Joshua 2:11 - Yn Vible Casherick 1775 1819

¹¹ As cha leah’s cheayll shin ny reddyn shoh, ren ny creeaghyn ain lheïe, chamoo va veg y vree ayns dooinney erbee, kyndagh riuish: son y Chiarn yn Jee eu, t’eh ny Yee ayns niau heose, as er y thalloo wass.

Joshua 2:11 ပူးပေါင်းရင်းမြစ်များ

1 Reeaghyn 8:60

Dy vod fys ’ve ec ooilley’n seihll dy nee’n Chiarn y Jee, as nagh vel Jee erbee elley.

2 Reeaghyn 5:15

As hyndaa eh gys y dooinney dy Yee, eshyn as ooilley e heshaght, as haink eh, as hass eh kiongoyrt rish: as dooyrt eh, Cur-my-ner, ta fys aym nish nagh vel Jee erbee ayns ooilley’n seihll agh ayns Israel: nish er-y-fa shen, ta mee guee ort, gow bannaght veih dty harvaant.

Nehemiah 6:16

As haink eh gy-kione, tra cheayll ooilley nyn noidyn jeh shoh, as tra honnick ny ashoonee va mygeayrt-y-mooin, kys hie shin er, chaill ad dy bollagh nyn gree: son hoig ad, dy row laue yn Jee ain ’syn obbyr shoh.

Esther 8:17

As ayns dy chooilley rheam, as ayns dy chooilley ard-valley, raad erbee dy daink sarey as decree yn ree, va boggey as gennallys, cuirraghyn as laa dy yien mie: as haink ymmodee jeh pobble y cheer harrish gys credjue ny Hewnyn: as v’ad ayns aggle roish ny Hewnyn.

Psalmyn 102:15

Nee ny ashoonyn aggle y ghoaill roish dt’Ennym, O Hiarn: as ooilley reeaghyn y theihll roish dt’Ard-ooashley;

Psalmyn 22:14

Ta mee deayrtit magh myr ushtey, as ta ooilley my chraueyn ass ynnyd: ta my chree neesht ayns mean my chorp eer myr kere ta lheïe.

Psalmyn 58:7

Lhig daue lheïe ersooyl myr crammag, as ve goll-rish mess ben ta er jeet roish y traa: as ny lhig daue fakin y ghrian.

Psalmyn 83:18

As bee fys oc, dy nee uss ta’n ennym ayd Jehovah: yn ynrycan Er smoo syrjey harrish ooilley yn seihll.

Exodus 15:14

Clynnee yn pobble, as bee aggle orroo; nee seaghyn greimmey cummaltee Phalestina.

Exodus 15:15

Shen y traa vees atchim er dukeyn Edom; er deiney niartal Voab gowee creau atchimagh greme; hed nyn dappey veih ooilley cummaltee Chanaan.

Isaiah 13:7

Shen-y-fa bee dy chooilley laue faiynt, as nee cree dy chooilley ghooinney lheïe ersooyl:

Isaiah 19:1

Errey Egypt. Cur-my-ner, ta’n Chiarn markiagh er bodjal bieau, as hig eh gys Egypt; as bee jallooyn Egypt tilgit bun-ry-skyn ec yn enish echey, as cree Egypt nee lheïe ersooyl cheu-sthie jeh.

Ezekiel 21:15

Ta mee er hoiaghey baare y chliwe noi ooilley nyn yiattyn, dy chur er nyn gree ve faiynt, as nyn dhieyn ayns ymmodee tholtanyn: aless, te er ny yannoo sollys, te shleeuit cour stroie.

Nahum 2:10

T’ee follym, as feayn, as faasagh, as ta’n cree faitagh, as ta ny glioonyn bwoalley noi-ry-hoi, as ta guin ghyere ayns ooilley nyn meeghyn, as ta neeal y dorraghys er dy chooilley eddin.

Deuteronomy 1:28

Cre’n-fa hem mayd seose? ta nyn mraaraghyn er choyrt shin ass cree, gra, Ta’n sleih ny s’troshey, as ny s’thollee na shinyn; ta ny ard-valjyn oc mooar as voallit seose gys niau, as ta shin, marish shoh, er vakin ayn mec Anak.

Deuteronomy 20:8

As nee ny leeideilee loayrt ny-sodjey rish y cheshaght, as jir ad, Dooinney erbee ta aggle er, as lhag-chreeagh, lhig da goll roish gys e hie, nagh lhaggee eh cree e vraaraghyn, myr y cree echey hene.

Deuteronomy 4:39

Toig, er-y-fa shen yn laa shoh, as gow gys dty chree, dy vel yn Chiarn ny Yee ayns niau heose, as er y thalloo wass: cha vel Jee erbee elley.

Joshua 14:8

Ny-yeih my heshaghyn hie seose mârym hug ad y pobble ass cree: agh dreill mish dy chion gys y Chiarn my Yee.

Joshua 2:24

As dooyrt ad rish Joshua, Dy feer ta’n Chiarn er livrey ooilley yn cheer gys ny laueyn ain; son ta eer ooilley cummaltee ny cheerey coayl nyn gree ayns aggle roïn.

Joshua 5:1

As haink eh gy-kione, tra va ooilley reeaghyn ny Amoriteyn, v’ayns naboonys Yordan er cheu-heear, as ooilley reeaghyn ny Canaaniteyn, v’er slyst ny marrey, er chlashtyn dy row yn Chiarn er hyrmaghey seose ushtaghyn Yordan roish cloan Israel, derrey v’ad er n’gholl harrish, dy ren ny creeaghyn oc gannooinaghey, chamoo va bree ayndoo veg sodjey, kyndagh rish cloan Israel.

Joshua 7:5

As ren deiney Ai mysh shey deiney jeig as feed jeu y varroo: son deiyr ad orroo veih’n yiat dy jarroo gys Shebarim, as varr ad jeu myr v’ad goll sheese: shen-y-fa ren creeaghyn y pobble lheïe ersooyl, as v’ad lhag myr ushtey.

Joshua 9:24

As dreggyr ad Joshua, as dooyrt ad, Son dy row eh er ny insh da dty harvaantyn son firrinys, dy row yn Chiarn dty Yee er harey e harvaant Moses dy choyrt diuish ooilley’n cheer shoh, as dy stroie dy bollagh ooilley cummaltee ny cheerey, shoh’n oyr va shin ayns aggle baaish reue, as shoh ta shin er n’yannoo.

Ashlish 6:16

As dooyrt ad rish ny sleityn as ny creggyn, Tuitt-jee orrin, as follee shin veih’n eddin echeysyn ta ny hoie er y stoyl-reeoil, as veih corree yn Eayn: