Jeremiah 16:6 - Yn Vible Casherick 1775 1819

⁶ Yiow chammah beg as mooar baase ’sy cheer shoh: cha bee ad er nyn oanluckey, chamoo nee sleih dobberan er nyn son, tayrn fuill orroo hene, ny jannoo ad-hene meayl er nyn son.

Jeremiah 16:6 ပူးပေါင်းရင်းမြစ်များ

2 Recortyssyn 36:17

Shen-y-fa hug eh lesh orroo ree ny Caldeanee, ren ny deiney aegey oc y varroo lesh y chliwe, ’sy chiamble casherick, as cha row chymmey erbee oc er dooinney aeg, ny moidyn, er shenn ghooinney, ny ersyn va croymmey lesh eash: livrey eh ad ooilley gys e laue.

Isaiah 22:12

As er y laa shen ren y Chiarn, Jee ny flaunyssee, geamagh erriu gys keayney, as gys dobberan, as gys meaylid, as dy chur erriu aanrit-sack:

Isaiah 24:2

As shen myr vees eh, dy jean y pobble as y saggyrt farrail co-laik; yn fer-mooinjerey as e vainshtyr; yn charvaant as e ben-ainshtyr; yn kionneyder as y creckeyder; yn eeaseyder as yn eeaseydagh; yn tackeyder as yn tackeydagh; dy jean ad ooilley farrail co-laik.

Jeremiah 13:13

Eisht jir oo roo, Myr shoh ta’n Chiarn dy ghra, Cur-my-ner, lhieen-yms ooilley cummaltee yn cheer shoh, eer ny reeaghyn ta soie er stoyl-reeoil Ghavid, as ny saggyrtyn, as ny phadeyryn, as ooilley cummaltee Yerusalem, lesh meshtallys.

Jeremiah 16:4

Yiow ad baase atchimagh: cha bee dobberan jeant er nyn son, chamoo vees ad er n’oanluckey; agh bee ad myr eoylley er eaghtyr y thallooin; as hed ad er stroie lesh y chliwe, as lesh gortey; as bee ny callinyn oc son beaghey da eeanlee yn aer, as son beishtyn y thallooin.

Jeremiah 41:5

Dy daink shiartanse veih Shechem, veih Shiloh, as veih Samaria, eer kiare-feed dooinney, lesh nyn aasaagyn baarit, as nyn eaddagh raipit, as fuill roie orroo, lesh chebballyn as ourallyn incense nyn laue, dy choyrt lhieu ad gys altar y Chiarn.

Jeremiah 47:5

Ta Gaza er n’aase meayl; ta Ashkelon er ny yiarey jeh marish jeelym ny glionney: caïd nee oo lhottey oo hene?

Jeremiah 48:37

Son bee dy chooilley chione meayl, as dy chooilley aasaag baarit: er dy chooilley laue vees geulaghyn, as aanrit-sack er nyn meeghyn.

Jeremiah 7:29

Giare jeed dty olt, O Yerusalem, as tilg voïd eh, as trog seose dobberan er ny ard-ynnydyn; son ta’n Chiarn er n’yiooldey voish as er hreigeil sheeloghe e yymmoose.

Jeremiah 8:2

As nee ad skeayley ad roish y ghrian, as yn eayst, as slane armee rollageagh yn aer, orroosyn va nyn ghraih soit, as adsyn t’ad er hirveish, as nyn lurg t’ad er n’immeeaght, as hucsyn ren ad shirrey, as daue hug ad ooashley: cha bee ad er nyn jaglym, ny er nyn oanluckey; bee ad son eoylley er eaghtyr y thallooin.

Leviticus 19:27

Cha jean shiu baarey nyn ghing runt mygeayrt, chamoo nee oo mhilley cummey dty aasaag.

Leviticus 19:28

Cha jean shiu giaraghyn y choyrt ayns yn eill eu son ny merriu, ny cronnyn erbee y choyrt erriu: Mish y Chiarn.

Amos 6:11

Son cur-my-ner, ta’n Chiarn coyrt sarey, as nee eh bwoalley yn thie ard lesh brishaghyn, as yn thie s’inshley lesh scoltaghyn.

Noo Mian 9:23

As tra va Yeesey er jeet stiagh ayns thie yn er-reill, as tra honnick eh ny bardoonee, as y cheshaght ooilley ’syn un chiaull.

Deuteronomy 14:1

Shiuish cloan y Chiarn nyn Yee: cha jean shiu giarey shiu hene, ny meaylid erbee y yannoo erskyn nyn sooillyn son ny merriu.

Ashlish 20:12

As honnick mee ny merriu, beg as mooar, nyn shassoo fenish Yee; as va ny lioaryn foshlit: as va lioar elley foshlit, ta lioar y vea: as va ny merriu er nyn mriwnys liorish ny reddyn shen va scruit ayns ny lioaryn, cordail rish nyn obbraghyn.

Ashlish 6:15

As ren reeaghyn y thallooin, as ny ard-gheiney, as ny berchee, as ny ard-chaptanyn, as ny deiney pooaral, as dy chooilley ghooinney ayns bondiaght, as ooilley ayns seyrsnys, ad-hene y ollaghey ayns ooigyn, as fo creggyn ny sleityn.