Jeremiah 4:7 - Yn Vible Casherick 1775 1819

⁷ Ta’n lion er jeet seose veih e cheyll, as ta stroider ny ashoonee er e raad; t’eh er n’gholl magh veih e oayll dy yannoo dty heer ny hraartys: as bee dty ard-valjyn er nyn goyrt naardey fegooish cummaltagh.

Jeremiah 4:7 ပူးပေါင်းရင်းမြစ်များ

2 Reeaghyn 24:1

Ayns y lhing echeysyn haink Nebuchadnezzar ree Vabylon seose, as va Jehoiakim fo keesh da three bleeaney: eisht hyndaa eh as ren eh girree-magh n’oï.

2 Reeaghyn 25:1

As haink eh gy-kione, ayns y nuyoo vleïn jeh’n reill echey, ayns y jeihoo vee, er y jeihoo laa jeh’n vee, dy daink Nebuchadnezzar ree Vabylon, eh-hene as ooilley’n cheshaght-chaggee echey, noi Jerusalem, as ren ad campal n’oï, as hrog ad tooryn n’oï cruin mygeayrt.

Isaiah 1:7

Ta’n cheer eu ny aasagh, ta ny ard-valjyn eu losht lesh aile: yn cheer eu ta joarreeyn dy chur mow roish nyn sooillyn, as te treigit, myr stroit liorish noidyn.

Isaiah 5:9

Ayns my chlashtyn’s dooyrt Chiarn ny flaunyssee, Son shickyrys bee ymmodee thieyn treigit, eer thieyn mooar as aalin gyn cummaltagh.

Isaiah 6:11

Eisht dooyrt mee, Hiarn, caïd? As dreggyr eh, Derrey vees ny ard-valjyn naardey fegooish cummaltagh, as ny thieyn fegooish dooinney, as y cheer dy bollagh treigit.

Jeremiah 2:15

Ren ny lionyn aegey garveigagh n’oï as gullyrnee, as hug ad yn cheer echey naardey: ta ny ard-valjyn echey losht, as gyn cummaltagh.

Jeremiah 22:6

Son myr shoh ta’n Chiarn dy ghra rish thie ree Yudah, T’ou uss Gilead dooys, as mullagh Lebanon: ny-yeih son shickyrys neem’s faasagh y yannoo jeed, as ard-valjyn gyn cummaltee.

Jeremiah 22:7

As ver-ym stroideryn dt’oï, dy chooilley unnane lesh e ghreinyn; as giaree ad sheese dty reih biljyn-cedar, as tilgee ad ’syn aile ad.

Jeremiah 25:38

T’eh er jeet magh ass e ooig, myr lion: son ta’n cheer oc follym-faase, kyndagh rish dewilys yn tranlaasagh, as eulys e yymmoose.

Jeremiah 25:9

Cur-my-ner, ver-ym fys as goym ooilley ashoonyn y twoaie, ta’n Chiarn dy ghra, as Nebuchadrezzar ree Vabylon my harvaant, as ver-ym lhiam ad noi yn cheer shoh, as noi ny cummaltee eck, as noi ooilley ny cheeraghyn shoh ta mygeayrt-y-mood, as stroie-ym ad ooilley, as nee’m ad dy ve son atchim, as son oltooan, as son traartys foddey-beayn.

Jeremiah 26:9

Cre’n-fa t’ou er n’yannoo phadeyrys ayns ennym y Chiarn, gra, Bee’n thie shoh myr Shiloh, as bee’n ard-valley shoh follym-faase fegooish cummaltagh? As va ooilley’n pobble er nyn jaglym noi Jeremiah ayns thie yn Chiarn.

Jeremiah 27:8

As hig eh gy-kione, yn ashoon as yn reeriaght nagh jean shirveish Nebuchadnezzar cheddin ree Vabylon, as nagh der nyn mwannal fo quing ree Vabylon, yn ashoon shen neem’s smaghtaghey, ta’n Chiarn dy ghra, lesh y chliwe, as lesh y ghortey, as lesh y chramp, derrey veem’s er stroie ad liorish y laue echeysyn.

Jeremiah 33:10

Myr shoh ta’n Chiarn dy ghra, ’Syn ynnyd shoh, (ta shiu gra vees treigit fegooish dooinney ny baagh, eer ayns ard-valjyn Yudah, as ayns straïdyn Yerusalem, ta follym-faase fegooish dooinney, as fegooish cummaltagh, as fegooish baagh,)

Jeremiah 34:22

Cur-my-ner, ver-yms magh sarey, ta’n Chiarn dy ghra, dauesyn dy hyndaa reesht noi’n ard-valley shoh; as nee ad caggey rish, as goaill eh, as lostey lesh aile eh: as ver-ym er ard-valjyn Yudah dy ve ny hraartys gyn cummaltagh faagit ayn.

