Jeremiah 6:12 - Yn Vible Casherick 1775 1819

¹² As bee ny thieyn oc er ny hyndaa harrish da feallagh elley, marish nyn magheryn as nyn mraane dy cheilley: son sheeyn-yms magh my laue er cummaltee’n cheer, ta’n Chiarn dy ghra.

Jeremiah 6:12 ပူးပေါင်းရင်းမြစ်များ

1 Recortyssyn 21:16

As hrog David e hooillyn, as honnick eh ainle y Chiarn ny hassoo eddyr niau as y thalloo, lesh cliwe loamrit ny laue sheeynt magh harrish Jerusalem: eisht huitt David as shanstyr Israel, va coamrit ayns aanrit-sack, er nyn eddin.

Isaiah 10:4

Treigit liorym’s nee ad croymmey sheese nyn bryssoonee, as tuittee ad mastey ny merriu. Son ooilley as shoh cha vel e yymmoose er ny hyndaa ersooyl, agh ta e laue foast er ny heeyney magh.

Isaiah 5:25

Shen-y-fa ta corree yn Chiarn er ny oaddey noi e phobble, as t’eh er heeyney magh e laue nyn ’oï, as er woalley ad: myr shen dy row ny croink er-creau, as va ny kirp marroo oc er ny raipey ayns mean ny straïdyn. Son ooilley shoh cha vel e chorree er ny hyndaa ersooyl, agh ta e laue foast er ny heeyney magh.

Isaiah 9:12

Ny Syrianee er e veealloo, as ny Philistinee er e chooylloo; as nee ad Israel y stroie lesh beeal foshlit. Son ooilley shoh cha vel e yymmoose er ny hyndaa ersooyl, agh ta e laue foast sheeynt magh.

Isaiah 9:17

Shen-y-fa cha bee veg y taitnys ec y Chiarn ayns ny deiney aegey oc, chamoo vees myghin echey er y chloan gyn ayr, as ny mraane-treoghe: son t’ad ooilley crauee-oalsey as nyn ghrogh-yantee as ta dy chooilley veeal loayrt ommijys. Son ooilley shoh cha vel e chorree chyndaït ersooyl, agh ta e laue foast er ny heeyney magh.

Isaiah 9:21

Manasseh noi Ephraim, as Ephraim noi Manasseh; as bee ad nyn-neesht noi Judah. Son shoh as ooilley cha vel e yymmoose er ny chastey, agh ta e laue foast er ny heeyney magh.

Jeremiah 15:6

T’ou er hreigeil mish, ta’n Chiarn dy ghra, t’ou er chur cooyl rhym; shen-y-fa sheeyn-ym magh ort my laue, as nee’m dty stroie; ta mee skee lesh surranse-foddey rhyt.

Jeremiah 21:5

As neem’s mee hene caggey nyn ’oï lesh laue sheeynt magh, as lesh roih niartal, eer ayns corree, as ayns elgys, as ayns jymmoose dewil.

Jeremiah 38:22

As cur-my-ner, hed ooilley ny mraane, ta faagit ayns thie ree Yudah, magh gys princeyn ree Vabylon, as nee ad gra, Ta e chaarjyn er volley eh, as er ghoaill vondeish er; ta e chassyn dowin ’sy laagh, as t’ad er choyrt cooyl rish.

Jeremiah 38:23

Cur-my-ner, hed ooilley dty vraane as dty chloan magh gys ny Caldeanee; as cha jean oo scapail ass ny laueyn oc, agh bee oo goit liorish ree Vabylon: as by-dty-chyndagh loshtee ad yn ard-valley shoh lesh aile.

Jeremiah 7:20

Shen-y-fa shoh myr ta’n Chiarn Jee dy ghra, Cur-my-ner, bee my chorree as my eulys er ny gheayrtey magh er y voayl shoh, er dooinney, as er baagh, as er biljyn y vagheragh, as er mess y thallooin; as nee eh lostey, as cha bee eh er ny vooghey.

Jeremiah 8:10

Shen-y-fa ver-yms ny mraane oc da feallagh elley, as ny magheryn oc da eiraghyn joarree: son ta dy chooilley unnane, veih’n er sloo gys yn er smoo, sondagh er cosney; veih’n phadeyr eer gys y taggyrt, ta dy chooilley unnane dellal dy foalsey.

Dobberan 2:8

Ta’n Chiarn kiarit dy stroie voalley inneen Zion; t’eh er heeyney magh yn line towshan, cha vel eh er lhiettal e laue veih stroie: shen-y-fa hug eh er y chashtal as e voalley dy ghobberan; hie ad naardey dy cheilley.

Dobberan 3:3

Dy shickyr m’oï’s t’eh er ny hyndaa, t’eh chyndaa e laue m’oï fey-ny-laa:

Dobberan 5:11

Ghow ad mraane Zion er-êgin, as ny moidynyn ayns ard-valjyn Yudah.

Dobberan 5:2

Ec joarreeyn ta nyn eiraght, as ny thieyn ain ec nyn noidyn.

Dobberan 5:3

Ta shin cloan treigit as gyn ayr, as ta nyn moiraghyn myr mraane-treoghe.

Ezekiel 35:3

As abbyr rish, Myr shoh ta’n Chiarn Jee dy ghra, Cur-my-ner, O lieau Seir, ta mish dt’oï’s, as sheeyn-ym magh my laue ort, as nee’m uss y yannoo dy bollagh follym-faase.

Ezekiel 7:24

Shen-y-fa ver-ym lhiam y chooid smessey jeh ny ashoonee, as gowee ad ny thieyn oc daue hene: ver-yms sheese myrgeddin mooaralys y vooinjer niartal, as bee nyn ynnydyn casherick ny chaitnys.

Micah 2:4

Ayns y laa shen nee fer goaill seose coraa-dorraghey nyn ’oï, as nee eh dobberan lesh dobberan hrimshagh, as jir eh, Ta shin dy bollagh spooillit: t’eh er chaghlaa eiraght my phobble: kys t’eh er scughey foddey voym eh! caghlaa yn chagliagh t’eh er rheynn nyn magheryn.

Zephaniah 1:13

Shen-y-fa hig yn chooid oc dy ve son spooilley, as ny thieyn oc nyn dholtanyn: nee ad myrgeddin thieyn y hroggal, agh cha jean ad cummal ayndoo: as nee ad garaghyn-feeyney y hoiaghey, agh jeh’n feeyn oc cha jean ad giu.

Zephaniah 1:4

As sheeyn-yms magh myrgeddin my laue er Judah, as er ooilley cummaltee Yerusalem, as giare-yms jeh fooilliagh Vaal veih’n ynnyd shoh, as ennym ny Chemarim, marish ny saggyrtyn;