Abe Kulo Ju 9:28 - Verikariano Vou Na Baki

²⁸ mia ea tivelinio na Kristo, naio jibe na bunu. Naio binimei miyotuba ea yetemeriba nei, karina mila jokoluolu ka naio ka rivar vironiano na kiado kariano nalo, karina mia riyotuba bereio ve valuo nene, maka ka mia rivulu bulag kariano bereio, mia ka rivuru bulag kito den vironiano na kariano na kiado, na m̃a rabarkar tiniedo eaio, rojidom ka mia naio rimei rilarur kito.

Abe Kulo Ju 9:28 ပူးပေါင်းရင်းမြစ်များ

Mataiu 20:28

Kulorinio Kenerinio naio mila jibe naruei, ka naio maka rimei ka mia tomu nalo ala im̃auano na ka mia aija naio, mia naio binimei ka rila im̃auano na ka mia naio rijailo, a kanio rijamo ka kiano meuliano ka rivulu bulag tomu nalo ve telabo.”

Mataiu 25:31

Mia Yesu naio mil berinavo “Bogo napano mia Kulorinio Kenerinio naio rimei naliko kiano nailiano nalo, ea kiano mermerano ka rive Parinio Tubo, naruei mia naio rimei ka mia totano ea kiano jobaro lu.

Mataiu 26:28

bior ninei be kanaku burukija, napano mia rila Atua kiano verikariano tu sikili, napano mia naio rioukar viekokoano na vijuku vovaiano na tomu ve telabo kialo.

Jone 14:3

Kiniou navan ka nala vatitig rivu kenemiu vio nene, avona bisi, mia kiniou nemei bereio yetano nei ka kamiu, novuru bulag kamiu kumei ea kiniou, ka na mia kamiu kuvijikia kuvitu dam̃ariga vija kiniou ea vio napano mia notoaio.

Im̃auano 1:11

“!Ai, kulo Kalele nalo! Kamiu kuvijog re rivova, ana kuvitu kuvisirarag re vavin vesio tibe na. Yesu nene napano Atua burular den kamiu bavin tiniabene, monokanio mia naio rimei bereio, a mia rimei bereio tavukia ga na naio bavin tiniabene ruei, napano kumialio vonganei na.”

Romo 3:25

Naio bulu bulag kito ka napano Atua bitirilar naio jibe ka sida napano kiano burukija miou ka sekon bulag kiado kariano nalo kito napano romonea naio. A jum̃abe ka tomu nalo na jikar yuka nalo re nua binimei, bogo na Yesu maka rimei vo? Maka reialio napano Atua rije vironiano vanlo ka kialo kariano nalo, ana p̃eli be jidomiano ka p̃eli Atua mije vironiano na kariano na tomu tealo ga, a tomu tealo maka rije vironiano na kialo kariano? Mia makanio, nina maka river tibe na. Bogobe nua ruei, na Atua jo mila kiano jidomiano tebievi ga, a jo jokoko vio ka kiano tiniememiano, a naio mila jibe na ba bokar bogo na Yesu m̃aro ka kialo kariano na re nua bunu.

Romo 5:15

Mia im̃auano novo na Atua milaio napano maluvo ea kiano tinieseseiano naio bo laka, mijikia tovulu im̃auano va napano Atam milaio napano maluvo ea kiano kariano. Atam kiano kariano naio takurano mila tomu nalo monoka am̃arm̃aro, mia Yesu Kristo kiano tinievuiano naio takurano mila kito romemedu ea Atua mirano. Tenei jibe jidomiano vu tai napano kito romidu ga jibe na ga.

Romo 6:10

Kiano m̃ariano nua na, naio be m̃ariano tai na rivar bulag vironiano nonovio na kariano, a kiano meuliano vonganei, naio be meuliano tai napano ka ridular Atua siano,

Romo 8:23

A be verare ga ka kito napano robokar Niununo Lu, napano naio jibe jidomiano tai na beamu napano Atua jian ban kito ka rila rosidomii ka mia jidomiano na toru mia rimei iorou navo. Kito bunu, tegiano jua kiado iviso kia ga vo, a romijikia ka mia kito rotu rojog rivova rivano-o vokar bogo napano Atua ridu bulag kito den yetemeriba. Rojidom nina laka, kar napano rojibe ka tete nalo napano naio bar bulagio ga, a ea bogo na, mia rojog rivu vatitig jum̃abe kenerinio riano nalo, napano rova rotu vija naio ea kiano vio memedu.

