Joshua 1:7 - Yn Vible Casherick 1775 1819

⁷ Ynrycan bee jeh cree mie as feer dunnal, dy vod oo cur tastey dy yannoo cordail rish ooilley’n leigh hug Moses my harvaant ayns currym dhyt: ny chyndaa veih gys y laue yesh ny gys y laue hoshtal, dy vod oo bishaghey cre-erbee yn raad t’ou goll.

Joshua 1:7 ပူးပေါင်းရင်းမြစ်များ

1 Reeaghyn 2:2

Ta mee goll raad ooilley’n seihll: bee uss dunnal er-y-fa shen, as jeeagh oo-hene dty ghooinney;

1 Reeaghyn 2:3

As freill sarey yn Chiarn dty Yee, dy hooyl ayns e raaidyn, dy reayll e lattyssyn, as e annaghyn, as e vriwnyssyn, as e recortyssyn, myr te scruit ayns leigh Voses, dy vod oo bishaghey ayns ooilley ny t’ou dy yannoo, as cre theihll y raad t’ou chyndaa oo-hene.

2 Reeaghyn 22:2

As ren eh shen ny va cairagh ayns shilley yn Chiarn, as jimmee eh ayns slane raad Ghavid e ayr, as cha hyndaa eh dy lhiattee gys y laue yesh ny gys y laue chiare.

1 Recortyssyn 22:13

Eisht nee oo bishaghey, my vees oo imneagh, dy chooilleeney ny slattyssyn as ny briwnyssyn shen, hug y Chiarn ayns currym da Moses mychione Israel: bee creeoil as dunnal; ny gow aggle, ny caill dty chree.

2 Recortyssyn 15:7

Bee-jee dunnal er-y-fa shen, as ny bee-jee lhag-laueeagh: son bee nyn obbyr er ny chooilleeney.

2 Recortyssyn 26:5

As hir eh lurg Jee ayns laghyn Zechariah, va tushtagh ayns ashlishyn Yee: as choud as hirveish eh yn Chiarn, hug Jee er dy vishaghey.

Lioar Yob 1:8

As dooyrt y Chiarn rish Satan, Vel oo er chur-my-ner my harvaant Job, nagh vel fer erbee goll-rish er y thalloo, dooinney slane ynrick as jeeragh, ta goaill aggle roish Jee, as shaghney olk?

Psalmyn 80:19

Chyndaa shin reesht, O Hiarn Yee jeh’n cheshaght-chaggee flaunyssagh: jeeagh soilshey dt’eddin, as bee mayd er nyn sauail.

Raaghyn Creeney 4:27

Ny chyndaa gys y laue yesh, ny gys y laue hoshtal: scugh dty chass veih’n olk.

Raaghyn Creeney 8:20

Mish y leeideilagh ayns raad yn ynrickys, ayns ny cassanyn jeeragh dy vriwnys.

Daniel 10:19

As dooyrt eh, O ghooinney ard-ennoil, ny bee aggle ort, shee dy row hood, bee er dty gherjaghey, as bee eer er dty niartaghey. As tra v’eh er loayrt rhym, va mee er my niartaghey, as dooyrt mee, Lhig da my hiarn loayrt; son t’ou er my niartaghey.

Earrooyn 27:23

As lhie eh e laueyn er, as livrey eh da e churrym, myr hug y Chiarn sarey, liorish laue Voses.

Deuteronomy 11:8

Nee shiu, er-y-fa shen, freayll ooilley ny annaghyn ta mee dy harey diu yn laa jiu, dy vod shiu ve dunnal, as goll stiagh dy ghoaill possession jeh’n cheer, huggey ta shiu er y raad dy gheddyn eiraght ayn:

Deuteronomy 12:32

Cre-erbee ta mee dy harey diu, gow-jee tastey dy yannoo eh: cha der shiu veg huggey, ny veg y ghoaill veih.

Deuteronomy 28:14

As cha jyndaa oo dy lhiattee, veih veg jeh ny goan ta mee dy harey dhyt jiu, gys y laue yesh, ny gys y laue chiare, dy gholl geiyrt er jeeghyn elley dy hirveish ad.

Deuteronomy 29:8

As ghow shin y cheer oc, as hug shin eh son eiraght da ny Reubeniteyn, as da ny Gaditeyn, as da lieh-tribe Vanasseh.

Deuteronomy 29:9

Freill-jee, er-y-fa shen, goan y chonaant shoh, as jean-jee ad, dy vod dy chooilley nhee, ta shiu dy yannoo, cheet lhieu.

Deuteronomy 31:7

As deïe Moses er Joshua, as dooyrt eh rish, ayns clashtyn ooilley Israel, Bee lajer as dunnal; son shegin dhyt’s goll marish y pobble shoh gys y cheer, ta’n Chiarn er vreearrey da nyn ayraghyn dy choyrt daue: as ver uss ad ayns possession.

Deuteronomy 4:2

Cha jean shiu nhee erbee y choyrt huggey, ny goaill voish y goo ta mee dy harey diu, dy vod shiu freayll annaghyn y Chiarn nyn Yee, ta mish dy harey diu.

Deuteronomy 5:32

Nee shiuish, er-y-fa shen, kiarail y ghoaill, dy yannoo myr ta’n Chiarn er harey diu: cha jyndaa shiu dy lhiattee gys y laue yesh, ny gys y laue chiare.

Joshua 1:1

Nish lurg baase Voses sharvaant y Chiarn haink eh gy-kione, dy loayr y Chiarn rish Joshua mac Nun, shirveishagh Voses, gra,

Joshua 1:8

Bee’n lioar shoh jeh’n leigh dy kinjagh ayns dty veeal; as bee dty smooinaghtyn dowin ayn oie as laa, dy vod oo tastey y ghoaill dy yannoo cordail rish ooilley ny ta scruit ayn: son eisht hig dty chooishyn dy mie lhiat, as bee oo er dty vannaghey.

Joshua 1:9

Nagh nee mish t’er choyrt sarey dhyt? Bee dunnal as creeoil; ny bee aggle ort, chamoo bee mettey: son ta’n Chiarn dty Yee mayrt cre-erbee yn raad t’ou chyndaa.

Joshua 11:15

Myr hug y Chiarn currym er Moses e harvaant, shen myr hug Moses currym er Joshua, as shen myr ren Joshua; cha daag eh veg giare jeh ooilley ny va’n Chiarn er harey da Moses.

Joshua 23:6

Bee-jee shiuish er-y-fa shen feer dunnal, dy reayll as dy chooilleeney ooilley ny ta scruit ayns lioar leigh Voses, nagh jyndaa shiu dy lhiattee veih gys y laue yesh ny gys y laue hoshtal;