Jeremiah 7:10 - Yn Vible Casherick 1775 1819

¹⁰ As jig shiu dy hassoo kiongoyrt rhym’s ’sy thie shoh, ta enmyssit orrym’s, as gra, Ta shin er scapail, ga dy vel shin er n’yannoo ooilley ny reddyn dwoaiagh shoh?

Jeremiah 7:10 ပူးပေါင်းရင်းမြစ်များ

1 Reeaghyn 9:3

As dooyrt y Chiarn rish, Ta mee er chlashtyn dty phadjer as dt’accan t’ou er n’yannoo kiongoyrt rhym: ta mee er chasherickey yn thie shoh t’ou er hroggal, dy choyrt my ennym ayn son dy bragh; as bee my hooillyn as my chree ayn dy kinjagh.

2 Reeaghyn 21:4

As hrog eh altaryn ayns thie yn Chiarn, my-e-chione dooyrt y Chiarn, Ver-yms my ennym ayns Jerusalem.

2 Recortyssyn 33:4

Myrgeddin hrog eh altaryn ayns thie’n Chiarn, my-e-chione va’n Chiarn er ghra, Ayns Jerusalem bee m’ennym’s son dy bragh.

2 Recortyssyn 33:7

As hoie eh seose jalloo grainnit (yn jalloo v’eh er n’yannoo) ayns thie Yee, my-e-chione va Jee er ghra rish David, as rish Solomon e vac, ’Sy thie shoh, as ayns Jerusalem, ta mee er reih roish ooilley tribeyn Israel, ver-ym’s m’ennym son dy bragh.

Raaghyn Creeney 15:8

Ta oural ny mee-chrauee dwoaiagh da’n Chiarn: agh t’eh goaill taitnys ayns padjer yn er ynrick.

Isaiah 48:2

Son t’ad genmys ad-hene lurg yn ard-valley casherick, as coyrt nyn marrant er Jee Israel; Chiarn ny flaunyssee e ennym.

Jeremiah 32:34

Agh hoie ad seose nyn yallooyn eajee ayns y thie ta enmyssit orrym, dy yannoo eh an-chasherick.

Jeremiah 34:15

Agh ghow shiuish arrys, as ren shiu cairys ayns my hilley, ayns fockley-magh reamys dy chooilley ghooinney da e naboo, as ren shiu conaant kiongoyrt rhym ayns y thie ta enmyssit orrym’s:

Jeremiah 44:9

Vel shiu er yarrood mee-chraueeaght nyn ayraghyn, as drogh-yannoo reeaghyn Yudah, as drogh-yannoo ny mraane oc, as y drogh-yannoo eu hene, as olkys nyn mraane, t’ad er chur-rish ayns cheer Yudah, as ayns straïdyn Yerusalem?

Jeremiah 7:11

Vel y thie shoh, ta enmyssit orrym’s, er jeet dy ve ny ooig dy vaarlee ’sy chilley euish? Cur-my-ner, ta mish, eer mee hene, er n’akin eh, ta’n Chiarn dy ghra.

Jeremiah 7:14

Neem’s jannoo rish y thie shoh ta enmyssit lurg my ennym’s, er ta shiu cur nyn marrant, as rish y voayl hug mee diuish, as da nyn ayraghyn, myr ren mee rish Shiloh.

Jeremiah 7:30

Son ta cloan Yudah er n’yannoo olk ayns my hilley’s, ta’n Chiarn dy ghra: t’ad er hoiaghey nyn yallooyn eajee ayns y thie ta enmyssit orrym’s, dy yannoo eh an-chasherick.

Ezekiel 20:39

Mychione euish, O hie Israel, myr shoh ta’n Chiarn Jee dy ghra, Immee-jee, shirveish-jee dagh unnane e yallooyn hene, as ny lurg shoh myrgeddin, mannagh n’eaisht shiu rhym’s: agh ny jean-jee arragh my ennym’s casherick y vee-ooashlaghey lesh nyn ourallyn, as lesh nyn yallooyn.

Ezekiel 23:29

As dellee ad dy feohdagh rhyt, as nee ad ooilley dty laboraght y ghoaill ersooyl, as faagee ad oo rooisht as lhome, as bee nearey dty vaarderys er ny akin, chammah dty yollys as dty vaarderys.

