Joshua 3:15 - Yn Vible Casherick 1775 1819

¹⁵ As myr v’adsyn va gymmyrkey yn arg er jeet gys Jordan, as dy goan va cassyn ny saggyrtyn va gymmyrkey yn arg er roshtyn gys oirr ny hawin, (son ta Jordan gatt harrish ooilley e vrooinyn slane imbagh ny fouyr),

Joshua 3:15 ပူးပေါင်းရင်းမြစ်များ

2 Reeaghyn 2:6

As dooyrt Elijah rish, Fuirree, ta mee guee ort, ayns shoh; son ta’n Chiarn er my choyrt gys Jordan. As dooyrt eh, Myr ta’n Chiarn bio, as myr ta dt’annym bio, cha vaag-ym oo. As hie ad ny-neesht er nyn doshiaght.

1 Recortyssyn 12:15

Shoh adsyn hie harrish Jordan ayns y chied vee, tra va’n thooilley er lhieeney harrish ooilley e brooinyn; as deiyr ad ersooyl ooilley cummaltee ny coanyn, chammah shiar as sheear.

1 Recortyssyn 12:16

As haink sheshaght dy chloan Venjamin, as Yudah, gys y charrick raad va David.

Isaiah 26:6

Nee’n cass stampey sheese eh, dy jarroo cassyn ny boghtyn, as kesmadyn ny ymmyrchee.

Jeremiah 12:5

My t’ou er roie rish coshee, as t’ad er n’yannoo skee jeed, kys eisht oddys oo cummal magh rish cabbil? as my t’ou tooillit oc ’sy thalloo sheaynt, raad va dty haitnys, eisht cre nee oo ayns thooillaghyn Yordan?

Jeremiah 49:19

Cur-my-ner, hig eh seose myr lion veih brooinyn Yordan noi ynnyd-vaghee yn treanagh: agh ver-yms er dy leah cur cooyl r’ee; as quoi ta’n reih dooinney dunnal dooys dy endeil ee? son quoi ta casley rhym’s? as quoi nee pointeil traa dou? as quoi yn bochilley shen nee shassoo roym?

Nahum 1:4

T’eh coyrt oghsan da’n vooir, as jannoo eh chirrym, as chyrmaghey seose ooilley ny awinyn: ta Bashan shymley ersooyl, as Carmel, as ta blaa Lebanon fioghey.

Joshua 3:13

As hig eh gy-kione, cha leah’s nee boyn-coshey ny saggyrtyn ta gymmyrkey arg y Chiarn, Chiarn ooilley’n seihll, shassoo ayns ushtaghyn Yordan, dy bee ushtaghyn Yordan er ny scarrey veih ny ushtaghyn t’er cheu heose; as nee ad shassoo myr voalley.

Joshua 4:18

As haink eh gy-kione, tra va ny saggyrtyn va gymmyrkey arg conaant y Chiarn er jeet seose ass mean Yordan, as (dy goan) va boyn-coshey ny saggyrtyn er roshtyn gys y thalloo chirrym, dy ren ushtaghyn Yordan chyndaa gys nyn ynnyd hene, as gatt harrish ooilley e vrooinyn, myr v’ad roïe.