Jeremiah 23:3 - Yn Vible Casherick 1775 1819

³ As nee’m fooilliagh my hioltane y haglym ass dy chooilley heer raad ta mee er n’eiyrt ad, as ver-ym lhiam ad reesht gys nyn mwoailtchyn hene; as bee ad messoil as nee ad bishaghey.

Jeremiah 23:3 ပူးပေါင်းရင်းမြစ်များ

Jeremiah 16:15

Agh, ta’n Chiarn bio hug lesh seose cloan Israel veih’n cheer my-hwoaie, as veih dy chooilley heer raad va mee er n’imman ad: as ver-ym lhiam ad reesht gys y cheer oc hene hug mee da nyn ayraghyn.

Jeremiah 29:14

As yiow shiu mish foayroil diu, ta’n Chiarn dy ghra; as chyndaa-yms ersooyl yn cappeeys eu, as neem’s shiu y haglym ass dy chooilley ashoon, as veih dy chooilley ynnyd, raad ta mee er n’eiyrt shiu, dooyrt y Chiarn; as ver-ym lhiam shiu reesht gys y voayl veih shen deiyr mee shiu gys cappeeys.

Jeremiah 30:10

Shen-y-fa ny gow aggle, O my harvaant Jacob, ta’n Chiarn dy ghra; as ny lhig sheese, dty chree, O Israel: son cur-my-ner saue-yms oo veih foddey, as dty luight veih cheer nyn gappeeys; as nee Jacob chyndaa, as bee eh ayns shee as sauchys, as cha bee eh ayns aggle roish noid erbee.

Jeremiah 30:3

Son cur-my-ner, ta ny laghyn cheet, ta’n Chiarn dy ghra, dy jyndaa-yms reesht cappeeys my phobble Israel as Judah, ta’n Chiarn dy ghra; as ver-yms orroo dy hyndaa gys y cheer hug mee da nyn ayraghyn, as yiow ad eh ayns nyn gummal.

Jeremiah 31:7

Son myr shoh ta’n Chiarn dy ghra, Gow-jee arrane lesh gennallys son Jacob, as trog-jee seose nyn goraa mastey ny ard-ashoonyn: insh-jee magh eh, cur-jee moylley, as abbyr-jee, O Hiarn, saue dty phobble, ta er-mayrn jeh Israel.

Jeremiah 31:8

Cur-my-ner, ver-ym lhiam ad veih’n cheer twoaie, as nee’m ad y haglym veih ardjyn sodjey magh y thallooin, as mâroosyn y doal as y baccagh, y ven torragh, as ish ta er-gerrey da’n traa dy cheilley: nee sheshaght vooar chyndaa reesht gys shen.

Jeremiah 32:37

Cur-my-ner, chaglym’s ad ass dy chooilley heer raad deiyr mee ad ayns my chorree, as ayns my eulys, as my yymmoose hrome; as ver-ym lhiam ad reesht gys yn ynnyd shoh, as ver-yms orroo dy chummal ayns sauchys:

Jeremiah 46:27

Agh ny bee aggle ort’s, O my harvaant Jacob, as ny lhig dty chree voïd, O Israel: son cur-my-ner, nee’m oo y haglym veih ardjyn foddey jeh, as dty luight veih cheer nyn gappeeys; as nee Jacob chyndaa, as bee eh ec aash as ec fea, as cha der noid erbee aggle er.

Jeremiah 50:19

As ver-ym lhiam Israel reesht gys e ynnyd-vaghee hene, as nee eh gyndyr er Carmel as Bashan, as bee yn annym echey jeant magh er cronk Ephraim as Gilead.

Jeremiah 8:3

As bee’n baase, as cha nee bioys, er ny ghoaill myr reih liorish ooilley yn jeelym jeusyn vees er-mayrn jeh’n cheeloghe vee-chrauee shoh, vees faagit bio ayns dy chooilley voayl raad ta mee er n’eiyrt ad, ta Chiarn ny pooaraghyn flaunyssagh dy ghra.

Ezekiel 11:17

Shen-y-fa, abbyr uss, Myr shoh ta’n Chiarn Jee dy ghra, Ver-yms lhiam shiu dy jarroo veih mastey yn pobble, as neem’s shiu y haglym ass ny cheeraghyn, raad va shiu er nyn skeayley, as ver-yms diu thalloo Israel.

Ezekiel 36:11

As nee’m bishaghey diuish dooinney as baagh, as hig ad er nyn doshiaght, as bee ad messoil, as nee’m shiu y hoiaghey seose myr va shiu roïe: as nee’m ny share er nyn son na ec yn toshiaght eu, as bee fys eu dy nee mish y Chiarn.

Ezekiel 36:24

Son goyms shiu veih mastey ny ashoonee, as chaglym shiu ass ooilley ny cheeraghyn, as ver-ym lhiam shiu gys nyn dhalloo hene.

Ezekiel 36:37

Myr shoh ta’n Chiarn Jee dy ghra, Nee thie Israel foast shirrey hym dy yannoo shen er nyn son; nee’m adsyn y vishaghey lesh deiney myr shioltane.

Leviticus 26:9

Son neem’s soiaghey jiuish, as jannoo shiu messoil, as bishaghey shiu, as niartaghey my chonaant riu.

Micah 2:12

Nee’m, son shickyrys, chaglym, O Yacob, dagh unnane jeed: nee’m dy firrinagh chaglym fooilliagh Israel, ver-ym lhiam ad cooidjagh myr kirree Vozrah, myr shioltane ayns mean nyn mwoaillee, nee ad feiyr mooar y yannoo son ny earrooyn dy leih.

Micah 7:12

Er y laa shen myrgeddin hig eh stiagh hood eer veih Assyria, as veih ny ard-valjyn lajer voallit, as veih’n chashtal eer gys yn awin, as veih faarkey gy faarkey, as veih slieau gy slieau.