Ezekiel 23:37

Dy vel ad er chur-rish brishey-poosey, as ta fuill ayns nyn laueyn, as lesh nyn yallooyn t’ad er vrishey poosey, as er chur er nyn mec myrgeddin, t’ad er n’ymmyrkey dooys, dy gholl trooid yn aile er nyn son dy stroie ad.

Ezekiel 23:39

Son tra v’ad er varroo nyn gloan son oural gys nyn yallooyn, eisht haink ad er y laa cheddin stiagh ayns my hiamble, dy yannoo neu-ghlen jeh; as cur-my-ner myr shoh t’ad er n’yannoo ayns mean my hie.

Ezekiel 33:25

Er-yn-oyr shoh, abbyr roosyn, Myr shoh ta’n Chiarn Jee dy ghra, Ta shiu gee lesh yn uill, as troggal seose nyn sooillyn gys ny jalloonyn eu, as deayrtey fuill; as vow shiu yn cheer myr eiraght?

Ezekiel 33:31

As t’ad cheet hood’s myr ta sleih cliaghtey cheet, as t’ad kiongoyrt rhyt myr my phobble’s, as t’ad clashtyn dty ghoan, agh cha vel ad cooilleeney ad: son lesh nyn meeal t’ad jeeaghyn lane graih, agh ta’n cree oc goll er-eiyrt nyn sayntyn.

Ezekiel 5:11

Shen-y-fa, myr ta mee bio, ta’n Chiarn Jee dy ghra, Son shickyrys, er-yn-oyr dy vel oo er an-chasherickey my hiamble lesh ooilley dty chliaghtaghyn dwoaiagh, as lesh ooilley dty obbraghyn eajee; shen-y-fa neem’s uss myrgeddin y leodaghey, chamoo nee my hooill lhiggey lhiat, chamoo goym chymmey jeed.

Daniel 9:18

O my Yee, croym dty chleaysh, as eaisht, foshil dty hooillyn, as cur-my-ner y traartys ain, as yn ard-valley ta enmyssit ort’s: son cha vel shin chebbal nyn aghinyn kiongoyrt rhyt er coontey’n ynrickys ain hene, agh er graih, dty vyghinyn mooarey.

Hosea 6:9

As myr ta sheshaghtyn dy roosteyryn lhie cooyl-chlea son dooinney, myr shen ta sheshaght ny saggyrtyn coyrt nyn goyrle dy cheilley, dy yannoo dunverys er y raad: son t’ad jannoo dy eajee.

Amos 4:5

As cheb-jee oural dy hoyrt-booise lesh arran casherick, as jean-jee fockley as soiaghey magh ny ourallyn-arryltagh; son shoh by-haittin lhieu, O shiuish chloan Israel, ta’n Chiarn Jee dy ghra.

Zephaniah 1:5

As adsyn ta cur ooashley da sheshaght rollageagh yn aer, er mullagh ny thieyn, as adsyn ta ooashlaghey, as breearrey liorish y Chiarn, as breearrey liorish Malcham;

Malachi 3:15

As nish ta shin genmys ny mooaralee maynrey: dy jarroo ta adsyn, ta cur rish drogh-yannoo, er ny hoiaghey seose, dy jarroo ta adsyn, ta brasnaghey Jee, er ny livrey.

Noo Mian 23:13

Agh smerg diuish scrudeyryn as Phariseeyn, chrauee-oalsey; son ta shiu dooney seose reeriaght niau noi deiney: cha vel shiu goll stiagh shiu hene, as ta shiu dyn lhiettal adsyn ta aggindagh er goll stiagh.

Noo Ean 13:18

Cha vel mee loayrt j’iu ooilley; ta fys aym quoi ta mee er reih: agh dy vod y scriptyr ve cooilleenit, T’eshyn ta gee arran mârym, er hroggal e voyn m’oï.

Noo Ean 18:28

Eisht hug ad lhieu Yeesey veih Caiaphas gys halley ny briwnys: as ve moghey, as cha jagh ad-hene stiagh ayns halley ny briwnys, er-aggle dy beagh ad an-chasherick; as nagh voddagh ad yn Eayn-caisht y ee.