Jeremiah 4:4 - Yn Vible Casherick 1775 1819

⁴ Bee-jee er nyn yiarey-chymmylt gys y Chiarn, as gow-jee ersooyl neu-ghlennid nyn gree, shiuish gheiney Yudah, as chummaltee Yerusalem; er-aggle dy brish my eulys magh myr aile, as lostey nagh vod eh v’er ny vooghey, kyndagh rish nyn ghrogh-yannoo.

Jeremiah 4:4 ပူးပေါင်းရင်းမြစ်များ

2 Recortyssyn 34:25

Er-yn-oyr dy vel ad er my hreigeil, as er hebbal incense da jeeghyn joarree, dy my vrasnaghey gys corree lesh ooilley obbraghyn nyn laueyn; shen-y-fa bee my yymmoose er ny gheayrtey magh er yn ynnyd shoh; as cha bee eh er ny vooghey.

Isaiah 10:17

As bee soilshey Israel son aile, as e Er-casherick son lossey: as nee eh lostey as stroie e ghrineyn as e ghressyn ’syn un laa.

Isaiah 30:33

Son s’foddey neayr’s va Tophet er ny oardaghey, eer cour yn ree te kiarit; t’eh er n’yannoo eh dowin as lhean: ta yn chreagh echey aile as lane fuygh, ta ennal y Chiarn myr strooan dy vrimstone dy oaddey eh.

Isaiah 51:17

Dooisht, dooisht, shass seose, O Yerusalem, t’er n’iu veih laue yn Chiarn cappan e eulys: t’ou uss er n’iu drundin y chappan atchimagh, as er hraastey ad.

Jeremiah 15:14

As ver-ym ort dy gholl marish dty noidyn gys cheer nagh vel oayll ayd er; son ta aile er ny oaddey ayns my yymmoose, nee shiu y lostey.

Jeremiah 21:12

O hie Ghavid, myr shoh ta’n Chiarn dy ghra, Cur-jee briwnys cairagh ’sy voghrey, as livrey-jee eshyn ta tranlaasit ass laue yn tranlaasagh, er-aggle dy jed m’eulys magh myr aile, as lostey nagh vod unnane erbee y vooghey eh, kyndagh rish olkys nyn ghrogh-yannoo.

Jeremiah 21:5

As neem’s mee hene caggey nyn ’oï lesh laue sheeynt magh, as lesh roih niartal, eer ayns corree, as ayns elgys, as ayns jymmoose dewil.

Jeremiah 23:19

Cur-my-ner ta geay-chassee yn Chiarn er n’gholl magh ayns eulys, eer geay-chassee dewil; tuittee eh dy trome er kione ny mee-chrauee.

Jeremiah 36:7

Foddee eh ’ve dy jean ad chebbal nyn aghin kiongoyrt rish y Chiarn, as chyndaa dagh unnane veih e ghrogh raad: son s’mooar ta’n jymmoose as yn eulys ta’n Chiarn er n’ockley magh noi’n pobble shoh.

Jeremiah 44:22

Myr shen nagh voddagh y Chiarn gymmyrkey ny-sodjey rish loght nyn yannoo, as ny cliaghtaghyn dwoaiagh ta shiu er chur roo: shen-y-fa ta’n cheer eu ny hraartys, as atchim, as mollaght, gyn cummaltagh, myr ec y laa t’ayn jiu.

Jeremiah 9:25

Cur-my-ner, ta ny laghyn cheet, ta’n Chiarn dy ghra, dy jean-yms kerraghey ’ghoaill er ooilley ny gyn-chymmyltee marish ny chymmyltee;

Jeremiah 9:26

Er Egypt, as Judah, as Edom, as cloan Ammon, as Moab, as ooilley ny t’ayns ny corneilyn sodjey magh, ta cummal ’syn aasagh: son ta ooilley ny ashoonyn shoh nyn jymmyltee, as ta ooilley thie Israel nyn jymmyltee ayns cree.

Dobberan 4:11

Ta’n Chiarn er chooilleeney e eulys, t’eh er gheayrtey magh dewilys e yymmoose, as er ghreesey aile ayns Zion, as t’eh er stroie ny undinyn eck.

Ezekiel 16:38

As neem’s uss y vriwnys, myr ta ny mraane ta brishey poosey, as deayrtey fuill er nyn mriwnys, as deayrt-yms dty uill ayns eulys as eadolys.

