Joel 2:20 - Yn Vible Casherick 1775 1819

²⁰ Agh scugh-ym foddey veue sheshaght-caggee yn twoaie, as eiyr-ym eh gys cheer gennish as follym-faase, lesh e eddin gys yn aarkey shiar, as e chooyl gys yn aarkey sodjey magh, as hig e vreinid seose, as nee drogh hoar troggal jeh, son t’eh er n’ymmyrkey eh-hene dy mooaralagh.

Joel 2:20 ပူးပေါင်းရင်းမြစ်များ

2 Reeaghyn 8:13

As dooyrt Hazael, Ny lhig eh Jee: vel oo goaill dty harvaant dy ve moddey, mee dy yannoo lheid yn olk mooar shoh? As dreggyr Elisha, Ta’n Chiarn er hoilshaghey dooys dy bee uss dty ree harrish Syria.

Psalmyn 126:3

Shen y traa dooyrt ad mastey ny ashoonee: Ta’n Chiarn er n’yannoo reddyn mooarey er ny son oc.

Exodus 10:19

As hyndaa yn Chiarn yn gheay mygeayrt gys y neear, feer lajer as niartal, ren sheebey ersooyl ny locustyn, as ad y cheau ayns yn Aarkey Jiarg: cha row un locust faagit ayns ooilley ardjyn Egypt.

Exodus 8:14

As ren ad chaglym ad cooidjagh ayns dashyn, as va soar breinn jeu fud y cheer.

Isaiah 34:3

Bee ny merriu oc myrgeddin ceaut magh, as hig y soar oc seose veih nyn girp, as bee ny sleityn taal lesh yn uill oc.

Ezekiel 47:18

As y lhiattee-har nee shiu towse veih Hauran, as veih Damascus, as veih Gilead, as veih thalloo Israel rish Jordan, veih’n oirr gys yn aarkey-har; as shoh yn lhiattee-har.

Amos 4:10

Ta mee er choyrt ny mast’ eu yn chramp, myr hug mee eh er Egypt: ny deiney aegey eu ta mee er varroo lesh y chliwe, as er ghoaill ersooyl ny cabbil eu, as ta mee er choyrt er smoghan ny campyn dy heet seose gys ny stroanyn eu: ny-yeih cha vel shiu er hyndaa hym’s, ta’n Chiarn dy ghra.

Zechariah 14:8

As ayns y laa shen, hed ushtaghyn bio magh veih Jerusalem: yn derrey lieh jeu gys y cheayn har, as y lieh elley jeu gys y cheayn heear: ’sy tourey as ’sy yeurey vees shoh.

Malachi 3:11

As nee’m yn stroider y chastey er y ghraih euish, nagh jean eh stroie messyn y thallooin: chamoo nee yn billey-feeyney tilgey yn mess eck ayns y vagher roish e traa, ta Chiarn ny flaunyssee dy ghra.

Deuteronomy 11:24

Lhieuish vees dy chooilley ynnyd ver shiu boyn nyn goshey er: veih’n aasagh, as Lebanon, veih’n awin, awin Euphrates, choud as yn aarkey sodjey magh, vees nyn gagliagh.