Hebreo 2:14 - Lalang Hu Dios

¹⁴ Tumenged ta sikuy sa mga batà hu Dios, etaw dà, si Jesus migpakaetaw daan ta daw mailing haena kanuy. Binuhat din haena ta daw mabaluy ha magpakamatay daw pinaagi taena madaeg din si Satanas sa iyan puunaan hu kamatayen,

Hebreo 2:14 ပူးပေါင်းရင်းမြစ်များ

Mateo 16:17

Inikagiyan haena hi Jesus, “Simon ha batà hi Juan, napanalanginan ka ta sa ingkatun-i nu tayana kenà pinaagi hu etaw dà ta impadayag ikaw hu Amay ku diyà ta langit.

Mateo 25:41

“Dayun ikagiyan ku daan sa mga etaw ha dini dapit ta gibang ku, ‘Sinyu sa hinukuman en hu Dios, paman-awà kaw dini daw duun kaw hu hapuy ha harì en gayed agkapedengan ha intagana ki Satanas daw hu mga ginsakupan din.

Juan 1:14

Saena ha Lalang migpakaetaw daw uminamul kanuy hu mababà ha panahun. Naahà day sa pagkagamhanan ha in-ila kandin hu Dios ha Amay din tumenged ta iyan bugtung ha Batà din. Saena maluluy-en gayed daw natun-an taw en diyà ta kandin sa kamatuuran.

Juan 12:24

Laus gayed sa ag-ikagiyen ku inyu ha ku harì makapamula sa binhì dini ta bugtà harì gayed mamunga, ba ku ipamegas tumubù gayed haena daw mamunga hu madakel.

Roma 14:9

Si Cristo Jesus minatay daw nabanhaw ta daw mabuhat ha Ginuu hu mga tumutuu ha minatay en daw hu bubuhay pa.

Roma 8:3

Tumenged hu makasasalà ha kinaiya taw harì kuy pakahimu hu pagtuman hu Kasuguan, ba linuwas kuy hu Dios ta sinugù din sa Batà din ha magpakaetaw isip ha halad. Aman nalibri kuy kandin hu pagkaulipen taw hu salà

1 Corinto 1:28

Pinilì hu Dios sa agkaamaniyan daw sa agtameyesen hu mga etaw daw pinilì din daan sa ag-isipen hu mga etaw ha hurà din pulus ta daw saena ha tag-isipen ha matangkaw iyan man diay hurà din pulus.

1 Corinto 15:50

Mga suled, ag-ikagiyen ku inyu ha saini ha lawa taw iman harì makaseled duun hu tagharian hu Dios ta agkaledak dà.

Galacia 4:4

Ba su makauma en sa natugun ha panahun impadini hu Dios sa Batà din ta kalibutan ha imbatà hu bahi daw nasakup hu Kasuguan

Colosas 2:15

Tumenged hu kamatayen hi Cristo impadayag sa kadaega din ki Satanas daw hu mga ginsakupan taena.

1 Timoteo 3:16

Laus gayed ha labaw pa hu alan sa kamatuuran ha impadayag dini ta kanuy daw iyan tagtuuwan taw. Si Cristo Jesus migpakaetaw daw saini pigtistigusan hu Balaan ha Ispiritu ha matareng. Nakilala daan hu mga balinsuguen hu Dios daw luminigtu diyà ta langit hu pagharì. Intultul daan duun hu alan ha kaet-etawan daw tinuuwan dini ta tibuuk kalibutan.

2 Timoteo 1:10

Iman impadayag din en haena pinaagi hu pagdini hi Cristo Jesus ha Manluluwas taw. Si Jesus nadaeg din en sa gahem hu kamatayen daw pinaagi hu Maayad ha Tultulanen natun-an ta ha amin tad en kinabuhì ha hurà din katapusan.

Hebreo 10:10

Tumenged ta natuman hi Cristo Jesus sa agkabayaan hu Dios nahimpit kuy pinaagi hu kasabuwa dà ha paghalad din hu kaugalingen din.

Hebreo 10:5

Aman tumenged taena su agdini en si Cristo ta kalibutan inikagiyan din sa Dios, “Kenà nu iyan agkabayaan sa mga mananap ha ighalad ba binuhatan a ikaw hu lawa ha iyan ighalad ku

Hebreo 2:17

Aman si Jesus migpakaetaw gayed ta kinahanglan ha makaagi hu bisan inu ha alantusen ta daw, mabuhat ha maluluy-en daw matinumanen, tungkay labaw ha sinaligan hu mga etaw duun hu Dios, daw mapalas din sa mga salà hu kaet-etawan.

Hebreo 2:18

Tumenged ta mig-antus haena su panulayen hi Satanas mahimu din daan sa pagbulig hu agpanulayen iman.

Hebreo 4:15

Maluluy-en haini ta natun-an din sa kaluya taw tumenged ta nakaagi daan hu bisan inu ha panulay iling kanuy, ba hurà gayed hu kandin makasalà.

Hebreo 9:15

Aman si Cristo iyan sinaligan hu bag-u ha kasabutan ta daw sa mga hinimu hu Dios ha tumutuu makaangken hu hurà din katapusan ha panalangin ha insaad din kandan. Saini mahimu gayed ta tumenged hu kamatayen hi Cristo nalukat sa mga etaw duun hu alan ha mga salà dan su sakup pa sidan duun ku daan ha kasabutan.

1 Pedro 1:20

Daan en pinilì hu Dios su hurà pa tanghagaa sa kalibutan ba iman impadayag en para inyu.

Impadayag 1:18

Migpakamatay a su anay ba iman bubuhay ad en hu hinangturan daw iyan a sinaligan hu kamatayen daw amin ku kagahem diyà ta Kamatayan.

Impadayag 12:9

Su dragun iyan su Yawà ha bunsalagan su anay daw tagngaranan ki Satanas ha iyan daan miglimbung hu alan ha kaet-etawan dini ta kalibutan. Aman saena daw sa mga ginsakupan din hinulug dini ta kalibutan.

Impadayag 2:10

Harì kaw gayed mahaldek hu malegen ha ipaantus inyu hu harì en malugay ta ipaprisu hi Satanas sa duma inyu ta daw masulayan sa pagtuu nuy, daw malegen gayed sa alantusen duun hu sampulù ha aldaw. Magmatinumanen kaw gayed kanak bisan duun hu kamatayen ta ag-ilahan ku inyu kinabuhì ha hurà din katapusan ha iyan bales inyu hu pagpakadaeg nuy.

Impadayag 20:2

Dinakep din su dragun ha iyan sa Yawà ha bunsalagan su anay daw tagngaranan ki Satanas dayun pigkadinahan din seled hu nangkalibu ha tuig.