Jeremiah 27:8 - Yn Vible Casherick 1775 1819

⁸ As hig eh gy-kione, yn ashoon as yn reeriaght nagh jean shirveish Nebuchadnezzar cheddin ree Vabylon, as nagh der nyn mwannal fo quing ree Vabylon, yn ashoon shen neem’s smaghtaghey, ta’n Chiarn dy ghra, lesh y chliwe, as lesh y ghortey, as lesh y chramp, derrey veem’s er stroie ad liorish y laue echeysyn.

Jeremiah 27:8 ပူးပေါင်းရင်းမြစ်များ

Jeremiah 24:10

As ver-ym yn cliwe, yn ghortey, as y chramp, ny mast’ oc, derrey vees kione orroo ’sy cheer hug mee dauesyn as da nyn ayraghyn.

Jeremiah 25:9

Cur-my-ner, ver-ym fys as goym ooilley ashoonyn y twoaie, ta’n Chiarn dy ghra, as Nebuchadrezzar ree Vabylon my harvaant, as ver-ym lhiam ad noi yn cheer shoh, as noi ny cummaltee eck, as noi ooilley ny cheeraghyn shoh ta mygeayrt-y-mood, as stroie-ym ad ooilley, as nee’m ad dy ve son atchim, as son oltooan, as son traartys foddey-beayn.

Jeremiah 27:11

Agh ny ashoonyn ta coyrt nyn mwannal fo quing ree Vabylon, as dy hirveish eh, adsyn faag-yms er-mayrn ayns y cheer oc hene, ta’n Chiarn dy ghra; as nee ad laboraght as cummal ayn.

Jeremiah 27:13

Cre’n-fa yinnagh shiu cherraghtyn, uss as dty phobble, liorish y chliwe, lesh y ghortey, as y chramp, myr ta’n Chiarn er loayrt noi’n ashoon ta gobbal shirveish ree Vabylon?

Jeremiah 28:14

Son myr shoh ta Chiarn ny flaunyssee, Jee Israel, dy ghra, Ta mee er choyrt quing yiarn er mwannal ooilley ny ashoonyn shoh, dy vod ad shirveish Nebuchadnezzar ree Vabylon; as nee ad shirveish eh: as ta mee er choyrt dasyn beïyn y vagheragh myrgeddin.

Jeremiah 28:4

As ver-ym lhiam reesht gys y voayl shoh Jeconiah mac Yehoiakim ree Yudah, marish ooilley cappeeyn Yudah, hie gys Babylon, ta’n Chiarn dy ghra: son brish-yms quing ree Vabylon.

Jeremiah 29:17

Ad shoh goan Chiarn ny sheshaghtyn flaunyssagh, Cur-my-ner, ver-yms orroo yn cliwe, yn ghortey, as y chramp, as nee’m ad y yannoo myr figgyn loau, nagh vod ve eeit, t’ad cha olk shen.

Jeremiah 29:18

As ver-ym eiyrtys orroo lesh y chliwe, yn ghortey, as y chramp, as nee’m ad y livrey dy ve scughit gys dy chooilley reeriaght ’sy theihll, dy ve son mollaght, as atchim, as faghid, as an-ghoo, mastey dy chooilley ashoon raad ta mee er n’eiyrt ad:

Jeremiah 40:9

As ren Gedaliah mac Ahikam, mac Shaphan, breearrey daue hene, as da ny deiney va mâroo, gra, Ny gow-jee aggle dy ve fo ammys ny Caldeanee; cum-jee ayns y cheer, as shirveish-jee ree Vabylon, as hig shiu jeh dy mie.

Ezekiel 14:21

Son shoh myr ta’n Chiarn Jee dy ghra, Cre-woad smoo, tra ver-ym my chiare briwnyssyn trome er Jerusalem, yn cliwe, as y ghortey, as ny beishtyn dewilley, as y phaitt, dy yiarey jeh dooinney as baagh?