Jeremiah 7:13 - Yn Vible Casherick 1775 1819

¹³ As nish er-yn-oyr dy vel shiuish er n’yannoo ooilley ny obbraghyn shoh, ta’n Chiarn dy ghra, as dy loayr mee riu, girree dy moghey as loayrt, agh nagh vel shiu er n’eaishtagh rhym; as dy vel mee er n’eamagh erriu, agh cha vel shiu er reggyrt;

Jeremiah 7:13 ပူးပေါင်းရင်းမြစ်များ

Raaghyn Creeney 1:24

Er-y-fa dy ren mish geamagh, as ren shiuish gobbal; ta mee er heeyney magh my laue, as cha dug dooinney erbee geill da.

Isaiah 50:2

Kys ve, tra haink mee, nagh row dooinney erbee? tra deïe mee, nagh ren fer freggyrt? Vel my laue cha giare shen, nagh voddym livrey? as nagh vel pooar aym dy hauail? cur-my-ner, ec my oghsan ta mee chyrmaghey seose yn aarkey, ta mee chyndaa ny awinyn gys faasagh: ta’n eeast oc breinnaghey laccal ushtey, as goll naardey ’sy chyrmid.

Isaiah 65:12

Shen-y-fa neem’s shiuish y earroo gys y chliwe, as nee shiu ooilley croymmey gys y toyrt-mow: son tra deïe mee, cha ren shiu freggyrt; tra loayr mee, cha ren shiu clashtyn; agh ren shiu olk roish my hooillyn, as ghow shiu myr reih shen nagh by-haittin lhiam.

Isaiah 66:4

Faag-yms ad myrgeddin fo yn shaghrynys oc hene, as ver-ym lhiam nyn aggle orroo; er-yn-oyr tra deïe mee, nagh ren fer hene freggyrt; tra loayr mee, cha ren ad clashtyn: agh ren ad olk roish my hooillyn, as reih ad shen nagh ghow mee taitnys ayn.

Jeremiah 11:7

Son ren mee breearrey chion noi nyn ayraghyn, ’sy laa hug mee lhiam ad seose ass cheer Egypt, eer gys y laa t’ayn jiu, girree dy moghey as cur raaue chion, as gra, Cur-jee biallys da my choraa.

Jeremiah 11:8

Ny-yeih cha dug ad biallys, chamoo ren ad nyn gleaysh y chroymmey, agh jimmee ad dy chooilley ghooinney ayns roonid e chree mee-chrauee hene: shen-y-fa ver-ym lhiam orroo ooilley goan y chonaant shoh hug mee ayns sarey daue dy yannoo; agh cha vel ad er n’yannoo ad.

Jeremiah 13:10

Bee yn pobble mee-chrauee shoh, ta gobbal dy eaishtagh rish my ghoan, ta gimmeeaght ayns roonid nyn gree hene, as geiyrt er jeeghyn elley dy hirveish ad, as dy chur ooashley daue, bee ad eer myr y cryss shoh, nagh nieeagh veg.

Jeremiah 13:11

Son myr ta’n cryss er ny hionney mysh corp dooinney, myr shen hug mee er slane thie Israel, as slane thie Yudah, dy ve er ny hionney hym’s, ta’n Chiarn dy ghra; dy ve dooys son pobble, as son ennym, as son moylley, as son gloyr: agh cha n’eaishtagh ad rhym.

Jeremiah 25:3

Veih’n trass vleïn jeig dy Yosiah mac Amon ree Yudah, eer gys y laa jiu, (ta shen y trass vleïn as feed,) ta goo yn Chiarn er ny ve cheet hym, as ta mee er ve loayrt riu, girree dy moghey as loayrt; agh cha vel shiu er n’eaishtagh.

Jeremiah 26:5

Dy eaishtagh rish goan my harvaantyn ny phadeyryn, ta mee er choyrt er chaghteraght hiu, girree dy moghey, as cur magh ad; (agh cha vel shiuish er n’eaishtagh;)

Jeremiah 29:19

Er-yn-oyr nagh vel ad er choyrt geill da my ghoan, ta’n Chiarn dy ghra, loayr mee roo liorish my hirveishee ny phadeyryn, girree dy moghey as dy choyrt ad magh; agh cha n’eaishtagh shiu, ta’n Chiarn dy ghra.

