Jeremiah 15:9 - Yn Vible Casherick 1775 1819

⁹ T’eeish t’er n’ymmyrkey shiaght dy chloan raad y vaaish; t’ee er phaartail; ta’n ghrian er n’gholl sheese urree choud as va’n laa foast ayn; v’ee coodit lesh nearey as atchim: as yn fooilliagh jeu livrey-ym da’n chliwe roish ny noidyn oc, ta’n Chiarn dy ghra.

Jeremiah 15:9 ပူးပေါင်းရင်းမြစ်များ

Isaiah 47:9

Agh berree yn daa red shoh ort’s ’sy tullogh, er yn un laa, baase clienney, as treoghys: hig ad ort dy dewil kyndagh rish earroo mooar dty phishagyn, as dty ymmodee obbeeys.

Jeremiah 19:7

As ver-ym shaghrynys er coyrle Yudah as Yerusalem ’sy voayl shoh; as ver-ym orroo tuittym liorish y chliwe roish nyn noidyn, as liorish ny laueyn ocsyn ta shirrey nyn mioys; as ver-ym ny kirp oc son beaghey da eeanlee’n aer, as da beishtyn y thallooin.

Jeremiah 21:7

As ny lurg shen, ta’n Chiarn dy ghra, neem’s Zedekiah ree Yudah, as e harvaantyn, as e phobble, as fooilliagh y chramp ’syn ard-valley shoh, as ny ta faagit veih’n chliwe, as veih’n ghortey, y livrey gys laue Nebuchadrezzar ree Vabylon, as gys laue nyn noidyn, as gys y laue ocsyn ta shirrey nyn mioys: as nee eh ad y woalley lesh foyr y chliwe; cha jean eh foayr y yeeaghyn daue, chamoo vees chymmey ny myghin echey orroo.

Jeremiah 44:27

Cur-my-ner bee sooill aym’s orroo son olk, as cha nee son mie; as bee ooilley deiney Yudah ta ayns cheer Egypt er nyn stroie liorish y chliwe as liorish y chramp, derrey vees slane jerrey orroo.

Jeremiah 50:12

Bee nyn moir dy mooar seaghnit; bee ish dymmyrk shiu er-nearey: cur-my-ner, bee ish unnane jeh ny ashoonyn s’fardalee, faasagh, thalloo sponkit as reeastaneagh.

Jeremiah 6:4

Fow-jee aarloo dy chaggey n’oï; trog-jee, as lhig dooin goll seose ec y vun-laa. Smerg dooinyn! son ta’n laa goll shaghey, son ta scadooyn yn astyr er ny heeyney magh.

Jeremiah 7:19

Vel ad brasnaghey mish gys corree? ta’n Chiarn dy ghra: nagh nee ad-hene t’ad dy vrasnaghey, gys nearey nyn eddin hene?

Dobberan 1:1

Kys ta’n ard-valley va lane dy leih soie ny lhome-lomarcan! kys t’ee er jeet dy ve myr ben-treoghe! ish s’ooasle va mastey ny ashoonyn, as princess mastey ny rheamyn, kys t’ee er jeet dy ve fo keesh!

Dobberan 4:10

Ta laueyn ny mraane erreeishagh er n’aarlagh yn chloan oc hene, v’ad yn beaghey oc ayns toyrt-mow inneen my phobble.

Ezekiel 5:12

Yiow yn trass ayrn jeed baase lesh y phaitt, as lesh gortey bee ad er ny choyrt mow cheu-sthie jeed; as nee trass ayrn tuittym liorish y chliwe mygeayrt-y-mood; as trass ayrn nee’m y skeayley lesh dy chooilley gheay, as nee’m cliwe y hayrn geiyrt orroo.

Ezekiel 5:13

Myr shoh vees my chorree er ny chooilleeney, as ver-ym er my yymmoose dy hannaghtyn orroo, as bee’m er my gherjaghey: as bee fys oc dy nee mish y Chiarn, t’er loayrt eh ayns my eulys, tra ta mee er ghoaill cooilleeney my yymmoose orroo.

1 Samuel 2:5

T’adsyn va lane er vailley ad hene magh son arran; as ta ny accryssee er nyn yannoo magh: myr shen dy vel yn ven ghennish er n’ymmyrkey shiaght; as ish va ymmodee cloan eck er choayl e bree.