Jeremiah 15:3 - Yn Vible Casherick 1775 1819

³ As ver-yms kiare briwnyssyn magh orroo, ta’n Chiarn dy ghra; yn cliwe dy varroo, as ny moddee dy raipey, as eeanlee’n aer, as beishtyn yn ooir, dy chur mow as dy yannoo jeeill.

Jeremiah 15:3 ပူးပေါင်းရင်းမြစ်များ

Psalmyn 68:23

Dy vod dty chass ve er ny hummey ayns fuill dty noidyn: as dy vod chengey dty voddee ve jiarg lesh yn uill cheddin.

Isaiah 18:6

Bee ad faagit cooidjagh da eeanlee ny sleityn, as da maase y vagheragh; nee ny eeanlee tannaghtyn orroo car y touree, as maase y vagheragh car y yeuree.

Jeremiah 12:9

Ta my eiraght dooys myr yn hullad spottagh; ta ny eeanlee ooilley mygeayrt ec noidys r’ee; tar-jee, chaggle-jee ooilley beïyn y vagher, tar-jee dy stroie.

Jeremiah 14:12

Tra t’ad freayll trostey, cha n’eaisht-ym rish yn accan oc; as tra t’ad jannoo oural-losht as chebballyn, cha jean-ym soiaghey jeu; agh ver-ym mow ad lesh y chliwe, as lesh y ghortey, as lesh y chramp.

Jeremiah 14:16

As bee yn pobble daue t’ad phadeyrys er nyn dilgey magh ayns straïdyn Yerusalem, kyndagh rish y ghortey as y cliwe; as cha bee unnane erbee dy oanluckey ad, ad-hene, nyn mraane, ny nyn mec, ny nyn inneenyn; son neem’s kerraghey nyn mee-chraueeaght y gheayrtey magh orroo.

Jeremiah 16:4

Yiow ad baase atchimagh: cha bee dobberan jeant er nyn son, chamoo vees ad er n’oanluckey; agh bee ad myr eoylley er eaghtyr y thallooin; as hed ad er stroie lesh y chliwe, as lesh gortey; as bee ny callinyn oc son beaghey da eeanlee yn aer, as son beishtyn y thallooin.

Jeremiah 7:33

As bee callinyn y phobble shoh son beaghey da eeanlee’n aer, as son beishtyn y thallooin; as cha jean unnane erbee ad y agglagh ersooyl.

Dobberan 3:11

T’eh er hyndaa dy lhiattee my raaidyn, as er my raipey ayns peeshyn; t’eh er my yannoo follym-faase.

Ezekiel 14:21

Son shoh myr ta’n Chiarn Jee dy ghra, Cre-woad smoo, tra ver-ym my chiare briwnyssyn trome er Jerusalem, yn cliwe, as y ghortey, as ny beishtyn dewilley, as y phaitt, dy yiarey jeh dooinney as baagh?

Ezekiel 33:27

Abbyr uss myr shoh roosyn, Shoh myr ta’n Chiarn Jee dy ghra, Myr ta mish bio, nee adsyn t’ayns ny fadaneyssyn son shickyrys tuittym liorish y chliwe, as eshyn ta ’sy vagher foshlit ver-yms da ny beishtyn, dy ve stroit: as adsyn t’ayns ny cashtallyn, as ny guaggyn yiow ad baase jeh’n phlaih.

Leviticus 26:16

Shoh myrgeddin neem’s y yannoo riuish, ver-yms lhiam erriu atchim, consumption, as crayn-losht, ver naardey’n soilshey, as cur sneih er y chree; nee shiu cuirr nyn sheel ayns fardail, son nee nyn noidyn gee eh.

Leviticus 26:22

Nee’m marish shoh cur beishtyn feïe ny-vud eu, nee spooilley shiu jeh nyn gloan, as stroie nyn maase, as jannoo shiuish beggan ayns earroo; as bee nyn raaidyn mooarey treigit.

Leviticus 26:25

As ver-yms lhiam y chliwe erriu, nee cooilleeney ’ghoaill erriu son brishey my chonaant: as tra ta shiu er nyn jaglym cooidjagh ayns nyn ard-valjyn, ver-yms y plague ny-vud eu; as bee shiu er nyn livrey gys laueyn nyn noidyn.

Amos 5:19

Myr dooinney ta chea veih lion, as meeiteil muc-awin: ny goll stiagh gys e hie, as lhie e laue er y voalley, as ard-nieu dy lhottey eh.

Deuteronomy 28:26

As bee dty challin son beaghey, da ooilley eeanlee’n aer, as da beishtyn ny hooirey, as cha jean dooinney erbee nyn agglaghey ersooyl.

Deuteronomy 32:24

Bee ad losht lesh gortey, as er nyn stroie lesh smarageyn loshtee, as lesh toyrt-mow atchimagh: lhig-ym feayshlit orroo myrgeddin feeacklyn beishtyn feïe, lesh pyshoon ard-nieughyn ny hooirey.

Ashlish 6:8

As yeeagh mee, as cur-my-ner, cabbyl banee; as va ennym yn varkiagh v’er, yn Baase, as yn oaie geiyrt er: as va pooar currit daue harrish y chiarroo ayrn jeh’n thalloo, dy varroo lesh y chliwe, as lesh gortey, as lesh baase, as lesh beïyn feïe y thallooin.