Jeremiah 27:9 - Yn Vible Casherick 1775 1819

⁹ Shen-y-fa ny cur-jee geill da ny phadeyryn eu, ny da ny fallogyssee, ny da ny ashleyderyn, ny da ny druaiaghtee, ny da ny fir-obbee eu, ta loayrt riu, gra, Cha jean shiu shirveish ree Vabylon.

Jeremiah 27:9 ပူးပေါင်းရင်းမြစ်များ

Exodus 22:18

Cha n’uillee oo buitch dy ve bio.

Exodus 7:11

Eisht hug Pharaoh myrgeddin fys er ny deiney creeney as ny fir-obbee: nish ren fir-obbee Egypt neesht, er yn aght cheddin, lesh nyn obbeeys:

Raaghyn Creeney 19:27

Cur twoaie, my vac, nagh n’eaisht oo rish y drogh ynsagh shen, ver oo er-shaghryn voish coyrle vie.

Isaiah 8:19

As tra jir ad riu, Gow-jee coyrle jeusyn ta spyrrydyn faishnee oc, as jeh ny fir-obbee, ta meekeyragh as tassane; nagh lhisagh pobble briaght jeh nyn Yee? cha nee ny bioee jeh ny merriu?

Jeremiah 14:14

Eisht dooyrt y Chiarn rhym, Ta ny phadeyryn jannoo phadeyrys breagagh ayns m’ennym’s; cha dug mee ad er y chaghteraght shoh, chamoo hug mee sarey daue, chamoo loayr mee roo: t’ad fockley magh diu ashlish foalsey, as faishnaghyn breagagh, as red gyn veg, as molteyrys yn chree oc hene.

Jeremiah 23:16

Myr shoh ta Chiarn ny sheshaghtyn flaunyssagh dy ghra, Ny eaisht-jee rish goan ny phadeyryn ta phadeyrys diu; cha vel ad agh jannoo molteyrys erriu; t’ad loayrt ashlish ass nyn gree hene, as cha nee veih beeal y Chiarn.

Jeremiah 23:25

Ta mee er chlashtyn cre dooyrt ny phadeyryn ren phadeyrys breagyn ayns my ennym’s, gra, Ta dreamal er ve aym, ta dreamal er ve aym.

Jeremiah 23:32

Cur-my-ner, ta mish noi adsyn ta branlaadee dreamallyn foalsey, ta’n Chiarn dy ghra, as ta dy insh ad, as cur my phobble er-shaghryn lesh nyn mreagyn, as nyn molteyrys; ga nagh dug mee ad er chaghteraght, chamoo hug mee currym erbee orroo: shen-y-fa cha bee ad jeh foaynoo erbee da’n pobble shoh, ta’n Chiarn dy ghra.

Jeremiah 29:8

Son myr shoh ta Chiarn ny sheshaghtyn flaunyssagh, Jee Israel, dy ghra, Ny lhig da ny phadeyryn eu, as ny fallogyssee, ta nyn mastey, shiu y volley, as ny cur-jee geill da ny dreamallyn eu ta shiu er ghreamal.

Ezekiel 21:29

Choud’s t’ad fakin fardalys er dty hon, choud’s t’ad faishnys breagyn dhyt, dy jean oo greimmey ny mwannallyn ocsyn ta craghit, ny mee-chrauee ta’n laa trome er jeet orroo, as nyn mee-chairys ec kione.

Daniel 4:7

Eisht haink ny deiney-creeney, ny rollageydee, ny Caldeanee, as ny fir-faishnee, as dinsh mee daue yn dreamal, agh cha dug ad bun erbee er.

Micah 3:7

Eisht, bee ny fakyderyn, naareydagh, as ny phadeyryn ec kione nyn geiley: dy jarroo, nee ad ooilley coodaghey nyn meillyn, son nagh vel ansoor oc veih Jee.

Zechariah 10:2

Son ta ny jallooyn er loayrt fardalys, as ny fir-obbee er vakin breg, as t’ad er n’insh dreamallyn foalsey: t’ad gerjaghey ayns fardail: shen-y-fa hie ad rhymboo myr shioltane, v’ad seaghnit, er-yn-oyr nagh row bochilley erbee harrystoo.

Malachi 3:5

As hig-yms chion erriu gys briwnys; as beem’s my eanish gyere noi ny fir-obbee, as noi ocsyn ta brishey poosey, as noi ny looderyn-oaiagh, as noi ocsyn ta chionney er y labree ayns e aill, as jannoo tranlaase er y ven-treoghe, as er y chloan gyn ayr, as ta lhiettal veih’n joarree e chair, as nagh vel goaill aggle roym’s, ta Chiarn ny flaunyssee dy ghra.

Jannoo 8:11

As da shoh v’ad arrymagh, er-y-fa dy row eh ry-foddey er chur shaghrynys orroo lesh yn obbeeys echey.

Ephesianee 5:6

Ny lhig da dooinney erbee shiu y volley lesh goan fardalagh: son kyndagh rish ny reddyn shoh ta corree Yee cheet er cloan y vee-viallys.

Deuteronomy 13:2

As y cowrey ny yn yindys loayr eh jeh dy haghyrt, as dy jir eh rhyt, Lhig dooin geiyrt da jeeghyn elley (nagh bione dhyt) as lhig dooin shirveish ad.

Deuteronomy 18:14

Son deaisht ny ashoonyn shoh, t’ou dy gheddyn son eiraght, roosyn ta coyrt geill da traaghyn, as rish fir-obbee: agh er dty hon’s, cha vel y Chiarn dty Yee lowal dhyt’s dy yannoo y lheid.

Joshua 13:22

Balaam myrgeddin, mac Beor, yn fer-obbee ren cloan Israel y varroo lesh y chliwe mâroosyn huitt ’sy chaggey.

Ashlish 18:23

As cha jean soilshey cainleagh arragh soilshean aynyd; as cha bee coraa yn dooinney-poosee ny yn ven-phoosee arragh edyr ry-chlashtyn aynyd: son va ny marchanyn ayd’s deiney mooarey’n theihll; son liorish dty obbeeys va dy chooilley ashoon er ny volley:

Ashlish 21:8

Agh adsyn ta faitagh, as mee-chredjuagh, as adsyn ta cur rish obbraghyn dwoaiagh, as dunveryn, as maarderee, as fir-obbee, as jallooderyn, as dy chooilley vreagerey, yiow nyn gronney ’sy logh ta lossey lesh aile as brimstone: shen y nah vaase.

Ashlish 22:15

Son cheu-mooie ta moddee, as fir-obbee, as maarderee, as dunveryn, as adsyn ta cur ooashley da jallooyn, as quoi-erbee shynney lesh as ta jannoo breg.

Ashlish 9:21

Chamoo ghow ad arrys jeh’n dunverys oc, ny jeh’n obbeeys oc, ny jeh nyn maarderys, ny jeh nyn maarlys.