1 Korin 14:1 - Verikariano Vou Na Baki

¹ Naruei bior napano tinietiiano naio burum̃ara vite laka jibe na, kamiu monoka kuviduio to ve vite moti ea kenemiu meuliano. Mia bija nina, monoka kuvidu kenemiu jidomiano toa moroano nalo napano Niununo Lu jom̃a jianio, kamiu kuvisaaro ka kuvakarlo. Mia ea moroano nalo nei, tai napano bo laka, nina napano toro berial Atua kiano iliano nalo.

1 Korin 14:1 ပူးပေါင်းရင်းမြစ်များ

1 Korin 14:39

Bo ga, kamiu monoka kuvisidomii vatitig kiaku iliano nalo, ka kuvisikili ka kuvijev moroano ka kuverial Tubo kiano iliano, mia ver tealo amijev moroano ka ail sel iliano dolu napano Niununo Lu jian banlo, monoka kuvituko vio re ka nalo kuver ala re.

Abe Kulo Ju 12:14

Vite juo na m̃a ratam̃i ka rovokar tulaka atibe na. Tai, naio bajago na bilbilu na bo vija kulo dolu nalo, a tinene, naio be bajago na meuliano lu na m̃a toro monoka toaio ver naio jidom rial Atua na loa laka mirano.

1 Timoti 4:14

Jau tiniemo bobogia re moroano lu nam̃a Atua jian banso ea bogo napano taara na vurim̃araboiano nalo amioa parimo. Naverialiano tai ka bogo na, kiano iliano naio berial moroano nei be kanamo, naruei monoka kesikili ka koim̃au vija.

1 Korin 16:14

A vite nonovio napano kumilaio, monoka kuvilaio ea bajago na tinietiiano.

1 Korin 12:1

Bo ga kuruaku a kuvivinioku nalo, kiniou nojidom neverii moroano nalo napano Niununo Lu mijikia sianio van kito namoneano nalo jibe jidomiano tai. Ea tivelinio na, maka rivu kamiu kuve taboso, mia nojidom ka monoka kuvijikia vatitig kija kalo.

1 Korin 13:13

Tibe na, vite dolu nalo mia abisi, mia vite tolu ga amijikia atu tulaka, nina naviekouoiano, baleaiano, a tinietiiano. Mia ea vite tolu nei, nana napano toru laka kalo, naina neberenio maariano na, naio be tinietiiano.

1Tesa 5:20

a verver toro tai jo berial verialiano nalo, mia kuviyotel ea re naio,

1 Timoti 6:11

Mia Timoti, jau kojibe ka Atua kiano toro tai riano, mia monoka kovilig taakamo ka juboluboiano nonovio na jibe na. Venia napano naio bo ka jau kodu toa meriniamo tulaka, naio be bajago na memeduano, bajago napano toro naio rimei rivu tibe Atua, bajago na viekouoiano, bajago na tinietiiano, bajago na vokar vatitig im̃auano, a bajago na melumuiano.

1 Korin 14:37

Ver kamiu tai ber p̃eli naio be toro na verial Atua kiano iliano, p̃eli naio be toro napano jidomii jo jakii m̃arabo na Niununo Lu mila meravo banio, naio bo, mia ver jibe na be riano, mia naio monoka rivitilubar ka vite nalo napano nojo nojiri kakario ban kamiu, abe Tubo kiano ilirianiano.

1 Timoti 5:10

Bereio, naio monoka ve tira napano tomu nalo abitilubario ka naio mila im̃auano nalo bo laka, napano naio mia berloglog batitig kenerinio nalo, naio be tai napano naio jaaro ka rivitikar rivu toro dolu ea kunuano. Tilikiti napano namoneano lu dolu nalo abinimei amiadu ka naio, naio jekon jaalo, a naio jo bitiri bulag nalo napano amijoru ea jogvaiano tedade nalo. Tiramoruo taanou napano naio mim̃au jikili ea im̃auano novo nalo na jibe na, naio naruei siano mijikia riva jouro.

