Joshua 24:18 - Yn Vible Casherick 1775 1819

¹⁸ As ren y Chiarn geiyrt magh roïn ooilley’n pobble, eer ny Amoriteyn cummaltee’n cheer: shen-y-fa nee mayd myrgeddin shirveish y Chiarn; son eshyn y Jee ain.

Joshua 24:18 ပူးပေါင်းရင်းမြစ်များ

Psalmyn 116:16

Eeck-ym my vreearraghyn gys y Chiarn, ayns fenish ooilley e phobble: ayns cooyrtyn thie yn Chiarn, dy jarroo, ayns y vean ayd’s, O Yerusalem. Moylley-jee yn Chiarn.

Exodus 10:2

As dy vod uss ginsh ayns clashtyn dty vac, as cloan dty chlienney, cre ny reddyn yindyssagh ta mee er n’obbraghey ayns Egypt, as my chowraghyn ta mee er hoilshaghey ny mast’ oc, dy vod fys ’ve euish, dy nee mish y Chiarn.

Exodus 15:2

Ta’n Chiarn my niart as my arrane, hug eh dou livrey-ys: eshyn my Yee, as trog-yms cummal casherick da; Jee my ayraghyn, as ver-ym ooashley da.

Exodus 23:31

As neem’s soiaghey dty chagleeyn veih’n Faarkey Jiarg eer gys faarkey ny Philistinee, as veih faasagh [Arabia] gys awin [Euphrates;] son neem’s cummaltee yn cheer y livrey gys nyn laue, as nee’m ad y imman magh royd.

Micah 4:2

As hig ymmodee ashoonee, as jir ad, Tar-jee as lhig dooin goll seose gys slieau y Chiarn, as gys thie Jee Yacob, as nee eh gynsaghey shin ayns e raaidyn, as nee mayd shooyl ayns e chesmadyn: as hed yn leigh magh ass Zion, as goo yn Chiarn voish Jerusalem.

Zechariah 8:23

Myr shoh ta Chiarn ny flaunyssee dy ghra, Ayns ny laghyn shen hig eh gy-kione, dy jean jeih deiney ass dy chooilley ghlare jeh ny ashoonee greme y ghoaill, eer greme er yn rumbyl echeysyn ta ny Hew, gra, Hed mayd mêriu: son ta shin er chlashtyn dy vel Jee mêriuish.

Jannoo 7:45

As hug ny ayraghyn ain, haink ny yeï, lhieu stiagh eh marish Joshua, gys cheer ny Hashoonee, deiyr Jee magh veih fenish ny ayraghyn ain, gys laghyn Ghavid;

Deuteronomy 10:21

Eshyn dty voylley, as eshyn y Jee ayd, t’er n’yannoo er dty hon ny reddyn mooarey as atchimagh shoh, ta dty hooillyn er vakin.

Deuteronomy 33:27

Ta’n Jee t’er ve er-dy-rieau dty chemmyrk, as ta e roihaghyn dy bragh farraghtyn dy dty ymmyrkey: as eiyree eh magh yn noid kiongoyrt rhyt, as gra, Stroie ad.

Joshua 23:9

Son ta’n Chiarn er n’eebyrt magh reue ashoonyn mooar as lajer: agh er ny son euish, cha row dooinney erbee abyl shassoo reue gys y laa shoh.

Joshua 24:17

Son y Chiarn y Jee ain, eshyn eh hug lesh shinyn as nyn ayraghyn ass cheer Egypt, veih thie ny bondiaght, as ren ny cowraghyn mooarey shen y hoilshaghey ’sy chilley ain, as ren nyn goadey ayns ooilley’n raad ren shin troailt, as mastey ooilley’n pobble ny hrooid oc hie shin.

Joshua 24:19

As dooyrt Joshua rish y pobble, Cha vod shiu shirveish y Chiarn: son t’eh ny Yee casherick; t’eh ny Yee eadolagh; cha leih eh diu nyn mee-viallys, ny nyn beccaghyn.