Ezekiel 18:31

Scarr-jee rish ooilley nyn loghtyn, lioroo ta shiu er ve foiljagh, as jean-jee diu hene cree noa, as spyrryd noa; son cre’n-fa yioghe shiu baase, O hie Israel?

Ezekiel 20:33

Myr ta mee bio ta’n Chiarn Jee dy ghra, son shickyrys, lesh laue niartal, as lesh roih sheeynt magh, as lesh eulys trome reill-yms harrystiu.

Ezekiel 21:17

Neem’s myrgeddin my vassyn y woalley dy cheilley, as ver-ym er my eulys dy ghoaill fea: mish y Chiarn t’er loayrt eh.

Ezekiel 24:13

Ayns dty vroïd ta rouanys; er-yn-oyr dy vel mee er dty ghlenney, as cha beagh oo er dty ghlenney; cha bee oo er dty ghlenney veih dty vroïd arragh, derrey ver-ym er my eulys dy hannaghtyn ort.

Ezekiel 24:8

Son eulys dy heet seose, dy ghoaill kerraghey: ta mee er hoiaghey yn uill eck er baare ny creggey, nagh beagh eh er ny choodaghey.

Ezekiel 44:7

Ayns dy vel shiu er chur lhieu joarreeyn chymmyltagh ayns cree, as chymmyltagh ayns callin stiagh ayns my ynnyd casherick, dy hollaghey eh, eer my hie hene, tra ta shiu chebbal my oural-arran, yn eeh, as yn uill, as t’ad er vrishey my chonaant, liorish ooilley nyn obbraghyn dwoaiagh.

Ezekiel 6:12

Eshyn ta foddey jeh, yiow eh baase jeh’n phaitt, as eshyn ta er-gerrey nee eh tuittym liorish y chliwe, as eshyn ta er-mayrn ayns chennid yn ard-valley, yiow eh baase lesh gortey: myr shoh neem’s my eulys y chooilleeney orroo.

Ezekiel 8:18

Shen-y-fa neem’s myrgeddin dellal roosyn ayns jymmoose; cha jean my hooill gymmyrkey lhieu, chamoo vees chymmey aym orroo: as ga dy vel ad geamagh ayns my chleayshyn lesh ard-choraa, ny-yeih cha der-ym clashtyn daue.

Leviticus 26:28

Eisht beem’s nyn ’oï eu eer ayns dewlys: as mish, mee hene, nee shiuish y smaghtaghey shiaght keayrtyn smoo son nyn beccaghyn.

Leviticus 26:41

As dy vel mish neesht er choyrt cooyl roosyn, as er chur lhiam ad gys cheer nyn noidyn; my vees eisht nyn greeaghyn mee-viallagh er nyn injillaghey, as ad dy ghoaill rish kerraghey nyn beccaghyn:

Amos 5:6

Shir-jee gys y Chiarn, as bee shiu bio, er-aggle dy brish eh magh myr aile ayns thie Yoseph, as stroie eh, as nagh bee unnane erbee dy vooghey eh ayns Beth-el.

Zephaniah 2:2

Roish my vees y decree coyrt ayns bree, roish my jed y laa shaghey myr coau, roish my jig jymmoose y Chiarn dy trome erriu, roish my jean laa eulyssagh y Chiarn berraghtyn erriu.

Romanee 2:25

Son dy firrinagh ta giarey-chymmylt vondeishagh, my t’ou freayll y leigh: agh my t’ou brishey’n leigh, ta dty ghiarey-chymmylt jeant ny an-ghiarey-chymmylt.

Deuteronomy 10:16

Jean-jee, er-y-fa shen, nyn greeaghyn y yiarey-chymmylt, as ny bee-jee ny sodjey creoi-wannallagh.

Deuteronomy 30:6

As nee’n Chiarn dty Yee dty chree y yiarey-chymmylt, as cree dty luight, dy choyrt graih da’n Chiarn dty Yee, lesh ooilley dty chree, as lesh ooilley dt’annym, dy vod oo ve beayn.

Deuteronomy 32:22

Son ta aile er vrishey magh ayns my yymmoose, nee lostey gys y diunid sodjey sheese, as ver eh mow yn thalloo, lesh e bishagh, as ver eh aile fo undinyn ny sleityn.

Colossianee 2:11

Aynsyn ta shiuish myrgeddin er nyn ghiarey-chymmylt lesh y ghiarey-chymmylt jeant fegooish laueyn, ayns coyrt ersooyl corp peccaghyn yn eill, liorish giarey-chymmylt Chreest: