Jeremiah 50:2 - Yn Vible Casherick 1775 1819

² Insh-jee magh mastey ny ashoonyn, as lhig daue clashtyn, as soie-jee seose yn mergey; cur-jee eam, as ny jean-jee keiltyn: abbyr-jee, Ta Babylon goit, ta Bel currit naardey, ta Merodach brisht ayns peeshyn; ta ny jeeghyn eck bun-ry-skyn, ny jallooyn eck nyn beeshyn mynney.

Jeremiah 50:2 ပူးပေါင်းရင်းမြစ်များ

Psalmyn 64:9

As jir dy chooilley ghooinney hee eh, She Jee t’er n’yannoo shoh: son ver ad tastey dy nee eh yn obbyr echeysyn.

Psalmyn 96:3

Jean-jee e ooashley y hoilshaghey da ny ashoonyn-quaagh: as e yindyssyn da dy chooilley phobble.

Psalmyn 97:7

Bee adsyn ooilley er nyn goyrt gys nearey ta cur ooashley da jallooyn grainnit, as ta goaill taitnys ayns Jeeghyn fardalagh: cur-jee ooashley dasyn, ooilley shiuish Yeeghyn.

Isaiah 12:4

As ayns y laa shen nee shiu gra, Moylley-jee yn Chiarn, eïe-jee er e ennym, fockle-jee magh e yannoo mastey’n pobble, jean-jee gimraa er e ennym lesh ard-voylley,

Isaiah 13:2

Soie-jee seose mergey er y clieau ard, trog-jee seose nyn goraa hucsyn, crie-jee yn laue, dy vod ad goll stiagh er giattyn y vooinjer ooasle.

Isaiah 21:9

As cur-my-ner, hee-ym cheet fainagh dy gheiney, marish cubbyl dy varkee. As dreggyr eh, as dooyrt eh, Ta Babylon er duittym, er duittym; as ooilley jallooyn grainnit ny jeeghyn eck, t’eh er vrishey gys y thalloo.

Isaiah 37:19

As er hilgey ny jeeghyn oc ’syn aile: son cha nee jeeghyn v’ad, agh obbyr-lauee gheiney, fuygh as clagh; shen-y-fa t’ad er stroie ad.

Isaiah 39:1

Ec y traa shen hug Merodach-baladan, mac Valadan ree Vabylon, screeunyn as cowrey gys Hezekiah: son cheayll eh dy row eh er ny ve ching, as er choural.

Isaiah 46:1

Ta Bel lhoobey sheese, ta Nebo croymmey; va ny jallooyn oc er y maase, as er yn ollagh: va’n carriads eu trome laadit; t’ad errey da’n baagh tooillit.

Isaiah 48:20

Cosne-jee magh ass Babylon, roie-jee er-chea veih ny Caldeanee; lesh y choraa dy vingys jean-jee gimraa er shoh, insh-jee shoh, fockle-jee eh dy jarroo gys ny ard-valjyn sodjey magh jeh’n theihll; abbyr-jee, Ta’n Chiarn er choyrt livrey-ys da e harvaant Jacob.

Isaiah 48:6

T’ou er chlashtyn, cur-my-ner shoh ooilley; as nagh jean-jee soilshaghey eh? ta mee er yeeaghyn dhyt reddyn noa veih’n traa shoh, eer reddyn follit, as cha row toiggal ayd jeu.

Jeremiah 10:11

Myr shoh jir shiu roosyn, Ny jeeghyn nagh ren ny niaughyn ny’n thalloo y chroo, nee ad shen eer cherraghtyn veih’n thalloo, as veih fo ny niaughyn shoh.

Jeremiah 10:15

T’ad fardail, as obbyr y volteyrys: ayns earish nyn gerraghey nee ad cherraghtyn.

Jeremiah 31:10

Clasht-jee goo yn Chiarn, O shiuish ashoonyn, as jean-jee shoh y hoilshaghey ayns ny hellanyn foddey jeh, as abbyr-jee, Nee eh ren skeayley Israel eshyn y haglym, as nee eh fassaghey eh, myr ta bochilley e hioltane.

Jeremiah 4:16

Jean-jee imraa jeh da ny ashoonyn; cur-my-ner, insh-jee magh eh noi Jerusalem, dy vel scrialtee cheet veih cheer foddey, as cur magh nyn goraa noi ard-valjyn Yudah.

