Jeremiah 11:4 - Yn Vible Casherick 1775 1819

⁴ Shen hug mee ayns currym da nyn ayraghyn ’sy laa hug mee lhiam magh ad veih cheer Egypt, veih’n choirrey yiarn, gra, Bee-jee biallagh da goan my choraa, as jean-jee ad y chooilleeney, cordail rish ooilley ta mee dy harey diu: myr shen bee shiuish yn pobble aym’s, as beem’s yn Jee euish;

Jeremiah 11:4 ပူးပေါင်းရင်းမြစ်များ

Genesis 17:8

As ver-yms dhyt’s, as da dty luight dty yeï, yn cheer raad t’ou dty yoarree, ooilley cheer Chanaan, son cummal foddey beayn; as beem’s yn Jee oc.

1 Reeaghyn 8:51

Son ad dty phobble as dty eiraght, hug oo lhiat magh ass Egypt, veih mean yn choirrey dy yiarn:

2 Reeaghyn 18:6

Son ren eh lhiantyn gys y Chiarn, as cha hreig eh e raaidyn, agh dreill eh ny annaghyn va’n Chiarn er harey liorish Moses.

Exodus 20:6

As soilshaghey myghin er thousaneyn jeusyn ta graihagh orrym, as freaylley m’annaghyn.

Isaiah 30:6

Errey maase y jiass: as ver ad lhieu nyn merchys er geayltyn assylyn aegey gys cheer dy heaghyn as angaish, as nyn dashtaghyn er droynyn camelyn gys pobble jeh beggan foays daue, veih shen ta cheet yn lion aeg as shenn, yn cretoor nieunagh, as yn ard-nieu aileagh skianagh.

Isaiah 48:10

Cur-my-ner, ta mee er lheïe oo ’syn aile, agh cha nee myr argid; ta mee er dty phrowal ayns y choirrey dy heaghyn.

Jeremiah 11:7

Son ren mee breearrey chion noi nyn ayraghyn, ’sy laa hug mee lhiam ad seose ass cheer Egypt, eer gys y laa t’ayn jiu, girree dy moghey as cur raaue chion, as gra, Cur-jee biallys da my choraa.

Jeremiah 24:7

As ver-ym daue cree dy chur enney orrym’s, dy nee mish y Chiarn; as bee adsyn y pobble aym’s, as beem’s yn Jee ocsyn: son nee ad chyndaa reesht hym’s lesh nyn slane cree.

Jeremiah 26:13

Shen-y-fa nish jean-jee nyn raaidyn as nyn ymmyrkey-bea y lhiasaghey, as bee-jee biallagh da coraa yn Chiarn yn Jee eu; as nee yn Chiarn yn briwnys y chaghlaa, t’eh er n’ockley magh nyn ’oï.

Jeremiah 30:22

As bee shiuish yn pobble aym’s, as beem’s yn Jee euish.

Jeremiah 32:28

Shen-y-fa myr shoh ta’n Chiarn dy ghra, Cur-my-ner, livrey-yms yn ard-valley shoh gys laue ny Caldeanee, as gys laue Nebuchadrezzar ree Vabylon, as nee eshyn goaill eh.

Jeremiah 38:20

Agh dooyrt Jeremiah, Cha jean ad oo y livrey seose: cur biallys, ta mee guee ort, da coraa yn Chiarn, ta mee dy loayrt rhyt: as hig eh dy mie lhiat, as bee dty annym bio.

Ezekiel 11:20

Dy vod ad gimmeeaght ayns my lattyssyn, as freayll my oardaghyn, as ad y chooilleeney: as bee adsyn yn pobble aym’s, as beem’s y Jee ocsyn.

Ezekiel 14:11

Nagh jed thie Israel arragh er-shaghryn voym’s, chamoo jannoo ad-hene dwoaiagh lesh obbraghyn eajee, agh dy bee adsyn yn pobble aym’s, as mish yn Jee ocsyn, ta’n Chiarn Jee dy ghra.

