Colosas 4:12 - Lalang Hu Dios

¹² Agpangamusta daan inyu si Epafras ha tagadiyan daan ta inyu daw suluguen hi Cristo Jesus. Saini agpaniguru tag-ampù ha gumulang sa pagtuu nuy daw matun-an nuy gayed sa agkabayaan hu Dios mahitenged inyu.

Colosas 4:12 ပူးပေါင်းရင်းမြစ်များ

Mateo 5:48

Aman magmahimpit kaw iling hu Amay nuy diyà ta langit.

Lucas 1:1

Palangga ha Teofilo, madakel en sa migsulat hu naul-ulahan su anay dini ta kanuy daw sa insulat dan iyan sa inikagi kandan hu mga etaw ha nakaahà taena ha iyan daan migsangyaw duun hu kaet-etawan. Tumenged ta sinusi ku gayed sa alan sugud su anay nahenhenaan ku ha maayad ku ipanday ku isulat haini

Lucas 22:44

Miglugul gayed si Jesus aman ayuwà pa naniguru hu pag-ampù ha namanulù diyà ta bugtà sa ating din ha iling hu langesa.

Juan 12:26

Bisan sin-u sa agkabayà ha mahimu ha suluguen ku kinahanglan ha lumupug kanak daw bisan ku hindu a, duun en daan haena. Sa magtuman hu mga sugù ku madayè gayed hu Dios ha Amay ku.

Roma 15:14

Mga suled, nasiguru ku gayed ha maayad sa pamatasan nuy daw nasabut nuy sa kamatuuran aman angayan kaw en ha magtinudluay.

Roma 15:30

Mga suled, pinaagi ki Cristo Jesus ha Ginuu taw daw hu pagpalanggà ha in-ila hu Balaan ha Ispiritu aghangyuen ku inyu ha makigsabuwa kaw kanak pinaagi hu pag-ampù nuy kanak duun hu Dios.

1 Corinto 14:20

Mga suled, harì kaw tagbinatà hu henà-henà nuy. Ilingan nuy sa batà ha harì agpakatuen tagbuhat hu madaet daw ipagulang nuy sa mga henà-henà nuy.

1 Corinto 2:6

Sa mga magulang ha tumutuu agtudluan day hu mga madalem en daan ha katudluanan ba saena hurà duun dà kapuun hu etaw daw hu mga agalen dini ta kalibutan, ta sa kandan ha gahem agkahanaw dà.

2 Corinto 13:11

Mga suled ku, iyan dà haini. Paniguru kaw ha mahimpit kaw gayed daw tumanen nuy sa salambagan ku inyu. Magsabuwa kaw hu henà-henà nuy ta daw magmalinawen sa pagdapità nuy. Ku buhaten nuy haini sa Dios ha iyan puunaan hu pagpalanggà daw kalinaw magduma inyu.

Galacia 1:10

Harì nuy taghenhenaa ha iyan ku agkabayaan sa dayeen a hu mga etaw ta sa tuyù ku iyan sa Dios magdayè kanak. Kenà ku iyan tuyù ha mabayà-bayà sa mga etaw ta ku iyan pa hayan harì mahimu ha suluguen a hi Cristo.

Galacia 4:19

Pinalanggà ku ha mga batà duun hu pagtuu, tag-antus a iman iling hu bahi ha tagbatà taman ha mailingan nuy en sa kinaiya hi Cristo.

Colosas 1:22

Ba iman pinaagi hu kamatayen hi Cristo nakalikù sa maayad ha pagdapità nuy ta daw mahimpit kaw daw hurà din makasaway inyu duun hu atubangan din asem ku malugay.

Colosas 1:28

Iyan si Cristo tigsangyaw day. Tagsambagan daw tagtudluan day sa alan ha mga etaw sumalà hu natun-an day ta daw makagulang sa kada sabuwa duun hu pagtuu ki Cristo.

Colosas 1:29

Iyan haini hinengdan ha agpaniguru a gayed pinaagi hu gahem ha in-ila hi Cristo ha iyan tagbulig kanak.

Colosas 1:7

Saini intudlù inyu hi Epafras sa pinalanggà ha bulig day daw matinumanen ha suluguen hi Cristo pinaagi hu pagbulig din inyu.

Colosas 1:9

Aman sugud su mapaliman day haena hurà kay gayed endà hu pag-ampù mahitenged inyu. Taghangyuen day duun hu Dios ha matun-an nuy gayed sa agkabayaan din pinaagi hu kaalam daw hu pagsabut ha napuun duun hu Balaan ha Ispiritu

Colosas 4:9

Sa duma hi Tiquico iyan si Onesimo sa kasaligan daw palangga taw ha suled ha tagadiyan ta inyu. Iyan en sidan manunultul hu alan ha agkaula-ula day dini.

1 Tesalonica 5:23

Sa Dios ha tag-ila hu kalinaw maghimpit inyu ta daw harì kaw gayed asem masaway ku lumikù si Cristo Jesus ha Ginuu taw.

Filemon 1:23

Agpangamusta ikaw si Epafras sa duma ku ha naprisu daan tumenged hu pagtuu din ki Cristo Jesus.

Hebreo 5:14

Ba saena ha magulang pakatuen en ku inu sa maayad daw sa madaet. Iling haena hu etaw ha pakaalap en hu madesen ha kalan-enen.

Hebreo 5:7

Su dini pa si Jesus ta kalibutan mig-ampù ha ta hinangyù hu madaging tag-agalà din sa Dios ha malibri ngaay hu kamatayen. Tumenged hu pagkamatinumanen din duun hu Dios napaliman sa pag-ampù din.

Santiago 1:1

Iyan a si Santiago ha suluguen hu Dios daw hi Cristo Jesus ha Ginuu sa migsulat taini. Kamusta kaw sinyu sa mga etaw hu Dios ha nakagsusuwayà duun hu bisan hindu.

Santiago 1:4

Ku maantus nuy iyan haena makapahamtung inyu ta daw mahimpit kaw gayed.

Santiago 5:16

Aman magpasinugidà kaw hu mga salà nuy daw mag-inampuay kaw daan ta daw maulian kaw, ta sa pag-ampù hu etaw ha matareng amin gayed duun gahem.

2 Pedro 1:1

Iyan a si Simon Pedro ha suluguen daw apustul hi Cristo Jesus sa migsulat taini. Sinulatan ku inyu sa amin din pagtuu ha iling kamahal hu kanay ha pagtuu pinaagi ki Cristo Jesus sa matareng ha Dios daw Manluluwas taw.

Judas 1:24

Sa Dios magbantay inyu ta daw harì kaw mahulug duun hu salà daw ku ipaatubang kaw kandin asem malipayen kaw gayed ta hurà ikasaway inyu.