Jeremiah 32:33

Son t’ad er jyndaa cooyl rhym, as cha nee nyn oaie orrym: ga dy dynsee mee ad, girree dy moghey as cur roue, ny-yeih cha vel ad er n’eaishtagh dy ghoaill ynsagh.

Jeremiah 35:14

Ta sarey Yonadab mac Rechab jeant mie, myr doardee eh da e vec, gyn feeyn y iu; son gys y laa jiu cha vel ad giu veg, agh t’ad freayll sarey nyn ayr: ny-yeih ta mish er loayrt riuish, girree dy moghey as loayrt; agh cha dug shiu geill dou.

Jeremiah 35:15

Ta mee er choyrt hiu myrgeddin ooilley my harvaantyn ny phadeyryn, girree dy moghey as dy choyrt ad, gra, Chyndaa-jee nish dy chooilley ghooinney veih e ghrogh raad, as lhiassee-jee nyn raaidyn, as ny eiyr-jee er jeeghyn joarree dy hirveish ad, as nee shiu cummal ayns y cheer ta mish er choyrt diu hene, as da nyn ayraghyn; agh cha vel shiu er chroymmey nyn gleaysh, ny er n’eaishtagh rhym’s.

Jeremiah 35:17

Shen-y-fa shoh myr ta’n Chiarn, Jee ny flaunyssee, Jee Israel, dy ghra, Cur-my-ner, ver-yms lhiam er Judah, as er ooilley cummaltee Yerusalem, ooilley ny huilk ta mee er n’ockley magh nyn ’oï: er-yn-oyr dy vel mee er loayrt roo, agh cha dug ad clashtyn dou; as ta mee er n’eamagh orroo, agh cha vel ad er my reggyrt.

Jeremiah 44:23

Er-yn-oyr dy vel shiu er lostey incense, as er n’yannoo peccah noi yn Chiarn, as nagh dug shiu biallys da coraa yn Chiarn, chamoo ta shiu er n’immeeaght ayns e leigh, ny ayns ny slattyssyn, ny ayns ny oardaghyn echeysyn; er-y-fa shen ta’n kerraghey shoh er duittym erriu, myr te ec y laa jiu.

Jeremiah 44:4

Ny-yeih hug mish hiuish ooilley my harvaantyn ny phadeyryn, girree dy moghey, as dy choyrt ad, gra, Oh, ny jean-jee yn red dwoaiagh shoh, ta feoh aym er.

Jeremiah 5:21

Clasht-jee rish shoh nish, O phobble vee-cheeayllagh, as gyn tushtey; ta sooillyn eu, as cha vel shiu fakin; ta cleayshyn eu, as cha vel shiu clashtyn:

Jeremiah 6:10

Quoi rish loayr-ym as ver-ym raaue, dy vod ad clashtyn? Cur-my-ner, ta’n chleaysh oc chymmyltagh, as cha vod ad clashtyn: cur-my-ner, cha vel goo yn Chiarn agh craid dauesyn; cha vel veg y taitnys oc ayn.

Jeremiah 7:25

Er-dyn laa haink nyn ayraghyn magh ass cheer Egypt gys y laa jiu, ta mee eer er choyrt hiu ooilley my harvaantyn ny phadeyryn, dagh laa girree dy moghey, as dy choyrt ad:

Hosea 11:2

Myr smoo deïe mee orroo, wheesh shen sodjey hie ad voym: ren ad ouralley gys Baalim, as lostey incense gys jallooyn grainnit.

Hosea 11:7

As ta my phobble soit er skyrraghtyn voym; ga dy row eam oc gys yn er smoo syrjey, cha dug fer erbee ard-voylley da.

Hosea 9:17

Nee my Yee’s ad y yiooldey veih, er-yn-oyr nagh ren ad geaishtagh rish: as bee ad wagaantee mastey ny ashoonee.

Zechariah 7:13

Shen-y-fa haink eh gy-kione, myr deïe eshyn, as nagh jinnagh ad clashtyn, myr shen deïe adsyn, as cha jinnin’s clashtyn, ta Chiarn ny flaunyssee dy ghra.

Noo Mian 23:37

O Yerusalem, Yerusalem, uss ta cur dy baase ny phadeyryn, as claghey adsyn t’er nyn goyrt er chaghteraght hood, cre cha mennick as va mish aggindagh v’er haglym dty chloan cooidjagh, myr ta kiark goaill stiagh e heïn, fo my skianyn, as cha jinnagh shiu!