Ezekiel 36:28

As nee shiu cummal ayns y cheer shen hug mee da nyn ayraghyn, as bee shiuish yn pobble aym’s, as beem’s yn Jee euish.

Ezekiel 37:23

Chamoo nee ad oolee jeu hene arragh, lesh nyn yallooyn, ny lesh nyn reddyn dwoaiagh, ny lesh nyn loghtyn: agh neem’s ad y livrey veih ooilley ny ynnydyn, raad t’ad er n’yannoo peccah, as glen-ym ad: myr shen bee adsyn y pobble aym’s, as beem’s yn Jee ocsyn.

Ezekiel 37:27

Bee my chabbane-agglish neesht mâroosyn: s’feer eh dy beem’s yn Jee ocsyn, as bee adsyn y pobble aym’s.

Daniel 3:26

Eisht haink Nebuchadnezzar er-gerrey gys beeal yn choirrey aileagh-loshtee, as loayr eh, as dooyrt eh, Shadrach, Meshach as Abed-nego, shiuish sharvaantyn y Jee smoo syrjey, tar-jee magh, as tar-jee gys shoh. Eisht haink Shadrach, Meshach as Abed-nego magh ass mean yn aile.

Leviticus 26:12

As neem’s gimmeeaght mêriu as beem’s y Jee eu, as bee shiuish my phobble.

Leviticus 26:3

My nee shiu shooyl ayns my lattyssyn, as freayll m’annaghyn, as jannoo ad;

Zechariah 13:9

As ver-ym lhiam yn trass ayrn trooid yn aile, as nee’m ad y ghlenney myr ta arroo er ny ghlenney, as nee’m ad y phrowal myr ta airh er ny phrowal: as nee ad geamagh er my ennym’s, as nee’m ad y chlashtyn: as jir-ym, T’adsyn my phobble: as jir adsyn, Ta’n Chiarn my Yee.

Zechariah 6:15

As hig joarreeyn veih foddey, as troggee ad chiamble y Chiarn, as bee fys euish, dy vel Chiarn ny flaunyssee er my choyrt hiuish. As hig shoh gy-kione, my vees shiu imneagh dy chur biallys da coraa yn Chiarn y Jee eu.

Zechariah 8:8

As ver-ym lhiam ad, as nee ad cummal ayns mean Yerusalem, as bee ad my phobble’s, as beem’s yn Jee ocsyn ayns firrinys as ynrickys.

Noo Mian 28:20

Gynsaghey daue dy reayll dy chooilley nhee cre-erbee ta mish er chur ayns sarey diu: as cur-my-ner, ta mish mêriu kinjagh, eer gys jerrey yn theihll. Amen.

2 Corinthianee 6:16

As cre’n chaarjys t’ec chiamble Yee rish jallooyn? son ta shiuish chiamble yn Jee bio; myr ta Jee er ghra, Neem’s baghey ayndoo, as gimmeeaght mâroo; as beem’s yn Jee ocsyn, as bee adsyn yn pobble aym’s.

Deuteronomy 11:27

Bannaght, my ver shiu biallys da saraghyn y Chiarn nyn Yee, ta mee yn laa jiu dy choyrt er nyn gurrym:

Deuteronomy 4:20

Agh ta’n Chiarn er ghoaill shiu, as er choyrt lesh shiu magh ass y choirrey yiarn, dy jarroo ass Egypt, dy ve son pobble dy eiraght da hene, myr ta shiu yn laa jiu.

Deuteronomy 5:6

Mish y Chiarn dty Yee, hug lhiam magh oo ass cheer Egypt, veih thie ny bondiaght.

Hebrewnee 5:9

As myr shoh er ny chasherickey, haink eh dy ve bun y taualtys dy bragh farraghtyn dauesyn ooilley ta coyrt biallys da;

1 Samuel 15:22

As dooyrt Samuel, Vel wheesh dy haitnys ec y Chiarn ayns ourallyn-losht as chebballyn, as t’echey ayns biallys da coraa’n Chiarn? Cur-my-ner, ta biallys ny share na oural, as dy choyrt ammys, na riurid reaghyn.