Romo 8:3

Tomu nalo amila vio ka amonea vatitig Atua kiano tuboiano ka avokar ioruriano eaio, a maka ajikia ala kar toro parinio kirisikili laka. A venia napano maka ajikia alaio, Atua naruei milaio. Naio miila kenerinio Yesu binimei ea yetemeriba, mila mokotenano a kiano meuliano, be verare ka kito tomu na kariano. Mia Yesu binimei mijamo ka mokotenano a kiano meuliano nei jibe sida tai ka uelar vironiano na kiado kariano.

1 Korin 1:7

Jidomiano nalo a moroano nalo napano Niununo Lu no jo jianio, maka tai napano maka kuvokario vo, ana kumitu kumim̃au bijalo bo laka, bior napano kumitu kumisirarag ka kiado Tubo Yesu Kristo mijikia riyotuba bereio ea vio yetano nei.

1 Korin 15:54

Mia bogo napano kito rojev mokotenado vou tibe na, mia rila iliano tai na Vivitauiano Moruo rimei rive riano laka, napano berinavo “Meuliano na Atua kiano moroano bar bulag moroano na m̃ariano nalo.” Aisaia 25:8

1Tesa 1:10

A bija nina, nalo aju ajukunu bunu napano kumitu jikili, kuvitu rorea Atua kenerinio nei, Yesu. Naio riyotuba ka kito bereio, bior napano Atua bitiri lario meul bereio ea nam̃ariano ruei, a mia naio riila riyotuba bogo ve valuo nene, ka naio toko kito ka bogo na tibureiano.

2Tesa 2:1

Kiniou nojidom neverii bereio Tubo kiano liliuiano bereio, bijaio jum̃abe ka mia rivuru kito rotu vija naio. Banalo, ea vio nei, nojidom never tibe nei,

2 Timoti 4:8

Tomu na memedu nalo na Tubo kiano mia nalo avokar batubatu lu, a be tinieku ka kiaku naio midu vatitigio jo mave ruei, ka mia rudu van kiniou ea legiano na maaro. Ea bogo na, naio tibure tomu nalo rive memedu, a mia naio sian jidomiano van kito roviniu napano kiado jidomiano naio jikili ka rasirarago kuku ka kiano rimeiduluiano.

Taitas 2:13

Monoka rotu tibe na ga, monoka rotu rorea ga bogo na bo napano kiado jidomiano joaio, napano kiado burum̃ara Atua, kiado Naioruriano Yesu Kristo mia maluvo eaio, bija kiano burum̃ara miamoiano.

Abe Kulo Ju 1:14

Naina naruei be iliano na maaro ea tivelinio nei, na m̃a berii jum̃abe ka Atua kiano nailiano nalo na aim̃au kanano ga, nalo abe niununo nalo na m̃a abar kanano iliano, a nalo na ka m̃a ajai kito na m̃a rojev ioruriano, mia be toro tai jo napano naio loa lievo kalo, nina naio be Kenerinio Lu na Yesu, napano Atua mil maariano ban kito eaio.

Abe Kulo Ju 10:10

Ea m̃arabo vou nei naruei, Kristo naio mila jibe ka na Atua kiano sidomiano naio berenio, naio jian nonovio mokotenano, ana mila napano kito robinimei romeravo a robe lu ea Atua mirano, naio jo jibe na dam̃ariga.

Abe Kulo Ju 12:14

Vite juo na m̃a ratam̃i ka rovokar tulaka atibe na. Tai, naio bajago na bilbilu na bo vija kulo dolu nalo, a tinene, naio be bajago na meuliano lu na m̃a toro monoka toaio ver naio jidom rial Atua na loa laka mirano.

Abe Kulo Ju 2:3

Mia voniganei, Ioluano Vou na bo na terivou naio binimei bokar kito ruei, mia naio toru lie loa ka Tuboiano moruo na beamu. Jibena, ver kito rosidomii kurano ea m̃arabo na kiado ioruriano napano joaio, mia maka rejikia rovuro den kanano vironiano leleio. Kanado Tubo nene naruei naio mila Ioluano Vou na bo naio miyotuba jukamu, mia nalo na m̃a amijog naio ka m̃a berialio ea tilinielo nalo, nalo kija aberial sosolio binimei boru ea kito, amila meravo ka be riano.

Abe Kulo Ju 4:15

Kiado parinio toro lu nei, naio maka ve tai na m̃a maka rijikialubar kiado mijikikiano, mia naio mijikia vatitig ka kito maka m̃a rotumolu rotu sikili laka. Naio tinien miia kito, mia naio rijai kito, bior beamu naio bunu, juboluboiano nalo abinimei kirisikili laka ban naio ka tivelinio nonovio, jibe ka ga napano m̃a ajum̃a abinimei ea kito. Naio javukia ga kito, mia vite takurano ga, juboluboiano maka rivuru naio rijoru ea kariano leleio kija garuei.

