Nehemiah 8:9 - Yn Vible Casherick 1775 1819

⁹ As Nehemiah, ta shen yn Tirshatha, as Ezra yn saggyrt yn scrudeyr, as ny Leviteyn dynsee yn pobble, dooyrt ad roo ooilley, Ta’n laa shoh casherick gys y Chiarn yn Jee eu, ny jean-jee dobberan ny keayney: son huitt ooilley yn pobble er keayney, tra cheayll ad goan y leigh.

Nehemiah 8:9 ပူးပေါင်းရင်းမြစ်များ

2 Reeaghyn 22:11

As haink eh gy-kione, tra va’n ree er chlashtyn goan lioar y leigh, dy raip eh e choamraghyn.

2 Reeaghyn 22:19

Er-yn-oyr dy row dty chree meiygh, as dy vel oo er injillaghey oo-hene kiongoyrt rish y Chiarn, tra cheayll oo shen ny loayr mee noi yn ynnyd shoh, as noi ny cummaltee echey, dy darragh ad dy ve nyn draartys as mollaght, as dy raip oo dty choamrey, as dy cheayn oo kiongoyrt rhym; ta mee myrgeddin er chlashtyn oo, ta’n Chiarn dy ghra.

2 Recortyssyn 15:3

Nish son foddey dy hraa ta Israel er ve fegooish y Jee firrinagh, as fegooish saggyrt-ynsee, as fegooish y leigh.

2 Recortyssyn 30:22

As loayr Hezekiah dy gerjoilagh rish ooilley ny Leviteyn, va cur er y hoshiaght tushtey mie yn Chiarn: as dreill ad seose gien y feailley slane shiaghtin, chebbal ourallyn-shee, as coyrt moylley da’n Chiarn, Jee nyn ayraghyn.

2 Recortyssyn 34:19

As haink eh gy-kione, tra cheayll y ree goan y leigh, dy raip eh e choamraghyn.

2 Recortyssyn 34:21

Immee-jee, guee-jee gys y Chiarn er my hon’s, as er nyn son ocsyn ta faagit ayns Israel, as ayns Judah, er coontey goan y lioar, t’er ny gheddyn: son s’mooar ta jymmoose y Chiarn, t’er ny gheayrtey orrin, er-yn-oyr nagh vel nyn ayraghyn er vreayll goo’n Chiarn, cordail rish bree’n lioar shoh.

2 Recortyssyn 35:3

As dooyrt eh rish ny Leviteyn, dynsee ooilley Israel, kys v’ad dy chasherickey ad hene gys y Chiarn, Cur-jee yn arg casherick ayns y thie, ren Solomon mac Ghavid ree Israel y hroggal: nagh beagh eh ny errey er nyn geayltyn: ta shiu nish dy yannoo shirveish elley da’n Chiarn nyn Yee, as da e phobble Israel,

Ezra 2:63

As dooyrt yn Tirshatha roo, nagh row ad dy ghoaill ayrn ayns ny reddyn smoo casherick, derrey hassagh seose saggyrt lesh Urim as Thummim.

Ezra 7:11

Nish shoh copy jeh’n screeuyn hug Artaxerxes y ree da Ezra, yn saggyrt, yn scrudeyr, eer scrudeyr ayns goan annaghyn y Chiarn, as e lattyssyn da Israel.

Nehemiah 10:1

Nish shoh adsyn ren sealal, Nehemiah yn Tirshatha, mac Hachaliah, as Zidkijah,

Nehemiah 12:26

V’ad shoh ayns lhing Yoiakim, mac Yeshua, mac Yozadak, as ayns lhing Nehemiah yn kiannoort, as Ezra yn saggyrt, yn scrudeyr.

Nehemiah 7:65

As dooyrt y Tirshatha roo, nagh row eh lowit dauesyn dy ghoaill ayrn ayns ny nheeghyn smoo casherick, derrey hroggagh seose saggyrt lesh Urim as Thummim.

Nehemiah 7:70

As ren paart jeh ard-gheiney ny kynneeyn stowal cour yn obbyr: hug y Tirshatha gys y stoyr, thousane peesh dy airh, jeih claareeyn as da-eed, queig cheead as jeih as feed dy choamraghyn-saggyrt.

