Psalmyn 4:1 - Yn Vible Casherick 1775 1819

¹ Clasht rhym tra ta mee geamagh, O Yee my chairys: t’ou er choyrt feaysley dooys tra va mee ayns seaghyn; jean myghin orrym, as eaisht rish my phadjer.

Psalmyn Ghavid 1761 (Metrical)

¹ O Yee, my vriw, m’er chosnee cair, Jean myghin orrym, Hiarn, Veih seaghyn hug oo dou livrey, As ta mee foast er-mayrn.

Lioar ny Psalmyn 1765 (Pointed)

¹ Clasht rhym tra ta mee geamagh, O Yee my chairys: t’ow er choyrt feaysley dooys tra va mee ayns seaghyn; jean myghin orrym, as eaisht rish my phadjer.

Psalmyn 4:1 ပူးပေါင်းရင်းမြစ်များ

Lioar Yob 36:16

Eer myr shen veagh eh er scughey uss ass y chennid gys reamys, raad nagh row chennid erbee; as veagh gien dty voayrd jeant magh lesh slane meeaylys.

Psalmyn 11:7

Er ny mee-chrauee deayrtee eh ribbaghyn, aile as brimstone, sterrym as dorrin: shoh vees y cronney ocsyn dy iu.

Psalmyn 116:16

Eeck-ym my vreearraghyn gys y Chiarn, ayns fenish ooilley e phobble: ayns cooyrtyn thie yn Chiarn, dy jarroo, ayns y vean ayd’s, O Yerusalem. Moylley-jee yn Chiarn.

Psalmyn 116:6

Ta’n Chiarn coadey adsyn ta gyn-loght: va mish ayns seaghyn, as chooin eh lhiam.

Psalmyn 119:132

O jeeagh orrym, as bee myghinagh dou: myr boallagh oo jannoo roosyn ta graihagh er dt’ennym.

Psalmyn 143:2

As ny gow er dty hoshiaght gys briwnys rish dty harvaant: son ayns dty hilley’s cha bee dooinney erbee bio er ny heyrey.

Psalmyn 17:6

Ta mee er n’eamagh ort, O Yee, son nee oo m’y chlashtyn: croym dty chleaysh hym, as eaisht rish my ghoan.

Psalmyn 22:1

My Yee, my Yee, jeeagh orrym; cre’n-fa t’ou er my hreigeil: as t’ou choud veih my lhaynt, as veih goan my accan?

Psalmyn 24:5

Yiow eshyn yn bannaght veih’n Chiarn: as cairys veih Jee e haualtys.

Psalmyn 25:16

Ta trimshey my chree er ny vishaghey: O cur uss lhiat mee ass my heaghyn.

Psalmyn 31:8

Bee’m gennal, as nee’m boggey ’ghoaill ayns dty vyghin: son t’ou er choyrt tastey da my heaghyn, as er chooinaghtyn er my annym ayns treihys.

Psalmyn 41:12

As tra ta mee ec my lhaynt, t’ou dy my chummal seose: as nee oo m’y hoiaghey kiongoyrt rish dt’eddin er son dy bragh.

Psalmyn 42:1

Myr ta’n feeaïh shirrey lurg ny strooanyn ushtey: myr shen ta m’annym goaill foddeeaght dty yeï’s, O Yee.

Psalmyn 45:1

Ta my chree smooinaghtyn dy dowin er cooish vie: ta mee goaill lesh bingys ny arraneyn ta mee er n’yannoo mychione y ree.

Psalmyn 56:1

Bee myghinagh dooys, O Yee, son ta dooinney shirrey dy my stroie: t’eh gagh laa caggey as dy my heaghney.

Psalmyn 57:1

Bee myghinagh dooys, O Yee, bee myghinagh dou, son ta m’annym treishteil aynyd: as fo scaa dty skianyn vees my chemmyrk derrey vees y tranlaase shoh er n’gholl shagh-ym.

Psalmyn 6:1

O Hiarn, ny cur oghsan dooys ayns dty chorree: chamoo smaghtee mee ayns dty yymmoose.

Psalmyn 67:1

Dy row Jee myghinagh dooin, as dy bannee eh shin: as soilshey e eddin y yeeaghyn dooin, as dy row eh myghinagh dooin.

Psalmyn 76:1

Ayns Judea ta enney er ny choyrt er Jee: ta’n ennym echey mooar ayns Israel.

Isaiah 45:24

Dy firrinagh nee fer gra, Ayns y Chiarn ta aym ynrickys as niart: eer huggeysyn nee deiney cheet; as bee ooilley ny ta fargagh n’oï er nyn goyrt gys nearey.

Jeremiah 23:6

Rish y lhing echeysyn vees Judah er ny hauail, as nee Israel cummal ayns sauchys; as shoh yn ennym vees cowrit er, YN CHIARN YN YNRICKYS AINYN.

Habakkuk 3:19

Ta’n Chiarn Jee my niart, as nee eh my chassyn myr cassyn feeaïh, as ver eh orrym shooyl er my ynnydyn ard. Gys yn ard-chiaulleyder er my ghreïnyn strengit.

1 Corinthianee 1:30

Agh jehsyn ta shiuish ayns Creest Yeesey eshyn ta liorish Jee er ny yannoo dooinyn creenaght, as cairys, as casherickys, as livrey-ys:

2 Corinthianee 1:10

Eh ren livrey shin veih baase cha dewil, as ta livrey shin: aynsyn ta shin treishteil dy jean eh foast livrey shin:

2 Corinthianee 1:8

Son cha baill-lhien, vraaraghyn, dy beagh eh gyn-yss diu cre’n seaghyn haink orrin ayns Asia, dy row shin laadit ass towse erskyn nyn niart, ayns wheesh as nagh row veg y jerkal ain dy heet jeh lesh nyn mioys:

1 Samuel 17:37

Dooyrt David ny-sodjey, Yn Chiarn ren mish y livrey ass croag y lion, as veih croag y vuc-awin, eshyn nee m’y livrey ass laue yn Philistine shoh. As dooyrt Saul rish David, Gow er dty hoshiaght, as y Chiarn dy row mayrt.