Jeremiah 8:13 - Yn Vible Casherick 1775 1819

¹³ Ver-yms mow ad son shickyrys, ta’n Chiarn dy ghra: cha bee veg y vess er y villey-feeyney, ny figgyn er y villey-figgagh, as nee’n duillag fioghey; as nee’n chooid hug mee daue shymley ersooyl voue.

Jeremiah 8:13 ပူးပေါင်းရင်းမြစ်များ

Isaiah 5:10

Dy jarroo nee jeih acreyn dy gharey-feeyney gymmyrkey un bath, as nee rass homer gymmyrkey un ephah.

Jeremiah 14:12

Tra t’ad freayll trostey, cha n’eaisht-ym rish yn accan oc; as tra t’ad jannoo oural-losht as chebballyn, cha jean-ym soiaghey jeu; agh ver-ym mow ad lesh y chliwe, as lesh y ghortey, as lesh y chramp.

Jeremiah 14:15

Shen-y-fa shoh myr ta’n Chiarn dy ghra mychione ny phadeyryn ta jannoo phadeyrys ayns m’ennym’s, as nagh dug mee ad er y chaghteraght, ny-yeih t’ad gra, Cha bee cliwe ny gortey ’sy cheer shoh; Liorish y chliwe as y ghortey hed ny phadeyryn shoh er nyn stroie.

Jeremiah 17:8

Son bee eh myr billey soit rish oirr yn ushtey, as ta skeayley magh e fraueyn rish yn awin, as cha n’ennee eh tra ta’n chiass loshtee cheet, agh bee e ghuillag glass; as ’sy vleïn ghonney cha bee eh anveagh, chamoo nee eh scuirr veih gymmyrkey mess.

Jeremiah 5:17

As ee-ys ad seose yn troar ayd, as dty arran va kiarit son beaghey dty vec as dty inneenyn: nee ad gee seose dty hioltaneyn kirree as ollagh; nee ad gee seose messyn dty viljyn-feeyney as dty viljyn-figgagh: as dty ard-valjyn voallit, orroo v’ou cur dty varrant, ver ad naardey lesh y chliwe.

Jeremiah 7:20

Shen-y-fa shoh myr ta’n Chiarn Jee dy ghra, Cur-my-ner, bee my chorree as my eulys er ny gheayrtey magh er y voayl shoh, er dooinney, as er baagh, as er biljyn y vagheragh, as er mess y thallooin; as nee eh lostey, as cha bee eh er ny vooghey.

Ezekiel 22:31

Shen-y-fa ta mee er gheayrtey magh my yymmoose orroo, ta mee er chur mow ad lesh aile my eulys: nyn raad hene ta mee er chooilleeney er nyn ghing hene, ta’n Chiarn Jee dy ghra.

Hosea 2:12

As ver-ym naardey myrgeddin e biljyn-feeyney, as e biljyn-figgagh, my-nyn-gione t’ee er ghra, Ad shoh yn faill ta my gheiney-sooree er choyrt dou: as nee’m faasagh jeu, as bee ad son beaghey da maase y vagheragh.

Joel 1:7

T’eh er choyrt mow my villey-feeyney, as er roostey my villey-figgagh: t’eh er n’yannoo eh glen-lhome, as er yiarey sheese eh, ta ny banglaneyn echey bane-fiojit.

Leviticus 26:20

As bee’n niart eu baarit ayns fardail son cha jean y thalloo eu cur magh e bishagh, ny biljyn y thallooin nyn mess.

Habakkuk 3:17

Ga nagh der y billey-figgagh magh e vlaa, as nagh bee mess er ny biljyn-feeyney; dy jean foast yn billey-olive failleil, as nagh jean ny magheryn gymmyrkey beaghey: dy bee yn chioltane giarit jeh veih’n woaillee, as nagh bee dew ayns ny bwaneyn:

Haggai 1:11

As deïe mee son fowan er y thalloo, as er ny sleityn, as er yn arroo, as er y feeyn noa, as er yn ooil, as er dty chooilley nhee ta’n thalloo dy ymmyrkey, as er deiney, as er maase, as er slane troar y thallooin.

Haggai 2:17

Ren mee shiu y woalley lesh fowan, as lesh millchea, as lesh claghyn-sniaghtee ayns ooilley obbyr nyn laueyn, ny-yeih cha ren shiu chyndaa hym’s, ta’n Chiarn dy ghra.

Malachi 3:11

As nee’m yn stroider y chastey er y ghraih euish, nagh jean eh stroie messyn y thallooin: chamoo nee yn billey-feeyney tilgey yn mess eck ayns y vagher roish e traa, ta Chiarn ny flaunyssee dy ghra.

Noo Mian 21:19

As tra honnick eh billey-figgagh er y raad, haink eh huggey, as cha dooar eh monney er, agh ynrycan duillagyn, as dooyrt eh rish, Nar aase mess erbee ort’s veih shoh magh er son dy bragh. As chelleeragh ren y billey-figgagh fioghey ersooyl.

Jamys 1:11

Son cha vel y ghrian ny sleaie er n’irree lesh chiass loshtee, agh t’ee fioghey yn faiyr, as ta’n blaa echey tuittym, as aalid yn chummey echey goll naardey: myr shen myrgeddin nee yn dooinney berchagh shymley ersooyl ayns e raaidyn.