Nehemiah 8:2

As hug Ezra yn saggyrt lesh y leigh kiongoyrt rish y cheshaght chammah dy gheiney as mraane, as ooilley ny va ec eash dy hoiggal, er y chied laa jeh’n chiaghtoo vee.

Ecclesiastes 3:4

Traa son keayney, as traa son garaghtee: traa son dobberan, as traa son daunsin:

Isaiah 61:3

Dy chur caghlaa dauesyn ta dobberan ayns Zion, dy choyrt daue aalid son leoie, yn ooil dy yennallys son dobberan, coamrey dy voylley son spyrryd dy hrimshey; dy vod ad ve enmyssit Biljyn dy chairys, Plantal y Chiarn, dasyn dy ve er ny ghloyraghey.

Hosea 4:6

Ta my phobble’s goll naardey son laccal tushtey: son dy vel uss er n’yiooldey rish tushtey, jioold-yms myrgeddin rhyt’s, nagh bee oo ny-sodjey son saggyrt dooys: fakin dy vel oo er yarrood leigh dty Yee’s, neem’s myrgeddin yn chloan ayd’s y yarrood.

Leviticus 23:24

Loayr rish cloan Israel, gra, Ayns y chiaghtoo vee, er y chied laa jeh’n vee, bee doonaght eu, sheidey trumpetyn son imraa; bee shoh meeiteil casherick.

Malachi 2:13

As shoh ta shiu er n’yannoo myrgeddin, coodaghey altar y Chiarn lesh jeïr, lesh dobberan, as lesh osnaghyn; ayns wheesh as nagh vel eh soiaghey jeh nyn ourallyn ny smoo, chamoo t’eh goaill eh lesh aigney-mie ec nyn laueyn.

Romanee 3:20

Shen-y-fa liorish obbraghyn y leigh cha bee dooinney erbee er ny heyrey ayns e hilley: son liorish y leigh ta toiggal ain jeh peccah.

Romanee 7:9

Son va mish dy jarroo bio un cheayrt fegooish y leigh; agh tra haink yn anney, vio-ee peccah, as va mish marroo.

Deuteronomy 12:12

As nee shiu boggey ’ghoaill kiongoyrt rish y Chiarn nyn Yee, shiu hene, as nyn mec, as nyn inneenyn, nyn fir-vooinjerey, as nyn inneenyn-veyl, as y Levite t’er cheu-sthie jeh dty yiattyn; er-yn-oyr nagh vel echeysyn ayrn ny eiraght erbee mêriu.

Deuteronomy 12:7

As ayns shen nee shiu gee kiongoyrt rish y Chiarn y Jee eu, as nee shiu boggey ’ghoaill ayns ooilley ny ta shiu coyrt nyn laue huggey, shiu hene as y vooinjer eu, lesh shen ta’n Chiarn dty Yee er dty vannaghey.

Deuteronomy 16:11

As nee oo boggey ’ghoaill kiongoyrt rish y Chiarn dty Yee, uss, as dty vac, as dty inneen, as dty er-mooinjerey, ad dty inney-veyl, as y Levite t’er cheu-sthie jeh dty yiattyn, as y joarree, as y lhiannoo gyn ayr, as y ven-treoghe ta ny mast’ eu, ’syn ynnyd nee’n Chiarn dty Yee y reih dy choyrt e ennym ayn.

Deuteronomy 26:14

Cha vel mee er n’ee jeu ayns my ghobberan, chamoo ta mee er ghoaill veg jeu ersooyl son ymmyd erbee neu-ghlen; chamoo ta mee er vaarail veg jeu son ny merriu: agh ta mee er n’eaishtagh rish coraa’n Chiarn my Yee, as ta mee er n’yannoo cordail rish ooilley ny t’ou er harey dou.

Jamys 4:9

Bee-jee seaghnit, as jean-jee dobberan as keayney: lhig da’n gharaghtee eu ve chyndaït gys dobberan, as y reaïd eu gys trimshey.