Raaghyn Creeney 17:17 - Yn Vible Casherick 1775 1819

¹⁷ Ta carrey dooie ec dy chooilley hraa: agh t’eh myr dty vraar-ruggit ayns earish dty heaghyn.

Raaghyn Creeney 17:17 ပူးပေါင်းရင်းမြစ်များ

2 Samuel 1:26

Ta mee seaghnit er dty hon, my vraar Yonathan: s’dooie t’ou er ny ve dou, as graihagh orrym: as dty ghraih er my hon’s yindyssagh, erskyn graih mraane.

2 Samuel 15:21

As dreggyr Ittai yn ree, as dooyrt eh, Myr ta’n Chiarn bio, as myr ta my hiarn y ree bio, son shickyrys, raad erbee dy bee my hiarn y ree, lhig eh ve ayns baase ny bioys, dy feer, ayns shen myrgeddin vees dty harvaant.

Esther 4:14

Son my vees oo ooilley-cooidjagh dty host ec y traa shoh, eisht nee feaysley as livrey-ys da ny Hewnyn troggal veih boayl elley, agh bee uss as thie dty ayrey er nyn stroie: as quoi ec ta fys, nagh vel oo er jeet gys y reeriaght, cour lheid y traa shoh?

Raaghyn Creeney 16:28

Ta’n er-connyssagh cuirr anvea, as ta’n scammyltagh jannoo scarrey eddyr eer caarjyn.

Raaghyn Creeney 18:24

Eshyn ta caarjyn echey, shegin da jeeaghyn eh-hene myr carrey: as ta carrey ayn lhiannys hood ny s’chenney na braar erbee.

Raaghyn Creeney 19:13

Ta ommydan dy vac seaghyn e ayrey: as ta beealerey dy ven myr faarn kinjagh ayns thie.

Raaghyn Creeney 19:7

Ta deiney-mooinjer y voght ooilley dy choyrt cooyl rish: cre-woad smoo ta e chaarjyn goll foddey veih? t’eh geiyrt orroo lesh e ghoan, agh cha vel geill oc da.

Hebrewnee 2:11

Son ta chammah eshyn ta casherickey, as adsyn ta er nyn gasherickey, ooilley jeh’n un chynney: shen-y-fa cha gow eh nearey dy ghoaill roo son braaraghyn.

Ruth 1:16

As dooyrt Ruth, Ny jean m’y hionney dy hreigeil oo, as dy gholl roym: son raad erbee dy jed uss, hem’s mayrt; as raad nee uss aaght y ghoaill, goyms myrgeddin aaght: bee’n pobble ayd’s, yn pobble aym’s, as y Jee ayd’s, my Yee’s:

1 Samuel 18:3

Eisht ren Jonathan as David conaant ry-cheilley, er-yn-oyr dy bynney lesh eh myr e annym hene.

1 Samuel 19:2

Agh v’ec Jonathan mac Saul lane taitnys ayns David: as dinsh Jonathan da David, gra, Ta Saul m’ayr shirrey dy dty varroo: nish er-y-fa shen, ta mee guee ort, gow kiarail jeed hene derrey’n voghrey, as fuirree ayns ynnyd follit, as jean oo-hene y cheiltyn:

1 Samuel 19:3

As hem’s magh as shass-ym liorish my ayr ’sy vagher raad t’ou follit, as loayr-ym rish m’ayr my-dty-chione; as cre-erbee yioym magh insh-ym dhyt.

1 Samuel 20:17

As hug Jonathan er David dy heet harrish e vreearrey reesht, er-yn-oyr dy bynney lesh eh: son dy bynney lesh eh myr e annym hene.

1 Samuel 23:16

As hie Jonathan mac Saul gys David ’sy cheyll, as ren eh e laue y niartaghey ayns Jee.