Jeremiah 5:6 - Yn Vible Casherick 1775 1819

⁶ Er-y-fa shen nee lion ass y cheyll adsyn y stroie, as nee moddey-oaldey ’syn astyr ad y raipey, nee leopard freayll arrey er ny ard-valjyn oc: bee dy chooilley unnane ta goll magh assdoo er ny raipey ayns peeshyn; er-yn-oyr dy vel y drogh-yannoo oc ymmodee, as y cooyl-skyrraghtyn oc goaill niart.

Jeremiah 5:6 ပူးပေါင်းရင်းမြစ်များ

2 Recortyssyn 36:14

Marish shoh, hie ooilley ny ard-gheiney, as ny saggyrtyn dy mooar er-shaghryn, lurg ooilley drogh chliaghtaghyn ny ashoonee, as ren ad thie’n Chiarn, v’eshyn er ny chasherickey ayns Jerusalem, y yannoo an-chasherick.

Ezra 10:10

As hass Ezra yn saggyrt seose, as dooyrt eh roo, Ta shiu er vrishey’n leigh, liorish goaill mraane joarree, dy vishaghey peccah Israel.

Ezra 9:6

As dooyrt mee, O my Yee, ta mee goaill nearey, as jiargaghey dy hroggal seose my eddin hood’s my Yee: son ta nyn beccaghyn er vishaghey harrish nyn ghing, as nyn loght er roshtyn gys ny niaughyn.

Lioar Yob 10:16

Son te lhieeney orrym. T’ou dy my helg myr lion dewil; as reesht ta dty laue yindyssagh trome orrym.

Psalmyn 104:20

T’ou jannoo dorraghys dy chur stiagh yn oie: ayn ta ooilley beïyn y cheyll rouail mygeayrt.

Psalmyn 80:13

Ta muc feïe ass y cheyll reurey seose ny fraueyn eck: as ta maase feïe yn vagher dy chur mow ee.

Isaiah 1:23

Ta dty phrinceyn mee-reiltagh, as sheshaghyn maarlee: ta dagh fer jeu sondagh er giootyn, as shêgin er leagh briwnys: cha vel ad briwnys son y chloan gyn ayr, chamoo ta cooish yn ven-treoghe cheet kiongoyrt roo.

Isaiah 59:12

Son ta’n drogh-yannoo ain er ny vishaghey kiongoyrt rhyt, as ta ny peccaghyn ain gymmyrkey feanish nyn ’oï: son ta’n drogh-yannoo ain mârin; as er son nyn beccaghyn, t’ad ro chronnal:

Jeremiah 14:7

O Hiarn, ga dy vel nyn olkys hene gymmyrkey feanish nyn ’oï, cur uss feaysley dooin, son graih dty ennym: son s’mooar ta nyn gooyl-skyrraghtyn; ta shin er n’yannoo peccah dt’oï’s.

Jeremiah 2:15

Ren ny lionyn aegey garveigagh n’oï as gullyrnee, as hug ad yn cheer echey naardey: ta ny ard-valjyn echey losht, as gyn cummaltagh.

Jeremiah 2:17

Nagh vel oo er dayrn shoh ort hene, liorish dy vel oo er hreigeil yn Chiarn dty Yee, va dty leeideilagh raaidey?

Jeremiah 2:19

Nee dty vee-chraueeaght hene uss y smaghtaghey, as nee dty chooyl-skyrraghtyn hene oo y gheyrey: toig er-y-fa shen, as gow tastey vie, dy vel eh ny red olk as sharroo dy vel oo er hreigeil yn Chiarn dty Yee, as nagh vel yn aggle aym’s aynyd, ta Chiarn ny sheshaghtyn flaunyssagh dy ghra.

Jeremiah 2:31

O heeloghe, gow-jee tastey jeh goo yn Chiarn: Vel mee er ve ny aasagh da Israel? cheer dy ghorraghys? Cre’n-fa ta my phobble gra, Ta shin nyn mainshtyryn hene; cha jig mayd ny-sodjey hood’s?

Jeremiah 25:38

T’eh er jeet magh ass e ooig, myr lion: son ta’n cheer oc follym-faase, kyndagh rish dewilys yn tranlaasagh, as eulys e yymmoose.

Jeremiah 30:14

Ta ooilley dty ghraihderyn er dty yarrood; cha vel nyn aigney hood: son ta mee er dty lhottey lesh lhott noidey, lesh smaghtaghey fer dewil, son mooadys dty vee-chairys; son dy row dty pheccaghyn ymmodee.

