Jeremiah 7:20 - Yn Vible Casherick 1775 1819

²⁰ Shen-y-fa shoh myr ta’n Chiarn Jee dy ghra, Cur-my-ner, bee my chorree as my eulys er ny gheayrtey magh er y voayl shoh, er dooinney, as er baagh, as er biljyn y vagheragh, as er mess y thallooin; as nee eh lostey, as cha bee eh er ny vooghey.

Jeremiah 7:20 ပူးပေါင်းရင်းမြစ်များ

2 Reeaghyn 22:17

Er-yn-oyr dy vel ad er m’y hreigeil, as er lostey incense gys jeeghyn joarree, dy m’y vrasnaghey gys corree lesh ooilley obbraghyn nyn laueyn; shen-y-fa bee my yymmoose er ny ghreesagh noi yn ynnyd shoh, as cha bee eh er ny vooghey.

Isaiah 10:17

As bee soilshey Israel son aile, as e Er-casherick son lossey: as nee eh lostey as stroie e ghrineyn as e ghressyn ’syn un laa.

Isaiah 42:25

Shen-y-fa t’eh er gheayrtey magh orroo eulys e yymmoose, as dewilys yn chaggey; as hug eh aile er ooilley mygeayrt, ny-yeih cha dug eh geill da; as v’eh er ny lostey liorish, ny-yeih cha ghow eh shoh gys e chree.

Isaiah 66:24

As hed ad magh, dy yeeaghyn er kirp marroo ny deiney t’er n’irree-magh m’oï; son cha vow yn veishteig oc baase, chamoo vees yn aile oc er ny vooghey; as bee ad dwoaiagh da dy chooilley chretoor.

Jeremiah 11:16

Ren y Chiarn uss y enmys, Billey-olive glass, aalin, as lesh mess menoyr; lesh feiyr anveagh t’eh er voaddey aile er, as ta ny banglaneyn eck er ny vrishey.

Jeremiah 12:4

Caïd nee’n cheer dobberan, as glassyraght dy chooilley vagher fioghey, kyndagh rish mee-chraueeaght ny cummaltee? ta’n maase shymley ersooyl, as ny eeanlee; son dy dooyrt ad, Cha vel sooill echey er nyn raaidyn.

Jeremiah 14:16

As bee yn pobble daue t’ad phadeyrys er nyn dilgey magh ayns straïdyn Yerusalem, kyndagh rish y ghortey as y cliwe; as cha bee unnane erbee dy oanluckey ad, ad-hene, nyn mraane, ny nyn mec, ny nyn inneenyn; son neem’s kerraghey nyn mee-chraueeaght y gheayrtey magh orroo.

Jeremiah 17:27

Agh mannagh n’eaisht shiu rhym dy reayll yn doonaght casherick, as gyn laad y ymmyrkey, eer goll stiagh er giattyn Yerusalem er y doonaght; eisht neem’s aile y oaddey ayns ny giattyn eck; as nee eh plaaseyn Yerusalem y stroie, as cha bee eh er ny vooghey.

Jeremiah 17:4

As bee uss, dy jarroo oo hene, freilt magh ass dty eiraght hug mee dhyt; as ver-ym ort dy hirveish dty noidyn ayns cheer nagh nhione dhyt: son ta shiu er voaddey aile ayns my yymmoose, nee lostey son dy bragh.

Jeremiah 18:23

Ny-yeih, Hiarn, t’ou uss toiggal ooilley’n choyrle oc m’oï’s dy my stroie: ny jean yn vee-chairys oc y leih daue, chamoo cur y peccah oc ersooyl ass dty enish, agh lhig daue tuittym kiongoyrt rhyt’s: dell myr shoh roo ayns laa dty yymmoose.

Jeremiah 21:12

O hie Ghavid, myr shoh ta’n Chiarn dy ghra, Cur-jee briwnys cairagh ’sy voghrey, as livrey-jee eshyn ta tranlaasit ass laue yn tranlaasagh, er-aggle dy jed m’eulys magh myr aile, as lostey nagh vod unnane erbee y vooghey eh, kyndagh rish olkys nyn ghrogh-yannoo.

Jeremiah 42:18

Son myr shoh ta Chiarn ny flaunyssee, Jee Israel, dy ghra, Myr va my yymmoose as my eulys deayrtit magh er cummaltee Yerusalem; myr shen vees my eulys er ny gheayrtey magh erriuish, tra hed shiu gys Egypt: as bee shiu son ard-vollaght, as son atchim, as son mollaght-mynney, as son oltooan, as cha vaik shiu yn ynnyd shoh arragh.