Jeremiah 4:29

Nee’n slane ard-valley cosney roue kyndagh rish feiyr ny markee as deiney yn vhow; hed ad stiagh ayns ny thammagyn, as drappal seose er ny creggyn: bee dy chooilley ard-valley treigit, as cha bee dooinney cummal ayndoo.

Jeremiah 44:2

Myr shoh ta Chiarn ny flaunyssee, Jee Israel, dy ghra, Ta shiu er vakin ooilley yn olk ta mee er choyrt er Jerusalem, as er ooilley ard-valjyn Yudah; as cur-my-ner, yn laa jiu t’ad ny hraartys, as cha vel dooinney erbee baghey ayndoo;

Jeremiah 46:18

Myr ta mee bio, ta’n Ree gra, ta’n ennym echey, Yn Chiarn dy heshaghtyn-flaunyss, Cha shickyr as ta Tabor soit mastey ny sleityn, as Carmel rish oirr ny marrey, bee shoh er ny chooilleeney.

Jeremiah 49:19

Cur-my-ner, hig eh seose myr lion veih brooinyn Yordan noi ynnyd-vaghee yn treanagh: agh ver-yms er dy leah cur cooyl r’ee; as quoi ta’n reih dooinney dunnal dooys dy endeil ee? son quoi ta casley rhym’s? as quoi nee pointeil traa dou? as quoi yn bochilley shen nee shassoo roym?

Jeremiah 5:6

Er-y-fa shen nee lion ass y cheyll adsyn y stroie, as nee moddey-oaldey ’syn astyr ad y raipey, nee leopard freayll arrey er ny ard-valjyn oc: bee dy chooilley unnane ta goll magh assdoo er ny raipey ayns peeshyn; er-yn-oyr dy vel y drogh-yannoo oc ymmodee, as y cooyl-skyrraghtyn oc goaill niart.

Jeremiah 50:17

Ta Israel ny cheyrrey chailjey; ta ny lionyn er n’eiyrt ersooyl eh: hoshiaght d’ee ree Assyria yn eill jeh, as ny lurg-syn ta ree Vabylon er chaigney e chraueyn.

Jeremiah 50:44

Cur-my-ner, hig eh seose myr lion veih brooinyn Yordan noi ynnyd-vaghee yn treanagh; agh ver-yms orroo dy leah cur cooyl; as quoi ta’n reih dooinney dunnal dy endeil ee m’oï’s? son quoi ta casley rhym? as quoi s’loys da m’y ghreinnaghey? ny quoi yn bochilley shen oddys shassoo roym?

Jeremiah 8:16

Va stronneraght e chabbil er ny chlashtyn veih Dan; va’n slane cheer er-creau ec sheean shutternee e chabbil caggee; son t’ad er roshtyn, as er chur naardey yn cheer, as ooilley ny t’ayn: yn ard-valley as e cummaltee.

Jeremiah 9:11

As neem’s Jerusalem y yannoo ny holtanyn, as ooig dy ghragonyn; as neem’s ard-valjyn Yudah y yannoo ny hraartys, gyn cummaltagh.

Ezekiel 12:20

As ny ard-valjyn ta cummaltee ayndoo, bee ad er ny chur naardey, as bee yn thalloo treigit as bee fys eu dy nee mish y Chiarn.

Ezekiel 21:31

As deayrt-yms magh ort my yymmoose, neem’s sheidey dt’oï ayns aile my eulys, as livrey-ym oo gys laue deiney dewil, as schleioil dy stroie,

Ezekiel 32:2

Vac y dooinney, gow seose bardoon son Pharaoh ree Egypt, as abbyr rishyn, T’ou uss goll-rish lion aeg fud ny ashoonyn, as t’ou myr whale ayns ny faarkaghyn: as haink oo magh trooid dty awinyn, as ren oo seiy ny ushtaghyn lesh dty chassyn, as broghey dty awinyn.

Daniel 5:19

As er coontey yn ard-ooashley hug eh da, va dy chooilley phobble, ashoonyn as glaraghyn er-creau, as ayns aggle kiongoyrt rish: adsyn baillish, varr eh, as adsyn baillish, dreill eh bio, as adsyn baillish, hoie eh seose, as adsyn baillish, hug eh sheese.

Daniel 7:4

Va’n chied er jeu goll-rish lion, lesh skianyn urley: as yeeagh mee, derrey va ny skianyn spolgit jeh, lhieu v’eh troggit seose veih yn thalloo, as v’eh currit ny hassoo er e chassyn, myr dooinney, as va cree dooinney er ny choyrt da.

Leviticus 26:31

As ver-yms naardey nyn ard-valjyn, as stroie-ym ny chiambleyn eu: as cha jean-ym soiagh jeh nyn ourallyn-millish.

Leviticus 26:33

As nee’m nyn skeayley fud ny ashoonyn-quaagh, as y cliwe y hayrn nyn yeï: as bee’n cheer eu treigit, as nyn ard-valjyn follym-faase.