Impadayag 22:10 - Lalang Hu Dios

¹⁰ Daw inikagiyan a kandin, “Harì nu gayed iglilung haini sa mga intagnà ha insulat taini ha libru ta madani en sa panahun ha matuman haini.

Impadayag 22:10 ပူးပေါင်းရင်းမြစ်များ

Mateo 10:27

Sa mga lalang ku ha iyan kaw dà nakapaliman duun ipanunultul nuy gayed duun hu mga etaw.

Roma 13:11

Kinahanglan ha buhaten nuy haini ta natun-an nuy ha mababà en iman sa panahun. Harì kaw bà dà tagtidugahà ba magpangandam kaw gayed ta sa katumanan hu kaluwasan taw ubay en iman dì su anay kuy makatuu.

Roma 13:12

Iling hu daleman ha iman agkawaswas en daw sa aldaw madani en agsibwal. Aman endaan taw sa mga buhat taw duun hu kasukileman daw ibalabad taw sa hinagiban hu kapawà.

2 Tesalonica 2:3

Harì kaw gayed palimbung hu bisan sin-u ta sa Aldaw hu Paghukum harì pa mauma ku harì mauna mahitabù sa pagsukul hu kaet-etawan daw humiwal haena sa tungkay labaw ha masinupaken ha etaw ha tinaganahan daan hu alantusen diyà ta Impirnu.

1 Pedro 4:7

Sa katapusan hu alan ubay en. Aman pandayai sa henà-henà nuy daw magpugung kaw hu kaugalingen nuy ta daw makaampù kaw.

Impadayag 1:11

ha tagyanaen, “Isulat sa agkaahà nu daw ipauwit duun hu pitu ha iglisia hu tagkaamul-amul ha mga tumutuu ha diyà ta Efeso, daw ta Esmirna, ta Pergamo, Tiatira, ta Sardis, daw ta Filadelfia, daw diyà daan ta Laodicea.”

Impadayag 1:3

Malipayen gayed sa etaw ha magbasa taini ha libru daw malipayen daan haena sa magpaliliman daw tumuu, ta madani en sa panahun ha matuman haini.

Impadayag 10:4

Igsulat ku ngaay su napaliman ku ba amin lageng ha diyà napuun ta langit ha tagyanaen, “Harì nu pa igsulat sa kahulugan taena ha pitu ha dagsang.”

Impadayag 22:16

“Iyan a si Jesus sa migsugù taena ha balinsuguen ku hu pagpanunultul taini diyan ta inyu sinyu sa mga punduk hu tagkaamul-amul ha mga tumutuu. Iyan a su Kaliwat hi David daw bituen ha makabugwas.”

Impadayag 22:18

Iyan a si Juan sa tag-ikagi inyu sinyu sa nakapaliman hu intagnà duun taini ha libru. Ku amin bisan sin-u ha isaban din haini isaban daan hu Dios sa silut kandin sumalà hu mga alantusen ha insulat duun taini.

Impadayag 22:20

Si Jesus ha iyan nakapanistigus hu alan duun taini tagyanaen, “Laus ad en aglikù.” Jesus ha Ginuu, maayad ku laus kad en lumikù.

Impadayag 22:7

Kagi hi Jesus, “Laus ad en aglikù. Malipayen gayed sa etaw ha tumuu hu intagnà ha insulat duun taini ha libru.”

Impadayag 22:9

Ba inikagiyan a kandin, “Harì a ikaw iyan agsimbaha ta siak daw sikaw, sa mga duma ha mga prupita daw sa alan ha tuminuu hu lalang duun taini ha libru, mig-iling dà ha mga suluguen hu Dios. Iyan nu dà gayed simbahen sa Dios.”

Impadayag 5:1

Su tagpinuu duun hu trunu naahà ku diyà ta kawanan ha alima din sa linulun ha balasahen ha sinulatan sa masigdibaluyà din daw amin daan duun pitu ha timaan ha impadeket ta daw harì mapuwaan.