Leviticus 15:5 - Yn Vible Casherick 1775 1819

⁵ As fer erbee vennys rish e lhiabbee, lhig da niee e eaddagh, as faarkey eh hene ayns ushtey, as ve neu-ghlen derrey’n astyr.

Leviticus 15:5 ပူးပေါင်းရင်းမြစ်များ

Leviticus 11:25

As quoi-erbee hroggys lesh veg jeh’n challin oc, shegin da niee e choamrey, as bee eh neu-ghlen derrey’n astyr.

Leviticus 17:15

As dy chooilley annym, ta gee shen hooar baase jeh hene, ny va raipit ec beishtyn (edyr eh ve fer jeh’n cheer eu hene, ny joarree) nee eh niee e eaddagh, as faarkey eh hene ayns ushtey, as ve neu-ghlen derrey’n astyr; eisht bee eh glen.

Leviticus 16:26

As nee eshyn, lhig y raad da’n ghoayr-scaapit, niee e eaddagh, as faarkey e chorp ayns ushtey, as ny lurg shen hig eh stiagh ’sy champ.

Ashlish 7:14

As dooyrt mee rish, Ayd’s ta fys, my Hiarn. As dooyrt eh rhym, Shoh adsyn haink ass seaghyn mooar, as t’er niee nyn goamraghyn, as er ghiallaghey ad liorish fuill yn Eayn.

Jamys 4:8

Tayrn-jee er-gerrey gys Jee, as tayrnee eshyn er-gerrey diuish: niee-jee nyn laueyn, shiuish pheccee, as glen-jee nyn greeaghyn, shiuish dy aigney ghooble.

Hebrewnee 10:22

Lhig dooin tayrn er-gerrey lesh cree firrinagh, ayns slane shickyrys dy chredjue, liorish nyn greeaghyn v’er nyn ghlenney veih drogh chooinsheanse, as nyn girp er nyn niee lesh ushtey glen.

Hebrewnee 9:26

(Son eisht beign da v’er hurranse dy mennick er-dy hoshiaght y theihll) agh nish un cheayrt son ooilley ayns ny eashyn s’jerree, t’eh er hoilshaghey eh-hene dy chur ersooyl peccah liorish jannoo eh-hene ny oural.

Hebrewnee 9:14

Cre-woad smoo nee fuill Chreest, ren eh-hene y oural gyn foill gys Jee trooid y Spyrryd dy bragh beayn, yn chooinsheanse euish y ghlenney veih obbraghyn marroo dy hirveish y Jee bio?

Ezekiel 36:29

As neem’s myrgeddin livrey shiu veih ooilley loght nyn neu-ghlennid, as ver-yms sarey da’n arroo dy ve er ny vishaghey, as cha jean-ym shiu y smaghtaghey lesh gortey.

Ezekiel 36:25

Eisht spreih-yms shiu lesh ushtey glen, as bee shiu er nyn ghlenney veih ooilley nyn mroïd, as veih ooilley ny jallooyn eu neem’s shiuish y ghlenney.

Isaiah 22:14

Agh ve er ny ockley ayns my chleayshyn liorish Chiarn ny flaunyssee, Son shickyrys cha bee shiu er ny heyrey veih’n vee-chairys shoh, derrey yiow shiu baase, ta’n Chiarn, Jee ny flaunyssee, dy ghra,

Isaiah 1:16

Niee-jee, jean-jee glen; cur-jee ersooyl olk nyn yannoo veih my hooillyn; scuirr-jee veih’n drogh-yannoo;

Psalmyn 51:7

Nee oo mish y ghlenney lesh hyssop, as bee’m glen: nee oo m’y niee, as bee’m ny s’gilley na sniaghtey.

Psalmyn 51:2

Niee mee dy bollagh veih m’olkys: as glen mee veih my pheccah.

Psalmyn 26:6

Niee-ym my laueyn ayns ônid, O Hiarn: as myr shen hem gys dty altar;

Earrooyn 19:22

As cre-erbee vennys y persoon neu-ghlen rish, bee eh neu-ghlen: as bee’n annym vennys rish neu-ghlen derrey’n astyr.

Earrooyn 19:10

As nee eshyn ta chymsaghey leoie’n cholbagh, niee e eaddagh, as bee eh neu-ghlen derrey’n astyr: as bee shoh da cloan Israel, as da’n joarree ta cummal ny mast’ oc, son slattys kinjagh.

Leviticus 16:28

As nee eshyn ta lostey ad, niee e eaddagh, as faarkey e chorp ayns ushtey, as ny lurg shen hig eh stiagh ’sy champ.

Leviticus 14:27

As nee’n saggyrt spreih lesh e chorrag kuse jeh’n ooil, t’ayns e laue chiare, shiaght keayrtyn, fenish y Chiarn.

Leviticus 13:34

As er y chiaghtoo laa, nee’n saggyrt jeeaghyn er y boayl carragh: as cur-my-ner, mannagh vel y charrid er skeayley ’sy chrackan, ny ayns shilley, ny s’diuney na’n chrackan; eisht nee’n saggyrt eh y vriwnys glen: as nee eh niee e eaddagh, as bee eh glen.

Leviticus 13:6

As jeeaghee yn saggyrt er reesht, yn chiaghtoo laa er-giyn: as cur-my-ner, my ta keint dy ghooïd er y boayl doghanit, as nagh vel eh er skeayley ayns y chrackan: nee’n saggyrt briwnys eh glen: cha vel eh agh y screb: as lhig da niee e eaddagh, as bee eh glen.

Leviticus 11:32

As er cre-erbee nee veg jeu tuittym, as ad marroo, bee shen neu-ghlen; edyr eh ve saagh-fuygh, ny coamrey, ny crackan, ny sack; saagh erbee t’er ny ve ayns ymmyd, te dy ve currit ayns ushtey, as bee eh neu-ghlen derrey’n astyr: myr shen vees eh er ny ghlenney.

Leviticus 11:28

As eshyn hroggys y challin oc, lhig da niee e eaddagh, as bee eh neu-ghlen derrey’n astyr: t’ad neu-ghlen diu.

Exodus 19:10

As dooyrt y Chiarn rish Moses, Immee gys y pobble, as jean ad y chasherickey jiu as mairagh, as lhig daue niee nyn eaddagh:

Leviticus 15:4

Bee dagh lhiabbee t’eh lhie er neu-ghlen: as bee cre-erbee t’eh soie er neu-ghlen.

Leviticus 15:6

As quoi-erbee hoie-ys er red erbee hoie yn doghanagh er, lhig da niee e eaddagh, as faarkey eh hene ayns ushtey, as ve neu-ghlen derrey’n astyr.

1 Samuel 20:26

Agh cha lhig Saul veg er y laa shen: son smooinee eh, Ta red ennagh er daghyrt da, cha vel eh glen; shickyr t’eh fo neu-ghlennid y leigh.

Leviticus 11:24

Son lioroo shoh bee shiu neu-ghlen: quoi-erbee vennys rish y chorp marroo oc, bee eh neu-ghlen derrey’n astyr.

Leviticus 15:18

Yn ven myrgeddin, nee dooinney lhie mâree, nee ad ny-neesht faarkey ad hene ayns ushtey, as ve neu-ghlen derrey’n astyr.