Jeremiah 3:17 - Yn Vible Casherick 1775 1819

¹⁷ Ec y traa shen nee ad genmys Jerusalem stoyl-reeoil y Chiarn; as bee dy chooilley ashoon er ny haglym stiagh ayn, gys ennym y Chiarn, ayns Jerusalem: chamoo nee ad geiyrt ny-sodjey lurg smooinaghtyn yn chree roonagh oc hene.

Jeremiah 3:17 ပူးပေါင်းရင်းမြစ်များ

Genesis 8:21

As ren y Chiarn soiagh dy mie jeh’n oural, as dooyrt y Chiarn ayns e chree, Cha jean-ym arragh yn seihll y stroie er yn aght shoh, er coontey sheelnaue; ga dy vel smooinaghtyn chree dooinney peccoil veih e aegid: chamoo nee’m arragh dagh nhee bio y stroie, myr ta mee er n’yannoo.

1 Reeaghyn 8:41

Myrgeddin, mychione joarree nagh vel jeh dty phobble Israel, agh cheet veih cheer foddey er graih dt’ennym;

Psalmyn 102:23

Ghow eh ersooyl my niart er my yurnah: as ren eh my laghyn giare.

Psalmyn 78:8

Dy voddagh ad nyn dreishteil y choyrt ayns Jee: as gyn obbraghyn Yee y yarrood, agh ny annaghyn echeysyn y reayll.

Psalmyn 87:3

Smooinee-ym er Rahab as Babylon: mâroosyn ta enney oc orrym.

Isaiah 26:8

Dy jarroo, ayns raad dty vriwnyssyn, O Hiarn, ta shin er farkiaght er dty hon; ta yeearree nyn annym gys dty ennym, as gys cooinaghtyn jeed’s.

Isaiah 56:6

Myrgeddin mec y joarree ta lhiantyn ad-hene gys y Chiarn, dy hirveish eh, as dy choyrt graih da ennym y Chiarn, dy ve e hirveishee, dagh unnane ta freayll yn doonaght veih brishey eh, as ta goaill greme er my chonaant;

Isaiah 59:19

Myr shen gowee ad aggle roish ennym y Chiarn veih’n neear, as roish e ghloyr veih irree ny greïney. Tra hig yn noid stiagh myr thooilley, nee Spyrryd y Chiarn troggal seose mergey noi echey.

Isaiah 6:1

Ayns y vleïn hooar ree Uzziah baase, honnick mee yn Chiarn ny hoie er stoyl-reeoil ard as troggit seose, as ren e ghloyr yn chiamble y lhieeney.

Isaiah 66:1

Myr shoh ta’n Chiarn dy ghra, Ta niau my stoyl-reeoil, as y thalloo stoyl my choshey: c’raad ta’n thie hroggys shiu dooys? as cre raad ta ynnyd y fea aym?

Isaiah 66:18

Son shione dou ny obbraghyn as ny smooinaghtyn oc: hig eh gy-kione, dy jean-yms chaglym dy chooilley ashoon as glare; as hig ad, as ver ad my-ner my ghloyr.

Isaiah 66:20

As ver ad lhieu ooilley nyn mraaraghyn son chebbal da’n Chiarn, ass dy chooilley ashoon, er cabbil, as ayns fainee, as er carriads, as er muleyn, as er maase bieau, gys my lieau’s casherick Jerusalem, ta’n Chiarn dy ghra, myr ta cloan Israel coyrt lhieu oural ayns saagh glen gys thie yn Chiarn.

Jeremiah 11:8

Ny-yeih cha dug ad biallys, chamoo ren ad nyn gleaysh y chroymmey, agh jimmee ad dy chooilley ghooinney ayns roonid e chree mee-chrauee hene: shen-y-fa ver-ym lhiam orroo ooilley goan y chonaant shoh hug mee ayns sarey daue dy yannoo; agh cha vel ad er n’yannoo ad.

Jeremiah 12:15

As hig eh gy-kione, lurg dou ve er n’eiyrt ad magh chyndaa-ym reesht, as bee’m chymmoil orroo, as ver-ym lhiam reesht dy chooilley ghooinney gys e eiraght, as dy chooilley ghooinney gys e halloo.

Jeremiah 12:16

As hig eh gy-kione, my nee ad gynsaghey dy kiaralagh raaidyn my phobble, dy crauee loo liorish my ennym’s, gra, Myr ta’n Chiarn bio; (myr dynsee ad my phobble dy loo liorish Baal;) eisht yiow ad cummal shickyr, eer ayns mean my phobble.

Jeremiah 14:21

Ny cur feoh dooin, son graih dty ennym; ny lhig da stoyl-reeoil dty ghloyr ve er ny oltooan: cooinee orrin, ny brish dty chonaant rooin.

Jeremiah 16:12

As ta shiuish er n’yannoo ny smessey na nyn ayraghyn; son cur-my-ner, ta shiu gimmeeaght dy chooilley ghooinney lurg roonid e chree mee-chrauee hene, nagh n’eaisht ad rhym’s;

Jeremiah 16:19

O Hiarn my niart, as my chashtal lajer, as my chemmyrk ’sy laa dy heaghyn, hig ny ashoonee hood’s veih ardjyn sodjey magh yn ooir, as jir ad, Son shickyrys va eiraght nyn ayraghyn ayns breagyn, fardalys, as reddyn gyn ymmyd.