Jeremiah 44:6

Shen-y-fa va my eulys as my chorree deayrtit magh, as foaddit er ard-valjyn Yudah, as ayns straïdyn Yerusalem; as t’ad naardey as mow, myr ec y laa jiu.

Jeremiah 6:11

Shen-y-fa ta mee lane jeh eulys y Chiarn; te pian dou dy lhiettal eh: deayrt-ym magh eh er y chloan dy lhean, as er co-chruinnaght ny deiney aegey; son bee eer y dooinney marish e ven goit ersooyl, eshyn t’ayns slane eash mârishyn ta lane dy laghyn.

Jeremiah 6:12

As bee ny thieyn oc er ny hyndaa harrish da feallagh elley, marish nyn magheryn as nyn mraane dy cheilley: son sheeyn-yms magh my laue er cummaltee’n cheer, ta’n Chiarn dy ghra.

Jeremiah 8:13

Ver-yms mow ad son shickyrys, ta’n Chiarn dy ghra: cha bee veg y vess er y villey-feeyney, ny figgyn er y villey-figgagh, as nee’n duillag fioghey; as nee’n chooid hug mee daue shymley ersooyl voue.

Dobberan 4:11

Ta’n Chiarn er chooilleeney e eulys, t’eh er gheayrtey magh dewilys e yymmoose, as er ghreesey aile ayns Zion, as t’eh er stroie ny undinyn eck.

Ezekiel 22:22

Myr ta’n argid lheït ayns mean y choirrey, myr shen bee shiuish lheït ayns y vean echey; as bee fys eu, dy nee mish y Chiarn t’er gheayrtey magh my eulys erriu.

Ezekiel 7:12

Ta’n traa er jeet, ta’n laa tayrn er-gerrey, ny lhig da’n kionneyder goaill boggey, ny’n creckeyder dobberan: son ta jymmoose er y slane sheshaght.

Ezekiel 7:14

T’ad er heidey yn trumpet, eer son ooilley dy ve aarloo, agh cha vel fer goll magh gys y chaggey: son ta my yymmoose er y slane ymmodee jeu.

Daniel 9:11

Dy jarroo, ta ooilley Israel er vrishey dty leigh, eer liorish goll er-shaghryn, nagh dug ad biallys da dty choraa, shen-y-fa, ta’n mollaght er ny gheayrtey orrin, as y breearrey ta scruit ayns leigh Voses shirveishagh Yee, er-yn-oyr dy vel shin er n’yannoo peccah n’oï.

Leviticus 26:28

Eisht beem’s nyn ’oï eu eer ayns dewlys: as mish, mee hene, nee shiuish y smaghtaghey shiaght keayrtyn smoo son nyn beccaghyn.

Nahum 1:6

Quoi oddys shassoo roish e eulys? as quoi oddys gymmyrkey fo elgys e yymmoose? ta e chorree deayrtit magh myr aile, as ta ny creggyn tilgit bun-ry-skyn liorishyn.

Zephaniah 1:2

Neem’s dy bollagh stroie dy chooilley nhee veih’n thalloo, ta’n Chiarn dy ghra.

Zephaniah 1:3

Stroie-yms dooinney as baagh: Stroie-yms eeanlee yn aer, as eeastyn ny marrey, as ceabyn snapperal ny mee-chrauee, as giare-yms jeh dooinney veih eaghtyr y thallooin, ta’n Chiarn dy ghra.

Zechariah 7:12

Dy jarroo ren ad nyn greeaghyn [cha creoi] as y chlagh adamant, nagh glinnagh ad yn leigh, as ny goan, ta Chiarn ny flaunyssee er choyrt ayns e spyrryd liorish ny chied phadeyryn: er-y-fa shen haink jymmoose vooar orroo voish Chiarn ny flaunyssee.

Malachi 4:1

Son cur-my-ner ta’n laa cheet nee lostey myr oghe, as bee ooilley ny mooaralee, as eer adsyn ta cur-rish olkys, myr y coau, as nee yn laa ta cheet ad y lostey seose, ta Chiarn ny flaunyssee dy ghra; myr shen nagh vaag eh daue, eddyr fraue ny banglane.

Noo Mian 3:12

Ta’n cleayst echey ayns e laue, as nee eh dy bollagh e laare-vooie y ghlenney, as gowee eh e churnaght stiagh ayns e hie-tashtee: agh loshtee eh yn choau lesh aile nagh bee er ny vooghey.

Ashlish 14:10

Nee’n fer cheddin giu jeh feeyn corree Yee, er ny lhieeney da gyn meenaghey dy vyghin, ayns cappan e yymmoose; as bee eh er ny horchaghey lesh aile as brimstone, kionfenish ny ainleyn casherick, as kiongoyrt rish yn Eayn: