Jeremiah 8:7 - Yn Vible Casherick 1775 1819

⁷ S’feer eh, dy vel y stork ’syn aer goaill baght jeh ny imbaghyn dooghyssagh; as ta’n turtle, as y choar, as gollan-geayee, freayll gys y traa t’ad ry-hoi cheet; agh cha vel my phobble’s cur veg y gheill da briwnys y Chiarn.

Jeremiah 8:7 ပူးပေါင်းရင်းမြစ်များ

Arrane Solomon 2:12

Ta ny blaaghyn ry-akin er y thalloo, ta imbagh kiaulleeaght ny ushagyn er jeet, as ta bingys yn turtle er ny chlashtyn ’sy cheer ain.

Isaiah 1:3

Shione da’n dow yn er s’liesh eh, as yn assyl cratch e vainshtyr: agh cha nhione da Israel mish, cha vel my phobble smooinaghtyn orrym.

Isaiah 27:11

Tra ta ny banganyn echey fiojit, bee ad er nyn mrishey jeh: ta ny mraane cheet as cur aile orroo; son she pobble mee-cheeayllagh ad: shen-y-fa eshyn chroo ad, cha jean eh myghin orroo, as eshyn ren ad y chiaddey, cha jeeagh eh veg y foayr daue.

Isaiah 5:12

As ta’n chlaasagh as y viol, yn tabret as y feddan, as feeyn, ayns nyn guirraghyn agh cha vel geill oc da jannoo yn Chiarn, chamoo t’ad smooinaghtyn er obbyr e laueyn.

Jeremiah 4:22

Son ta my phobble ommijagh, cha vel ad er chur enney orrym’s; t’ad cloan vee-cheeayllagh, as cha vel veg y toiggal oc: ta keeayll oc dy yannoo olk, agh dy yannoo mie cha vel oc veg y tushtey.

Jeremiah 5:6

Er-y-fa shen nee lion ass y cheyll adsyn y stroie, as nee moddey-oaldey ’syn astyr ad y raipey, nee leopard freayll arrey er ny ard-valjyn oc: bee dy chooilley unnane ta goll magh assdoo er ny raipey ayns peeshyn; er-yn-oyr dy vel y drogh-yannoo oc ymmodee, as y cooyl-skyrraghtyn oc goaill niart.

Habakkuk 1:4

Shen-y-fa ta’n leigh er ny lhaggaghey, as cha vel briwnys goll magh lesh bree: son ta ny mee-chrauee jannoo tranlaase er y vooinjer chairal: shen-y-fa ta briwnys aggairagh goaill niart.

Zechariah 5:9

Eisht hrog mee seose my hooillyn, as yeeagh mee, as cur-my-ner haink daa ven magh, as va’n gheay ayns ny skianyn oc (son va skianyn orroo myr skianyn stork) as hrog ad seose yn ephah eddyr niau as y thalloo.