1 Korin 12:31 - Verikariano Vou Na Baki

³¹ Maka leleio tibe na, mia bo ka tomu nonovio asaaro ka avokar burum̃ara moroano vabe napano Niununo mijikia sianio vanlo. A ea moroano nalo na, tai jo napano monoka rimei ve moti ea kiado meuliano nonovio, napano bo lie laka ka nalo dolu, napano kiniou nojidom noveriio van kamiu, nina bajago na tinietiiano.

1 Korin 12:31 ပူးပေါင်းရင်းမြစ်များ

1 Korin 13:1

Tinietiiano, naio be vite tai napano monoka ve vite moti ea kiado meuliano. P̃eli nemijikia neil sel kulo dolu kialo iliano, p̃eli nemijikia neil ka agelo nalo kialo iliano, nina bo, mia ver kiniou tinieku tii re tomu nalo, mila napano kiaku iliano nonovio ajibe ka p̃i tai napano amue vovu, miolu kurano ga.

1 Korin 14:39

Bo ga, kamiu monoka kuvisidomii vatitig kiaku iliano nalo, ka kuvisikili ka kuvijev moroano ka kuverial Tubo kiano iliano, mia ver tealo amijev moroano ka ail sel iliano dolu napano Niununo Lu jian banlo, monoka kuvituko vio re ka nalo kuver ala re.

Mataiu 5:6

Nalo napano ajidom m̃elea bajago napano memedu javukia napano m̃a Atua naio jidomio, mia ilivuiano rimei toalo, ana na mia nalo aial bajago na memedu nalo nei amei avujo lou vatitig ea kialo meuliano nalo.

Vilip 3:8

Nao-o, nemijikia never tibe nei naruei, neverinavo nojo namial vite dolu nalo nonovio abe tena vakovio ga, mia nojidom ga ka nejikia vatitig Kristo Yesu tibe ka tubo na kanaku meuliano, riva lie tibe na. Vite takurano na ga na namial naio bo, napano bo lie vo jovulu vite dolu nalo nonovio, naruei naina ga nojidomio. Kiniou nojidom toru ka novokar naio ea kanaku meuliano, mia namilaluv kanaku saba dolu nalo nonovio bior ruei, mia naio bo ga, kiniou namial vite nalo na jibe soro ga ea kiniou.

1 Korin 8:1

Vonganei kiniou nojidom neverdop̃e kenemiu vikadeniano ea tivelinio na sunbue nalo napano tomu nalo na maka amonmonea amila sida kanio ban kialo tavoru nalo. Kamiu kumitu kubika kuber bo ka kito namoneano nalo rosen sunbue nalo na, p̃eli na makanio. Bo ga, mia kiaku verdop̃eiano beriio tenalo juo nei, bajago na jikiaiano, a bajago na tinietiiano. Ea tivelinio na jikiaiano, tomu telabo napano aberenio aber amijikia vatitig verdop̃eiano na kenemiu vikadeniano nei, a nalo amijikia avarvar kalo kija napano ajidomii aber nalo amijikia vite. Bajago na jikiaiano mijikia rila toro ridu kiano jidomiano to mave, mia bajago na tinietiiano maka tibe na, naio jo miija vatitig toro kiano meuliano ga.

Abe Kulo Ju 11:4

Bo ka kito rosidomial korobido nalo tealo, ka jum̃abe nalo bunu abalea Atua bogo na beamu. Nalo tai be tormoruo Epel. Ea kiano viekouoiano ea Atua, naio milotu ban naio ka ijaiano tai napano memedu, ana Atua jaaro ka rijevio, naio mial bo loa ka ijaiano na kuruano Ken naio jianio. Mia Ken tinieno mimi, ana naio muetam̃aria kuruano nene, mia Epel kiano bajago bo na viekouoiano ea Atua, mila Atua mial naio be toro na memedu tai, mia vite nei mijikia rija kito rimei rivokar banei keana vo.

Luka 10:42

Mia be vite takurano ga jo ka mia jau kosidomii ve temi kanio, a vite nene Mere nei naio jo mileal ruei ea kiano meuliano, mia maka nejikia nodu lario den naio bereio.”

1 Korin 14:1

Naruei bior napano tinietiiano naio burum̃ara vite laka jibe na, kamiu monoka kuviduio to ve vite moti ea kenemiu meuliano. Mia bija nina, monoka kuvidu kenemiu jidomiano toa moroano nalo napano Niununo Lu jom̃a jianio, kamiu kuvisaaro ka kuvakarlo. Mia ea moroano nalo nei, tai napano bo laka, nina napano toro berial Atua kiano iliano nalo.