Joshua 3:7 - Yn Vible Casherick 1775 1819

⁷ As dooyrt y Chiarn rish Joshua, Jiu nee’m toshiaght dy yannoo uss ooasle ayns shilley ooilley Israel, dy vod fys ve oc, myr va mee marish Moses, myr shen dy bee’m mayrt’s.

Joshua 3:7 ပူးပေါင်းရင်းမြစ်များ

1 Recortyssyn 29:25

As ren y Chiarn Solomon y hoiaghey seose dy ard ayns sooillyn ooilley Israel, as stow eh er lheid y ooashley reeoil as nagh row ec ree erbee va roish ayns Israel.

2 Recortyssyn 1:1

As va Solomon mac Ghavid er ny niartaghey ayns e reeriaght, as va’n Chiarn e Yee mârish, soiaghey seose eh dy ard ayns pooar as ooashley.

Lioar Yob 7:17

Cre ta dooinney dy by-feeu lhiat streeu rish, as dy hoiaghey dty chree n’oï?

Psalmyn 18:35

T’ou er choyrt dooys fendeilys dy haualtys: nee dty laue yesh neesht m’y chummal seose, as nee dty smaght graihagh mish y yannoo mooar.

Noo Ean 17:1

Ny goan shoh loayr Yeesey; as hrog eh seose e hooillyn gys niau, as dooyrt eh, Ayr, ta’n oor er jeet; jean dty Vac y ghloyraghey, dy vod dty Vac myrgeddin uss y ghloyraghey.

Philippianee 1:20

Cordail rish my yerkal jeean, as my hreishteil, nagh bee nearey orrym ayns nhee erbee, agh lesh dy chooilley ghunnallys, myr dy kinjagh, myr shen nish myrgeddin dy bee Creest er ny ghloyraghey ayns my chorp, edyr eh ve liorish bioys ny baase.

Joshua 1:17

Myr hug shin biallys da Moses ayns dy chooilley nhee, myr shen nee mayd geaishtagh rhyt’s: as dy row yn Chiarn dty Yee mayrt, myr v’eh marish Moses.

Joshua 1:5

Cha bee dooinney erbee abyl dy hassoo royd ooilley laghyn dty vea: myr va mee marish Moses, shen myr bee’m mayrt’s: cha jean-ym failleil, ny treigeil oo.

Joshua 1:9

Nagh nee mish t’er choyrt sarey dhyt? Bee dunnal as creeoil; ny bee aggle ort, chamoo bee mettey: son ta’n Chiarn dty Yee mayrt cre-erbee yn raad t’ou chyndaa.

Joshua 3:6

As loayr Joshua rish ny saggyrtyn, gra, Trog-jee seose arg y chonaant, as gow-jee shiuish harrish roish y pobble. As hrog ad arg y chonaant, as jimmee ad roish y pobble.

Joshua 3:8

As ver oo currym da ny saggyrtyn ta gymmyrkey arg y chonaant, as jir oo, Tra vees shiu er jeet gys oirr awin Yordan, nee shiu shassoo sthill ayns Jordan.

Joshua 4:14

Er y laa shen ren y Chiarn soiaghey seose Joshua ayns ard-ooashley fenish ooilley Israel; as v’ad arrymagh da, myr v’ad arrymagh da Moses, ooilley laghyn e vea.