Jeremiah 4:6

Soie-jee seose yn mergey lesh Zion: reue-jee, ny jean-jee cumrail; son ver-yms lhiam olk veih’n twoaie, as traartys trome.

Jeremiah 46:14

Fockle-jee magh eh ayns Egypt, as cur-jee eam ayns Migdol; insh-jee magh eh ayns Noph, as ec Tahpanhes: abbyr-jee, Shass shickyr, as bee er dty hwoaie; son nee yn cliwe sluggey ooilley mygeayrt-y-mood.

Jeremiah 50:46

Ec skeeal atchimagh jeh goaill Babylon ta’n thalloo craa, as ta’n eam agglagh er ny chlashtyn mastey ny ashoonyn.

Jeremiah 51:12

Cur-jee seose yn mergey er voallaghyn Vabylon, niartee-jee yn arrey, soie-jee ny arreyderyn, cur-jee sleih dy lhie cooyl-chlea: son ta’n Chiarn chammah er chiarail, as er n’yannoo mie ny t’eh er loayrt noi cummaltee Vabylon.

Jeremiah 51:27

Soie-jee seose mergey ayns y cheer, sheid-jee yn trumpet mastey ny ashoonyn, soie-jee ny ashoonyn urree, muster-jee cooidjagh noi eck reeriaghtyn Ararat, Minni, as Ashchenaz; reih-jee captan noi eck; lhig da ny cabbil cheet seose myr ny braddagyn mollagh.

Jeremiah 51:31

Roie-ys post quail post, as chaghter quail chaghter, lesh naight gys ree Vabylon, dy vel yn ard-valley echey goit ec y derrey chione,

Jeremiah 51:44

As neem’s Bel y vriwnys ayns Babylon, as goym’s ass e veeal shen t’eh er lhuggey; as cha jean ny ashoonyn ny smoo lhieeney stiagh huggey; dy feer, nee voalley Vabylon tuittym.

Jeremiah 51:47

Shen-y-fa, cur-my-ner, ta ny laghyn cheet dy jean-yms briwnys er jallooyn grainnit Vabylon: as bee yn slane cheer eck bun-ry-skyn, as tuittee ooilley ny cummaltee eck marroo cheu-sthie jee.

Jeremiah 51:52

Shen-y-fa, cur-my-ner, ta ny laghyn cheet, ta’n Chiarn dy ghra, dy goym’s cooilleeney er ny jallooyn grainnit eck; as fud ny cheerey nee ny guintee gaccan.

Jeremiah 51:8

Ta Babylon er duittym doaltattym, as t’ee naardey: jean-jee dobberan er e son; gow-jee shelliu son y ghuin eck, my ta lheihys ny cour.

Jeremiah 52:31

As haink eh gy-kione ayns y chiaghtoo vleïn jeig as feed jeh cappeeys Yehoiachin ree Yudah, ayns y nah vee yeig, er y wheiggoo laa as feed jeh’n vee, dy ren Evil-merodach ree Vabylon, ayns y chied vleïn jeh e reill, troggal seose kione Yehoiachin ree Yudah, as hug eh lesh eh ass pryssoon,

Jeremiah 6:18

Shen-y-fa clasht-jee, O ashoonee, as toig-jee, O cho-chruinnaght, cre ta ny mast’ oc.

Daniel 1:2

As hug y Chiarn Jehoiakim ree Yudah fo’n laue echey, marish paart jeh siyn casherick thie Yee ad shoh hug eh lesh gys cheer Shinar, gys thie e Yee, as hug eh ny siyn ayns thie-tashtee e Yee.

Daniel 3:14

Loayr Nebuchadnezzar, as dooyrt eh roo, Nee’n irriney eh, O Shadrach, Meshach as Abed-nego? nagh vel shiuish shirveish ny jeeghyn aym’s, ny ooashlaghey yn jalloo airh, ta mish er hoiaghey seose?

Zephaniah 2:11

Bee yn Chiarn atchimagh daue: son ver eh naardey ooilley jeeghyn y thallooin; as nee deiney eshyn y ooashlaghey, dy chooilley unnane ’syn ynnyd hene, dy jarroo ooilley ellanyn ny ashoonee.

Ashlish 18:2

As deïe eh dy niartal lesh coraa lajer, gra, Ta’n Babylon yn ard-valley mooar er duittym, er duittym, as er jeet dy ve ynnyd-vaghee dy youyil, as cummal dy chooilley spyrryd neu-ghlen, as edd son dy chooilley eean neu-ghlen as eajee.