Joel 2:32 - Yn Vible Casherick 1775 1819

³² As hig eh gy-kione, quoi-erbee eïe-ys er ennym y Chiarn, dy bee eh er ny hauail: son ayns cronk Zion, as ayns Jerusalem vees saualtys, myr ta’n Chiarn er ghra, as cour y fooilliagh nee yn Chiarn y reih.

Joel 2:32 ပူးပေါင်းရင်းမြစ်များ

Genesis 4:26

As da Seth myrgeddin va mac er ny ruggey; as denmys eh eh Enos: eisht ghow deiney toshiaght dy enmys ad hene lurg ennym y Chiarn.

Psalmyn 50:15

As eïe orrym’s ayns traa dy heaghyn: myr shen neem’s geaishtagh rhyt, as nee oo mish y voylley.

Isaiah 10:22

Son ga dy vel dty phobble Israel myr genniagh ny marrey, foast nee fooilliagh jeu chyndaa: bee yn kerraghey ta kiarit er ny chooilleeney ayns myghin.

Isaiah 11:11

As hig eh gy-kione ayns y laa shen, dy jean y Chiarn soiaghey e laue yn nah cheayrt dy chosney sluight e phobble vees faagit, veih Assyria, as veih Egypt, as veih Pathros, as veih Cush, as veih Elam, as veih Shinar, as veih Hamath, as veih ellanyn yn aarkey.

Isaiah 11:16

As bee raad-mooar son sluight e phobble vees faagit veih Assyria; myr ve da Israel ’sy laa haink eh seose veih cheer Egypt.

Isaiah 4:2

Bee banglane y Chiarn ayns y laa shen aalin as gloyroil, as bee mess y thallooin kenjal as stoamey da scapailtee Israel.

Isaiah 46:13

Ver-ym lhiam my ynrickys er-gerrey; cha bee eh foddey jeh, as cha jean my haualtys cumrail; as soie-yms saualtys ayns Zion cour Israel my ghloyr.

Jeremiah 31:7

Son myr shoh ta’n Chiarn dy ghra, Gow-jee arrane lesh gennallys son Jacob, as trog-jee seose nyn goraa mastey ny ard-ashoonyn: insh-jee magh eh, cur-jee moylley, as abbyr-jee, O Hiarn, saue dty phobble, ta er-mayrn jeh Israel.

Jeremiah 33:3

Eïe orrym’s, as nee’m oo y reggyrt, as jeeagh-ym dhyt reddyn mooarey as yindyssagh, nagh vel toiggal ad jeu.

Amos 9:8

Cur-my-ner, ta sooillyn y Chiarn Jee soit noi yn reeriaght peccoil, as ver-ym naardey ad er eaghtyr y thallooin; agh ny-yeih, cha jean-ym dy bollagh stroie thie Yacob, ta’n Chiarn dy ghra.

Obadiah 1:17

Agh ayns cronk Zion vees livrey-ys, as ayns shen vees casherickys, as nee thie Yacob cosney reesht ny cummallyn oc hene.

Obadiah 1:21

As hig saualtee seose er cronk Zion, dy vriwnys cronk Esau, as bee yn reeriaght lesh y Chiarn.

Micah 5:3

Shen-y-fa, ver eh ad seose, derrey t’eeish ta er-troailt er n’ymmyrkey: eisht nee yn chooid elley jeh e vraaraghyn chyndaa reesht gys cloan Israel.

Zechariah 13:9

As ver-ym lhiam yn trass ayrn trooid yn aile, as nee’m ad y ghlenney myr ta arroo er ny ghlenney, as nee’m ad y phrowal myr ta airh er ny phrowal: as nee ad geamagh er my ennym’s, as nee’m ad y chlashtyn: as jir-ym, T’adsyn my phobble: as jir adsyn, Ta’n Chiarn my Yee.

Noo Ean 10:16

As kirree elley t’aym, nagh vel jeh’n woaillee shoh: ad shen neesht shegin dou y chur lhiam, as cluinnee ad my choraa; as bee un woaillee ayn, as un vochilley.

Noo Ean 4:22

Ta shiuish cur ooashley da, cha s’eu cre: ta fys ainyn cre ta shin cur ooashley da; son ta saualtys jeh ny Hewnyn.

Jannoo 15:17

Dy vod y Chiarn v’er ny hirrey magh liorish y chooid elley jeh deiney [Israel] as liorish ooilley ny Ashoonee, ta enmyssit orrym, ta’n Chiarn gra, ta jannoo dy chooilley nhee jeu shoh.

Jannoo 2:39

Son ta’n gialdyn diuish as da nyn gloan, as dauesyn ooilley ta foddey jeh, dy jarroo da whilleen as vees er nyn eam liorish nyn Jiarn Jee.

Romanee 11:26

As myr shen bee ooilley Israel er nyn sauail: myr te scruit, Hig saualtagh ass Sion, as chyndaa-ee eh ersooyl mee-chraueeaght voish Jacob.

Romanee 11:5

Dy jarroo myr shen ec yn eer traa shoh myrgeddin ta fooilliagh ayn cordail rish y conaant dy ghrayse.

Romanee 11:7

Cre eisht? Cha vel Israel er roshtyn gys shen v’eh shirrey er y hon; agh ta’n fooilliagh reiht er chosney eh, as va’n chooid elley er nyn greoghey:

Romanee 9:24

Dy jarroo shinyn t’eh er n’eam, cha nee jeh ny Hewnyn ny-lomarcan, agh jeh ny Ashoonee myrgeddin.

Romanee 9:27

Ta Esaias myrgeddin fockley magh mychione Israel, Ga dy vel earroo cloan Israel myr geinnagh ny marrey, bee fooilliagh er ny hauail.

1 Corinthianee 1:2

Gys agglish Yee ta ec Corinth, hucsyn t’er nyn gasherickey ayns Creest Yeesey, er nyn eam dy ve nyn nooghyn mâroosyn ooilley ta ayns dy chooilley ynnyd geamagh er ennym Yeesey Creest, chammah yn Chiarn ocsyn as ainyn.

Hebrewnee 12:22

Agh ta shiuish er jeet gys cronk Sion, as gys ard-valley yn Jee bio, yn Jerusalem flaunyssagh, as gys sheshaght erskyn earroo dy ainleyn.