogo napano noyotuba kean kamiu, mia nojidom ka tikar vonganei, ea bogoti moti na sude nonovio, kamiu veve terakurano monoka kuvar torogio ve telisu na venia napano kumijevio, a monoka kuvar vatitigio tu.

Im̃auano 20:7

Ana ea Legiano Lu, bogo napano m̃erenio batove bisi, jibe ka napano legiano na be moti na bogoti aluo jikario naruei, kumemi nubior kumemi liko namoneano nalo na vio na, nubolkouo a nubure kokorovio joko lu. Naruei Pol naio jidomii ka ber mia nuvituvan kavijova kia ga vo, mia bior ninei be vioriano na maariano kumemi liko, be iliano telabo, mila Pol bunu mil vio tebievi, ba bokar bogiano viovare vaarakurano.

Mataiu 27:56

Ana iviso ka tire nalo nei, tolu nene tai be Mere tira re Maktala, a Mere napano Yemesi naio Yoseve kenielo, a tira napano Sepeti kouano.

Mataiu 27:66

Ana nalo aba amila vatitigio puruveru nei a abijuru ka bijuru tai, ka verenio toro tai rikulkulu ka veru nei, mia bijuru nene rivurikorovio, ka mia amijikia avitilubario. Ana abar bunu kulo na mira nalo ajukuku ka vio nene.

Mataiu 28:1

Legiano Lu barlaka, ana legiano napano binimei iorou, napano be legiano moti na sude, bogo napano m̃erenio mijivi, ana Mere na vio Maktala, naljuo Mere dolu, abe juo aba ka aial buluvae nene.

Mataiu 28:2

Naljuo aba aboru ea vio nei, sop̃eli ga m̃ii mukulkulu toru, bior Atua kiano nailiano tai moluo den vio mave binimei ea yetemeriba, melivlivilar ka puruveru nei, ana naio ba jotano mave eaio.

Jone 11:38

Mia Yesu naio miel ban bija burum̃ara jogvaiano nei, naliko Mere nalo aba amiyotuba ea buluvae napano Lasaros taati mon eaio. Bulukuveru nei naio be buluvae tai, napano amidu burum̃ara puruveru tai joko buluku tavo nene.

Jone 11:41

Ana ajidel ka ga, ajubonlar burum̃ara puruveru nei, bisi ana na Yesu naio jirarag bavin mave, naio bolkouo, berinavo “Teta, kiniou neber siva toru banso ka napano jau kajaaro ka m̃a komijog kanaku valeiano nei.