Abe Kulo Ju 5:9

Naio batove ka karam̃ano kanano sidomiano nalo abiniu, bano-o na mila nonovio im̃auano na Atua midu banio, mila na Atua bitirilar naio javukia tormoruo Melkeseteki. Jibena, Yesu binimei be Atua kiano parinio toro lu, binimei be burupati na meuliano na maka rijikia ribisi, na kiado robiniu napano romijogkar naio.

Abe Kulo Ju 7:27

Mia kulo lu dolu nalo nei, nalo monoka atum̃a ala sida na meravoiano tulaka ea legiano nonovio. Beamu, monoka ala rivior kialo kariano nalo bereio, ana iorou, amijikia ala rivior kariano na tomu dolu nalo kanalo, mia Yesu naio maka tibe na. Naio mila sida na meravoiano na kariano na yetemeriba nei reraio ve vaarakurano ga, nina, ka bogo na naio mila jokoluolu ka mokotenano bereio kar kito.

Abe Kulo Ju 9:25

Mia bogo na mila kiano jokoluolu jibe na, naio maka tavukia nalo na m̃a parinio kulo lu dolu nalo amilaio. Nalo amila jokoluolu ka burukija na temeul nalo, mia naio mila jokoluolu ka kiano burukija bereio. Mia nalo, aba amila ea vio lu vaarakurano ga ka yuka nonovio, monoka mia ala tibena rivan dam̃ariga, ana naio mim̃au ka nonovio varakurano ka bogo tai na ga, bisi, ana maka ka mia aim̃au ka bereio.

1 Pitere 2:24

Bogo napano Yesu naio jaklele ea m̃akolkolo, vironiano na kanado kariano nonovio mijoru ea niabene, a kiano m̃ariano mila na bajago na lakariano naio m̃aro den kito, mila napano bajago na mila memedu naio meul bo naio joa kiado meuliano. Ierinio, kiano niabejalele nalo amila kiado niabejalele nalo amije ioruriano na bo.

1 Pitere 3:18

Kamiu tiniemiu maio ka Kristo, napano naio jibe na. Naio be toro na memedu laka tai, mia naio mijog jaleleano burutomoruo laka bior tomu nalo napano maka amemedu. Kariano na kito tomu nalo na yetemeriba kiado telabo laka, mia ea kanano m̃ariano takurano nei, naio mila vite nonovio bo ruei ka rila ka ve kiado m̃arabo ka mijikia rivuru kito rava vaataro ka Teta Atua. Amila lelan Yesu niabene jibe na bano naio m̃aro garuei, mia bo laka ka napano iorou, naio binimei meul bereio ea moroano na Atua Niununo.

2 Pitere 3:12

Kamiu monoka kuvisaaro ka legiano na rimei, a ver kamiu kuvu, a kuvitu kuvim̃au sikili, mia kuvijikia kuvila riyotuba sop̃eli. Bogo napano naio rimei, mia sebi rivilvili ea vio mave, sisen kokoa nonovio, mia naio sisen vite nonovio na yetemeriba riiou bulagio.

1 Jone 3:2

Kanaku bilbilu nalo, romijikia rover vonganei kito robe Atua kenerinio nalo, mia maka rejikia vo, ka iorou kanio, mia naio rila kito romei rove vaio ga bereio. Mia be titai ga romjikia batitigio. Bogo na Tubo Yesu Kristo rimei bereio, mia rovitikar naio ka mirado rimemedu, mia rovitilubar naio garui memedu, mo bogo na reial naio tibena, mia romei rotibe ka naio ga.

1 Jone 3:5

Mia bogo na Yesu naio binimei ea yetemeriba nei, naio binimei napano maka kariano toa naio leleio, naruei naio binimei ka rivar bulag kiado kariano nalo.

M̃esi Napano JUT Bivitauiaio 1:21

Kuvidu vatitig kamiu to dam̃ariga yetano ka Atua kanano tinietiiano, kuvitu melumu ka kuvisirarago ka Tubo Yesu Kristo ga, rivan napano naio, ea kanano tinieiiano, rivuru bulag kamiu kuvan ea meuliano napano maka ve jukuti nene.

Navisip̃eiano 1:7

Kamiu kuvitii vatitig rivu! Naio naruei jom̃a mijian burevure melijo nalo na mave, naio riyotuba rimei. Mia kito nonovio reial naio ka mirado memedu, a vija bunu nalo nanua m̃a ajukukakar naio ea m̃akolkolo, nalo bunu avitilubar naio bereio. A mia ve burum̃ara jogvaiano a tegiano riyotuba ea tomu nalo na yetemeriba, tinielo rimaio ka venia napano amila ban naio ea bogo nanua beamu. Mia monoka tibe ga na, neber “Ee” ban naio kanio.