Eveso 1:3

Bo kanio kito reiaia Atua, napano naio be Atua ka kiado Tubo Yesu Kristo, a napano naio be karam̃ano bunu, bior kito napano robe takurano bija Kristo, Atua naio mila vatitig kito bo laka ka ilivuiano novo nalo ea vio mave.

1 Korin 12:31

Maka leleio tibe na, mia bo ka tomu nonovio asaaro ka avokar burum̃ara moroano vabe napano Niununo mijikia sianio vanlo. A ea moroano nalo na, tai jo napano monoka rimei ve moti ea kiado meuliano nonovio, napano bo lie laka ka nalo dolu, napano kiniou nojidom noveriio van kamiu, nina bajago na tinietiiano.

3 Jone 1:11

Kanaku bilbilu, nojidom never kaso ka kema nei mila kirivova kaso mia maka rivu ka rila jau bunu, jau kala rivova van naio bereio. Monoka kito rovijauia re bajago na bova ga, mia bo ka rovijauia bajago na bo. Toro na m̃a mila bo ban toro dolu, naio be Atua kiano toro riano, mia toro na m̃a mila bova ban toro dolu, naio maka rial Atua vo, naio jo koalabo kia ga vo.

2 Pitere 1:7

Ea bajago lu nei, bo ka kuvijedu ka sidomiano, a ea sidomiano nei, bo ka kuvijedu ka tinietiiano.

Romo 12:6

Atua be kiano tinieseseiano ka kito, mijamo ka jikiaiano dolu nalo ban kito, napano jibe jidomiano nalo na naio jian bulagio ban kito ka kito roim̃au vijaio. A kito terakurano monoka rosikili ka roim̃au vija venia napano naio jian ban kito. Jibe nei ver Atua rijamo kaso ka rive kiamo ka koverial iliano napano naio jian banso, ana monoka kolaio vija moneano ve toru ka kiano iliano nei be riano laka,

2 Timoti 2:22

Verver kosidom ka jau kotibe na, monoka kotokovio ka tiniekariano nalo na jikili a tinieiiano nalo na bova napano m̃eaku nalo kialo jidomiano mijikia rivujo kanio. Jau monoka kalavio sikili ka kiamo meuliano rivujo ka memeduano, a viekouoiano, a tinietiiano, a tum̃aro, mia tibe na mia rivu laka vanso vija nalo dolu napano kenemiu jidomiano takurano, napano kumitu kubolkouo ka Tubo ka kiano ijaiano.

Romo 9:30

Bo ga, iliano nalo na aber jibe nei, aber nalo napano maka ave Ju, nalo maka ala vonio ka atakii Atua kiano tuboiano ka amei amemedu ea mirano, a iorou, bogo napano nalo amonea Yesu, Atua mila vonga nalo ka amei memedu ea mirano.

Romo 14:19

Jibe na, bogo nonovio kito roviniu monoka rala vonio sikili ka roim̃auka bajago novo nalo napano amijikia adu tum̃aro toa kito namoneano nalo, a napano aijaja kito ka roviniu kiado jidomiano rimei rimeruo vatitigio.

1 Korin 13:2

P̃eli burum̃ara moroano joa kiniou ka neverial Atua kiano iliano, p̃eli na nemijikia vatitig vite telabo napano tomu dolu nalo maka ajikiaio, p̃eli na kiaku viekouoiano toru laka bare ka nobolkouo ka tenalo na tortoru mia amaluvo, vite nalo na abo laka, a ver tinieku tii re tomu nalo, nebe iakurano ga.

1 Korin 14:22

Ea iliano na, romial ka Atua berialio ka moroano na ail ka iliano dolu napano Niununo Lu jiianio, ka vaio? Moroano na, maka van kito na romonea ruei, mia ka rijai nalo napano maka amonea vo. Bogo napano ajogio, avitilubario ka be riano. Mia moroano nei ka riverial Atua kiano iliano, rijai laka ka kito napano romonea ruei, ka romijikia rojoglubario meravo bo. Mia moroano na maka jikia rijai laka nalo napano maka amonea vo, bior napano maka asidom aiagago ka Atua kiano ilirianiano.