Galacia 2:16 - Lalang Hu Dios

¹⁶ Ba bisan pa taena natun-an taw ha harì gayed isipen hu Dios ha matareng sa etaw pinaagi hu pagtuman hu Kasuguan ta pinaagi dà gayed hu pagtuu ki Cristo Jesus. Aman tuminuu kuy ki Cristo ta daw mabuhat kuy ha matareng pinaagi hu pagtuu kandin kenà pinaagi hu pagtuman hu Kasuguan, ta hurà gayed ag-isipen hu Dios ha matareng pinaagi hu pagtuman hu Kasuguan.

Galacia 2:16 ပူးပေါင်းရင်းမြစ်များ

Juan 20:31

Ba insulat haini ta daw makatuu kaw ha si Jesus iyan su Misiyas ha Batà hu Dios, daw pinaagi hu pagtuu nuy kandin mailahan kaw gayed hu kinabuhì ha hurà din katapusan.

Mga Buhat 4:12

Iyan dà si Jesus makaluwas hu kaet-etawan ta hurà en gayed lain ha Manluluwas ha sinugù hu Dios dini ta kalibutan.”

Roma 1:17

ta duun hu Maayad ha Tultulanen impadayag hu Dios sa paagi ha maisip sa etaw ha matareng. Saini pinaagi dà gayed hu pagtuu ta sa insulat ha lalang hu Dios tagyanaen, “Sa etaw ha nabuhat ha matareng pinaagi hu pagtuu din makaangken hu kinabuhì ha hurà din katapusan.”

Roma 3:30

ta sabuwa dà gayed sa Dios daw ag-isipen din sa mga Judio ha matareng ku tumuu sidan iling daan hu kenà mga Judio.

Roma 4:2

Ku inisip pa ngaay haena hu Dios ha matareng pinaagi hu maayad ha buhat din ikapasigalbu ngaay haena hi Abraham duun hu Dios.

Roma 8:3

Tumenged hu makasasalà ha kinaiya taw harì kuy pakahimu hu pagtuman hu Kasuguan, ba linuwas kuy hu Dios ta sinugù din sa Batà din ha magpakaetaw isip ha halad. Aman nalibri kuy kandin hu pagkaulipen taw hu salà

Roma 9:30

Saini tagpasabut ha bisan sa kenà mga Judio ha hurà maghenà-henà hu pagkamatareng ba pinaagi hu pagtuu dan ki Cristo Jesus inisip daan sidan ha matareng.

1 Corinto 6:11

Sa duma inyu agkailing taini su anay. Ba iman nahenawan en sa mga salà nuy daw himpit kaw en iman ha etaw hu Dios. Nabuhat kaw daan ha matareng pinaagi ki Cristo Jesus ha Ginuu daw hu Balaan ha Ispiritu ha sinugù hu Dios.

Galacia 4:5

ta daw malibri kuy kandin sa mga naulipen hu Kasuguan dayun mabuhat kuy daan ha mga batà hu Dios.

Galacia 5:4

Aman sinyu sa taghenà-henà ha maisip kaw hu Dios ha matareng pinaagi hu pagtuman hu Kasuguan nakadiyù kaw gayed diyà ki Cristo daw hurà pulus hu grasya hu Dios inyu.

Filipos 3:9

daw makigsabuwa a diyà ta kandin. Inisip a iman hu Dios ha matareng kenà tumenged hu pagtuman ku hu Kasuguan ba tumenged hu pagtuu ku ki Cristo. Saini ha pagkamatareng duun gayed napuun hu Dios pinaagi hu pagtuu.

1 Pedro 1:2

Daan kaw en pinilì hu Dios ha Amay taw ta daw mabuhat kaw ha mga etaw din pinaagi hu Balaan ha Ispiritu daw magmatinumanen kaw ki Cristo Jesus daw mahimpit kaw daan pinaagi hu langesa din. Sa Dios mag-ila gayed inyu hu grasya daw kalinaw.

1 Pedro 2:24

Inuwit en hi Cristo sa mga salà taw duun hu krus ta daw harì kuy en magbuhat hu salà daw sa pamatasan taw matareng gayed. Pinaagi hu pag-antus din nalibri kaw.

1 Pedro 3:18

Si Cristo kasabuwa dà magpakamatay daw iyan haena matareng ha migpakamatay para hu kenà matareng ta daw mabuhat kuy ha mga etaw hu Dios. Migpakamatay haena ba bubuhay pinaagi hu Balaan ha Ispiritu

2 Pedro 1:1

Iyan a si Simon Pedro ha suluguen daw apustul hi Cristo Jesus sa migsulat taini. Sinulatan ku inyu sa amin din pagtuu ha iling kamahal hu kanay ha pagtuu pinaagi ki Cristo Jesus sa matareng ha Dios daw Manluluwas taw.

1 Juan 1:7

Ba ku sa tagbuhaten taw iyan sa mga buhat duun hu kapawaan ha duun daan sa Dios amin taw pakigdapità daw sigi kuy taglimpyuwi duun hu mga salà taw pinaagi hu langesa hi Jesus sa Batà din.

Impadayag 7:14

Saena tinubag ku, “Ikagiya nu kanak ta harì ku agkatun-an.” Dayun inikagiyan a kandin, “Sayana ha mga etaw iyan su nakaagi hu pinakahaluhaldek ha kasamukan diyà ta kalibutan. Maputì sa bisti dan ta hinenawan en hu langesa taena ha Nati ha Karniru.

Impadayag 7:9

Su maiwas en haena naahà ku sa mga etaw ha harì tad en gayed agkaiyap ha duun nangapuun hu migkalain-lain ha kaliwatan daw mga nasud daw hu alan ha mga inikagiyan. Duun sidan tagtiyadeg hu atubangan taena ha trunu daw hu atubangan hu Nati ha Karniru. Saena sidan migpinaksuy hu maputì daw tagbalabad hu mga palwa