Jeremiah 30:15

Kys dy vel oo gaccan harrish dty heaghyn? cha vel saase cour dty hrimshey kyndagh rish ymmodee dty vee-chairys: son dy vel dty pheccaghyn er n’ghoaill niart ta mee er n’yannoo myr shoh rhyt.

Jeremiah 30:24

Cha jean jymmoose eulyssagh y Chiarn chyndaa, derrey t’eh jeant magh, as derrey t’eh er chooilleeney slane kiarail e chree: ayns ny laghyn jerrinagh toiggys shiu shoh.

Jeremiah 4:7

Ta’n lion er jeet seose veih e cheyll, as ta stroider ny ashoonee er e raad; t’eh er n’gholl magh veih e oayll dy yannoo dty heer ny hraartys: as bee dty ard-valjyn er nyn goyrt naardey fegooish cummaltagh.

Jeremiah 49:19

Cur-my-ner, hig eh seose myr lion veih brooinyn Yordan noi ynnyd-vaghee yn treanagh: agh ver-yms er dy leah cur cooyl r’ee; as quoi ta’n reih dooinney dunnal dooys dy endeil ee? son quoi ta casley rhym’s? as quoi nee pointeil traa dou? as quoi yn bochilley shen nee shassoo roym?

Jeremiah 8:5

Cre’n-fa eisht ta pobble Yerusalem er chooyl-skyrraghtyn voym’s foddey as kinjagh? t’ad greimmey chion er molteyrys, t’ad gobbal dy hyndaa.

Jeremiah 8:7

S’feer eh, dy vel y stork ’syn aer goaill baght jeh ny imbaghyn dooghyssagh; as ta’n turtle, as y choar, as gollan-geayee, freayll gys y traa t’ad ry-hoi cheet; agh cha vel my phobble’s cur veg y gheill da briwnys y Chiarn.

Dobberan 1:5

Ta laue yn eaghtyr ec ny tranlaasee eck, ta e noidyn er ghoaill niart: son ta’n Chiarn er heaghney ee, son e ymmodee loghtyn; ta’n chloan eck er n’gholl ayns cappeeys roish y noid.

Ezekiel 16:25

T’ou er hroggal dty ard-ynnyd ec kione dagh raad, as er n’yannoo dwoaiagh dty aalid, as er vosley dty chassyn da dy chooilley unnane va goll shaghey, as er vishaghey dty vaarderys.

Ezekiel 22:27

Ta ny princeyn eck ayns e mean, myr moddee-oaldey jollyssagh lurg y spooilley, dy gheayrtey fuill, as dy stroie anmeenyn, dy gheddyn cosney neu-chairagh.

Ezekiel 23:19

Ny-yeih, hie ee er e toshiaght ayns maarderys, ayns tayrn gys cooinaghtyn laghyn e aegid, tra ren ee maarderys ayns cheer Egypt.

Daniel 7:4

Va’n chied er jeu goll-rish lion, lesh skianyn urley: as yeeagh mee, derrey va ny skianyn spolgit jeh, lhieu v’eh troggit seose veih yn thalloo, as v’eh currit ny hassoo er e chassyn, myr dooinney, as va cree dooinney er ny choyrt da.

Daniel 7:6

Lurg shoh yeeagh mee, as cur-my-ner fer elley goll-rish leopard, lesh kiare skianyn eeanlee er e ghreeym, va er y veisht myrgeddin kiare king; as va reiltys er ny choyrt da.

Hosea 5:14

Son beem’s da Ephraim myr lion, as myr quallian y lion da thie Yudah: neem’s, dy jarroo neem’s raipey, as goll roym; goym lhiam ersooyl, as cha jean fer erbee eshyn y livrey.

Habakkuk 1:8

Ta ny cabbil oc neesht ny s’bieau na ny leopardyn, as ny s’barbagh na moddee-oaldey yn astyr: as nee nyn markee lhiggey mygeayrt, as hig nyn markee veih cheer foddey, nee ad getlagh myr urley ta jollyssagh er y chragh.

Zephaniah 3:3

Ta ny princeyn cheu-sthie j’ee nyn lionyn buirroogh: ta ny briwnyn eck myr moddee-oaldey yn astyr, nagh vel caigney ny craueyn derrey’n vairagh.

Earrooyn 32:14

As cur-my-ner, ta shiuish er droggal ayns ynnyd nyn ayraghyn, sluight noa dy ghrogh gheiney, dy ghoostey reesht corree dewil y Chiarn noi Israel.

Ashlish 13:2

As va’n veisht honnick mee goll-rish leopard, as va ny cassyn echey myr cassyn bear, as e veeal myr beeal lion: as hug y dragon e phooar da as e stoyl, as reill mooar.