Joshua 11:6 - Yn Vible Casherick 1775 1819

⁶ As dooyrt y Chiarn rish Joshua, Ny gow aggle roue: son mysh y traa shoh mairagh, neem’s livrey ooilley ad seose marroo kiongoyrt rish Israel: nee oo feh-yskid nyn gabbil y yiarey, as lostey ny fainee oc ’syn aile.

Joshua 11:6 ပူးပေါင်းရင်းမြစ်များ

2 Samuel 8:4

As ghow David veihsyn thousane fainagh, as shiaght thousane markee, as feed thousane coshee: as yiare David feh-yskid ooilley ny cabbil fainee, agh haue eh keead jeu son whilleen fainagh.

2 Reeaghyn 6:16

As dreggyr eh, Ny bee aggle ort; son t’adsyn ta mârin ny s’troshey na adsyn ta mâroosyn.

2 Recortyssyn 20:16

Mairagh gow-jee sheese nyn ’oï: cur-my-ner, t’ad cheet seose raad liargagh Ziz, as hee shiu ad ec kione y choan, liorish faasagh Jeruel.

Psalmyn 46:10

Bee-jee feagh eisht, as toig-jee dy vel mish Jee: beem’s er my hoiaghey seose mastey ny ashoonyn, as bee’m er my hoiaghey seose er y thalloo.

Psalmyn 46:11

Ta’n Jee dy heshaght-chaggee flaunys mârin: she Jee Yacob nyn gemmyrk.

Psalmyn 46:9

T’eh cur er caggaghyn dy scuirr ayns ooilley yn seihll: t’eh brishey yn bow, as giarey yn shleiy dy peeshyn, as lostey ny fainaghyn ’syn aile.

Raaghyn Creeney 20:7

Ta dooinney cairal shooyl ayns e ynrickys: ta e chloan bannit ny yeï.

Isaiah 30:16

Son dooyrt shiu, Cha jean mayd shen; agh nee mayd chea er cabbil; shen-y-fa nee shiu chea: as, Markee mayd er baagh gastey; shen-y-fa bee adsyn gastey hed nyn eiyrt’s.

Isaiah 31:1

Smerg dauesyn ta goll sheese gys Egypt son cooney, as coyrt nyn marrant er cabbil, as treishteil ayns fainee, er-yn-oyr dy vel ad ymmodee; as ayns markee, son dy vel ad feer lajer! agh cha vel ad jeeaghyn gys Jee casherick Israel, chamoo t’ad shirrey yn Chiarn.

Ezekiel 39:9

As hed cummaltee ard-valjyn Israel magh, as ver ad er aile, as loshtee ad ny greinyn-caggee, chammah ny scapeyn, as ny buckleryn, ny bowghyn as ny sideyn, as ny lorgyn-laue, as ny shleiyghyn, bee ad son aile daue dy lostey, shiaght bleeaney.

Hosea 14:3

Cha jean Ashur sauail shin, cha jean mayd markiaght er cabbil, chamoo jir mayd arragh rish obbyr ny laueyn ain hene, Shiuish ny jeeghyn ain: son aynyd’s ta’n chloan gyn ayr geddyn myghin.

Nahum 2:13

Cur-my-ner, ta mish dt’oï, ta Chiarn ny flaunyssee dy ghra, nee’m lostey ny fainee eck ’syn aile, as nee yn cliwe stroie dty lionyn aegey, as nee’m giarey jeh dty spooilley jeh’n thalloo, as cha bee coraa dty haghteryn arragh er ny chlashtyn.

Deuteronomy 7:16

As nee oo stroie ooilley ny ashoonyn, nee’n Chiarn dty Yee y livrey hood: cha bee chymmey ec dty hooill orroo: chamoo nee oo shirveish ny jeeghyn oc; son bee shen ny ribbeh dhyt.

Joshua 10:8

As dooyrt y Chiarn rish Joshua, Ny gow aggle roue; son ta mee er livrey ad gys dty laue; cha shass dooinney jeu royd.

Joshua 11:5

As tra va ooilley ny reeaghyn shoh er jeet cooidjagh, haink ad as champ ad lesh y cheilley liorish ushtaghyn Merom, dy chaggey noi Israel.

Joshua 11:7

Er shoh haink Joshua as ooilley ny deiney-caggee mârish doaltattym orroo ec ushtaghyn Merom, as hie ad laue roo.

Joshua 11:9

As ren Joshua roo myr doardee yn Chiarn da: yiare eh feh-yskid nyn gabbil, as losht eh nyn vainee lesh aile.

Joshua 3:5

As dooyrt Joshua rish y pobble, Jean-jee shiu hene y chasherickey: son mairagh nee yn Chiarn mirrilyn ny-vud eu.

Briwnyn 20:28

As she Phinehas, mac Eleazar, mac Aaron, va shirveish kiongoyrt rish ec y traa cheddin,) as dooyrt ad, Jig eh lhiam dy chaggey reesht noi cloan Venjamin my vraar, ny jean-ym goaill fea? As dooyrt y Chiarn, Gow seose; son mairagh livrey-ym ad gys dty laue.

Briwnyn 7:9

As haink eh gy-kione yn oie cheddin, dy dooyrt y Chiarn rish, Trog ort, as immee sheese gys y cheshaght-chaggee shoh; son ta mish er livrey ad gys dty laue.

1 Samuel 11:9

As dooyrt ad rish ny chaghteryn, Shoh myr jir shiu rish deiney Yabesh-gilead, Mairagh, mysh y vun-laa, yiow shiu cooney. As haink ny chaghteryn, as hoilshee ad shoh da deiney Yabesh; as ghow ad cree.