Jeremiah 17:12

Ta stoyl-reeoil ard-ghloyroil veih’n toshiaght ’sy chiamble casherick ain.

Jeremiah 18:12

As dooyrt ad, Cha vel saase nyn gour; agh nee mayd gimmeeaght lurg nyn aghtyn hene, as nee mayd dy chooilley ghooinney geiyrt da smooinaghtyn e chree mee-chrauee hene.

Jeremiah 3:19

Agh dooyrt mee, Kys nee’m uss y ghoaill mastey’n chloan, as cheer aalin y choyrt dhyt, eiraght ooasle ayns ymmodee ashoonyn? As dooyrt mee, Nee oo mish y enmys, My ayr! as cha jean oo chyndaa ersooyl voym.

Jeremiah 31:23

Myr shoh ta Chiarn ny flaunyssee, Jee Israel, dy ghra, Nee ad foast gimraa ny goan shoh ayns cheer Yudah, as ayns ny ard-valjyn oc, tra nee’m yn chappeeys oc y hyndaa, Dy bannee yn Chiarn oo, O ynnyd-vaghee dy chairys, as y cronk dy chasherickys.

Jeremiah 33:9

As bee eh dooys ennym dy voggey, moylley as ooashley mastey ooilley ashoonyn y thallooin, nee clashtyn jeh ooilley my vieys ta mish dy yannoo daue: as gowee ad aggle, as bee ad er-creau, son ooilley ny bannaghtyn, as ooilley yn vaynrys, ta mee dy chosney daue.

Jeremiah 4:2

As shoh myr nee oo loo y ghoaill, Myr ta’n Chiarn bio, ayns firrinys, ayns briwnys, as ayns ynrickys; as nee ny ashoonyn ad hene y vannaghey aynsyn, as aynsyn nee ad boggyssagh.

Jeremiah 7:24

Agh cha ren ad geaishtagh, ny croymmey nyn gleaysh, agh jimmee ad lurg coyrle as smooinaghtyn yn chree roonagh oc hene, as hie ad back, as cha nee er nyn doshiaght.

Jeremiah 9:14

Agh t’ad er n’eiyrt er smooinaghtyn nyn greeaghyn hene, as er Baalim, myr dynsee nyn ayraghyn daue:

Ezekiel 1:26

As erskyn yn aer va harrish nyn ghing, va co-chaslys stoyl-reeoil, goll-rish clagh sapphire, as er co-chaslys yn stoyl-reeoil va myr dy beagh eh jalloo dooinney er-y-skyn.

Ezekiel 43:7

As dooyrt eh rhym, Vac y dooinney, shoh ynnyd my stoyl-reeoil, as ynnyd boyn my choshey, raad nee’m cummal mastey cloan Israel son dy bragh, as cha jean cloan Israel ny-sodjey my ennym’s casherick y vee-ooashlaghey, chamoo ad-hene, ny nyn reeaghyn, liorish nyn maarderys, ny liorish jallooyn nyn reeaghyn ayns nyn ard-ynnydyn.

Ezekiel 48:35

Va’n slane towshan mygeayrt hoght thousaneyn jeig dy howshanyn: as bee ennym yn ard-valley veih yn laa shen, Ta’n CHIARN ayns shen.

Zechariah 2:11

As bee ymmodee ashoonee ayns y laa shen er ny lhiantyn gys y Chiarn, as bee ad my phobble: as neem’s cummal ayns y vean ayd’s, as bee fys ayd, dy vel Chiarn ny flaunyssee er my choyrt hood’s.

Zechariah 8:8

As ver-ym lhiam ad, as nee ad cummal ayns mean Yerusalem, as bee ad my phobble’s, as beem’s yn Jee ocsyn ayns firrinys as ynrickys.

Earrooyn 15:39

As bee’n fringe diu son cowrey, dy vod shiu jeeaghyn er, as cooinaghtyn er ooilley saraghyn y Chiarn, as cooilleeney ad: as nagh jed shiu lurg nyn gree hene, as ny sooillyn eu hene, myr bollagh shiu goll er-shaghryn:

Romanee 1:21

Er-yn-oyr tra va toiggal oc dy Yee, cha ren ad eh y ghloyraghey myr Jee, chamoo v’ad booisal, agh haink ad dy ve fardalagh ayns nyn smooinaghtyn; as va’n cree ommijagh oc fo dorraghys.

Romanee 6:14

Son cha bee pooar ec peccah harrishdiu: son cha vel shiu fo’n leigh, agh fo grayse.

Galatianee 4:26

Agh Jerusalem ta heose, t’ee seyr; shoh ee ta’n voir ain ooilley.

Deuteronomy 29:29

Ta folliaghtyn bentyn gys y Chiarn nyn Yee; agh ta ny reddyn shen ta er ny hoilshaghey, bentyn dooinyn, as da nyn gloan son dy bragh, dy vod mayd ooilley goan y leigh shoh y chooilleeney.

Briwnyn 2:19

As haink eh gy-kione, tra va’n briw marroo, dy dug ad cooyl as ren ad ny smessey na nyn ayraghyn, ayns geiyrt er jeeghyn elley dy hirveish ad, as dy chroymmey sheese huc: cha scuirr ad veih nyn obbraghyn, ny veih’n drogh-yannoo oc hene.