Leviticus 2:9 - Yn Vible Casherick 1775 1819

⁹ As nee’n saggyrt goaill veih’n oural-arran sample jeh, as shen y lostey er yn altar: ta shoh oural jeant lesh aile dy hoar millish gys y Chiarn.

Leviticus 2:9 ပူးပေါင်းရင်းမြစ်များ

Exodus 29:18

As nee oo lostey yn slane rea er yn altar; oural-losht eh gys y Chiarn; te ny hoar millish, ny oural chebbit lesh aile gys y Chiarn.

Isaiah 53:10

Foast ve aigney yn Chiarn dy choyrt er surranse; t’eh er laadey eh lesh trimshey: tra nee oo yn annym echey ny oural son peccah, ver eh my-ner e luight, bee e laghyn beayn, as nee taitnys yn Chiarn bishaghey fo e laue.

Leviticus 1:9

Agh y mynnagh as e chassyn nee eh niee lesh ushtey: as loshtee yn saggyrt ooilley er yn altar, dy ve oural-losht, chebbal jeant lesh aile, dy hoar millish da’n Chiarn.

Leviticus 2:16

As nee’n saggyrt lostey yn sample jeh, ayrn jeh’n arroo bwoailt, as ayrn jeh’n ooil, marish ooilley’n frankincense: ta shoh chebbal jeant lesh aile gys yn Chiarn.

Leviticus 2:2

As ver eh lesh shen gys ny saggyrtyn mec Aaron: as nee fer jeu goaill ass lane e ghurn jeh’n flooyr, as jeh’n ooil marish ooilley yn frankincense; as nee’n saggyrt lostey ayrn jeh son cowrey er yn altar, dy ve oural jeant lesh aile gys yn Chiarn.

Leviticus 2:8

As ver oo lhiat yn oural-arran, ta dy ve jeant jeh ny reddyn shoh, gys y Chiarn: as tra te er ny choyrt da’n saggyrt, ver eshyn lesh eh gys yn altar.

Leviticus 24:7

As ver uss frankincense ghlen er dagh coorse, dy vod eh ve er yn arran son imraa, eer oural jeant lesh aile gys y Chiarn.

Leviticus 4:31

As nee eh goaill ass ooilley’n eeh, myr ta’n eeh er ny scarrey veih’n oural-casherick son shee; as nee yn saggyrt shen y lostey er yn altar son soar millish gys y Chiarn: as nee yn saggyrt lhiasaghey ’yannoo er e hon; as bee eh er ny leih da.

Leviticus 5:12

Eisht ver eh lesh eh gys y taggyrt, as nee’n saggyrt goaill lane e ghurn jeh, eer sample jeh, as shen y lostey er yn altar, myr ny ourallyn jeant lesh aile gys y Chiarn: oural-peccah t’ayn.

Leviticus 6:15

As nee eh goaill lane e ghurn jeh flooyr yn oural-arran, as jeh’n uill echey, as ooilley’n frankincense t’er yn oural-arran, as shen y lostey er yn altar, son cowrey dy hoar millish da’n Chiarn.

Zechariah 13:7

Dooisht, O chliwe, noi my vochilley, as noi yn dooinney ta my heshey, ta Chiarn ny flaunyssee dy ghra: bwoaill yn bochilley, as bee ny kirree er ny skeayley: as chyndaa-ym my laue er y vyn-vooinjer.

Zechariah 13:9

As ver-ym lhiam yn trass ayrn trooid yn aile, as nee’m ad y ghlenney myr ta arroo er ny ghlenney, as nee’m ad y phrowal myr ta airh er ny phrowal: as nee ad geamagh er my ennym’s, as nee’m ad y chlashtyn: as jir-ym, T’adsyn my phobble: as jir adsyn, Ta’n Chiarn my Yee.

Earrooyn 5:26

As nee’n saggyrt goaill lane doarn jeh’n chebbal, va dy vrah yn chooish, as lostey eh er yn altar, as lurg shen ver eh er y ven dy iu’n ushtey.

Romanee 12:1

Ta mee guee erriu er-y-fa shen, vraaraghyn, liorish myghinyn Yee, dy jean shiu chebbal nyn gallinyn myr oural bio, casherick, booisal gys Jee, ta’n chirveish resoonagh eu.

Romanee 15:16

Dy beign’s shirveishagh Yeesey Creest gys ny Ashoonee, shirveish sushtal Yee, dy voddagh soiagh ve jeant jeh ny Ashoonee chebbit seose son oural, er ny chasherickey liorish y Spyrryd Noo.

Ephesianee 5:2

As immee-jee ayns graih, myr ta Creest myrgeddin er chur graih dooinyn, as er choyrt eh-hene er nyn son, chebbal as oural son soar millish da Jee.

Philippianee 2:17

As, dy jarroo, my vees m’uill’s er ny gheayrtey magh er oural as shirveish y chredjue euish, ta mee dy my gherjaghey, as goaill boggey mêriu ooilley.

Philippianee 4:18

Agh ta dy liooar aym, as er y phalchey: ta mee jeant magh, neayr’s hooar mee veih Epaphroditus shen hug shiu hym, chebbal dy hoar millish, oural booisal, lheid as nee Jee soiaghey jeh.