Jeremiah 14:2 - Yn Vible Casherick 1775 1819

² Ta Judah dobberan, as ny giattyn eck goll naardey; t’ad doogh er y thalloo, as ta eam Yerusalem er droggal.

Jeremiah 14:2 ပူးပေါင်းရင်းမြစ်များ

Lioar Yob 34:28

Myr shen dy vel ad cur er accan y voght dy heet huggey, as t’eh clashtyn eam yn seaghnit.

Psalmyn 144:14

Dy vod ny dew ain ’ve lajer son obbyr, nagh bee assee erbee: ny veg y chappeeys, ny oyr gaccan ayns nyn straidyn.

Exodus 2:24

As cheayll Jee nyn osnaghyn, as chooinee Jee er e chonaant rish Abraham, rish Isaac, as rish Jacob.

Isaiah 15:5

Nee my chree dobberan son Moab; nee ny scapailtee echey chea gys Zoar, myr colbagh three bleeaney: son lesh keayney hed ad seose lesh ughtagh Luhith; son ayns raad Horonaim troggee ad eam traartys.

Isaiah 24:11

Ta yllaghey son feeyn ayns ny straïdyn, ta dy chooilley voggey er ny vooghey, ta gennallys yn cheer er n’immeeaght.

Isaiah 24:4

Ta’n cheer dobberan as shymley ersooyl; ta’n seihll gannooinaghey, as lheïe ersooyl; ta mooaralee mooar y theihll ayns doogh-treihys.

Isaiah 24:7

Ta’n feeyn noa goll eig, ta’n billey-feeyney fioghey, ta ooilley yn vooinjer ghennal-chreeagh gosnaghey.

Isaiah 3:26

As nee ny giattyn eck keayney as dobberan, as ee hene lhie treigit er y thalloo.

Isaiah 33:9

Ta’n cheer dobberan, as lheïe ersooyl; ta Lebanon er ny leodaghey as giarit sheese; ta Sharon myr yn aasagh; ta Bashan as Carmel craa nyn mess jeu.

Isaiah 5:7

Son ta lught-thie Israel garey-feeyney Chiarn ny flaunyssee, as ta deiney Yudah yn billey eunyssagh echey: as yeeagh eh son briwnys, agh cur-my-ner tranlaase; son cairys, agh cur-my-ner eam.

Jeremiah 11:11

Shen-y-fa myr shoh ta’n Chiarn dy ghra, Cur-my-ner, ver-ym lhiam olk orroo, nagh vod ad shaghney; as ga dy n’eam ad hym, cha der-ym clashtyn daue.

Jeremiah 12:11

T’ad er n’yannoo eh follym-faase, as nish te ny hraartys te gaccan hym; ta’n slane cheer er ny choyrt naardey, er-yn-oyr nagh vel dooinney erbee dy ghoaill shoh gys e chree.

Jeremiah 12:4

Caïd nee’n cheer dobberan, as glassyraght dy chooilley vagher fioghey, kyndagh rish mee-chraueeaght ny cummaltee? ta’n maase shymley ersooyl, as ny eeanlee; son dy dooyrt ad, Cha vel sooill echey er nyn raaidyn.

Jeremiah 18:22

Lhig da yllagh ve er ny chlashtyn veih nyn dhieyn, tra ver oo lhiat troop-caggee doaltattym orroo; son t’ad er chleiy ooig dy my ghoaill, as er hoiaghey ribbaghyn follit son my chassyn.

Jeremiah 4:28

Son shoh nee’n thalloo dobberan, as bee ny niaughyn heose ayns doo-dorraghys: er-y-fa dy vel mee er loayrt eh, ta foym dy bee eh jeant, as cha jean-ym arrys y ghoaill, chamoo nee’m shen y chaghlaa.

Jeremiah 46:12

Ta ny ashoonyn er chlashtyn jeh dty nearey, as ta’n eam ayd’s er lhieeney yn cheer: son ta’n dooinney niartal er snapperal noi yn dooinney niartal, as t’ad er duittym dy cheilley.

Jeremiah 8:21

Son doghan inneen my phobble ta mee doghanit; ta mee ’sy dorraghys doo; ta atchim er my ghreimmey.

Dobberan 2:8

Ta’n Chiarn kiarit dy stroie voalley inneen Zion; t’eh er heeyney magh yn line towshan, cha vel eh er lhiettal e laue veih stroie: shen-y-fa hug eh er y chashtal as e voalley dy ghobberan; hie ad naardey dy cheilley.

Dobberan 2:9

Ta ny giattyn eck lhiggit sheese fo halloo; t’eh er stroie as er vrishey ny boltyn eck, ta’n ree as ny princeyn eck mastey ny ashoonee; ta’n leigh er n’gholl naardey, as cha vel ashlish sodjey ec ny phadeyryn veih’n Chiarn.

Dobberan 5:10

Va’n crackan ain doo myr yn oghe, kyndagh rish y ghortey dewil.

Hosea 4:3

Shen-y-fa nee’n cheer dobberan, as hed ooilley ny cummaltee t’ayn naardey, marish maase y vagher, as eeanlee yn aer, nee eer eeastyn ny marrey cherraghtyn.

Joel 1:10

Ta’n magher ny hraartys, ta’n thalloo dobberan, son ta’n arroo mow: ta’n feeyn noa chyrmit seose, ta’n ooil cherraghtyn.

Joel 1:11

Bee-jee seaghnit, O shiuish eirinnee: yllee-jee, O shiuish ghareyderyn-feeyney, son y churnaght, as son yn oarn, son ta troar y vagheragh er n’gholl naardey.

Joel 1:14

Jean-jee laa troshtee y chasherickey: cur-jee eam son feailley casherick dy ve er ny reayll: chaggle-jee yn chenndeeaght, as ooilley cummaltee ny cheerey, gys thie yn Chiarn y Jee eu, as eïe-jee gys y Chiarn,

Joel 2:6

Kiongoyrt roo bee sleih dy mooar seaghnit, bee neeal dy ghorraghys er dy chooilley eddin.

Haggai 1:11

As deïe mee son fowan er y thalloo, as er ny sleityn, as er yn arroo, as er y feeyn noa, as er yn ooil, as er dty chooilley nhee ta’n thalloo dy ymmyrkey, as er deiney, as er maase, as er slane troar y thallooin.

Zechariah 7:13

Shen-y-fa haink eh gy-kione, myr deïe eshyn, as nagh jinnagh ad clashtyn, myr shen deïe adsyn, as cha jinnin’s clashtyn, ta Chiarn ny flaunyssee dy ghra.

1 Samuel 5:12

As ny deiney nagh dooar baase v’ad bwoailt lesh ny chingyn: as va eam yn ard-valley feer atchimagh.

1 Samuel 9:16

Mairagh, mysh y traa shoh, ver-yms hood dooinney ass cheer Venjamin; as nee oo eshyn y ooilaghey dy ve captan er my phobble Israel, dy vod eh sauail my phobble ass laue ny Philistinee: son ta mee er yeeaghyn er my phobble, er-yn-oyr dy vel yn accan oc er jeet kiongoyrt rhym.