Hosea 2:3 - Yn Vible Casherick 1775 1819

³ Er-aggle, dy der-ym ee gys nearey, cha rooisht as y laa ruggyr ee, as dy jean-ym ee myr faasagh, as myr thalloo reeastaneagh, as dy marr-ym ee lesh paays.

Hosea 2:3 ပူးပေါင်းရင်းမြစ်များ

Exodus 17:3

As va’n pobble miandagh son ushtey ayns shen; as loayr y pobble dy gyere noi Moses, as dooyrt ad, Cre’n-fa t’ou er choyrt lhiat shin ass Egypt; dy varroo shin hene as nyn gloan, as nyn maase lesh paays?

Isaiah 33:9

Ta’n cheer dobberan, as lheïe ersooyl; ta Lebanon er ny leodaghey as giarit sheese; ta Sharon myr yn aasagh; ta Bashan as Carmel craa nyn mess jeu.

Isaiah 47:3

Bee dty scammylt er ny hoilshaghey, eer bee dty nearey er ny akin: goym’s cooilleeney, as cha jig-ym dty whail myr dooinney.

Isaiah 64:10

Ta dty ard-valjyn casherick nyn vaasagh, ta Zion ny chaitnys, as Jerusalem ny hraartys.

Jeremiah 12:10

Shimmey bochill t’er lhiggey naardey my gharey-feeyney, t’ad er stampey sheese my eiraght, t’ad er n’yannoo my hoghyr aalin ny aasagh fadane.

Jeremiah 13:22

As my jir oo ayns dty chree, Cre’n-fa ta ny reddyn shoh cheet orrym? Son mooadys dty vee-chairys ta dty nearey ry-akin, as dty voynyn er nyn roostey.

Jeremiah 13:26

Shen-y-fa neem’s rumbyllyn dty choamrey y hroggal er dty eddin, dy vod dty nearey v’er ny akin.

Jeremiah 14:3

As ta ny chiarnyn oc er chur magh nyn mooinjer veggey gys ny ushtaghyn: haink ad gys ny puill, as cha row bine ry-gheddyn; hyndaa ad reesht lesh nyn siyn follym; v’ad mooar-seaghnit as ec kione nyn geiley, as dollee ad nyn eddin.

Jeremiah 17:6

Son bee eh myr y freoagh ’syn aasagh, as cha vaik eh yn bannaght ta ry-hoi cheet; agh bee e chummal ayns ynnydyn sponkit yn aasagh, ayns thalloo sailjey as gyn cummaltee.

Jeremiah 2:31

O heeloghe, gow-jee tastey jeh goo yn Chiarn: Vel mee er ve ny aasagh da Israel? cheer dy ghorraghys? Cre’n-fa ta my phobble gra, Ta shin nyn mainshtyryn hene; cha jig mayd ny-sodjey hood’s?

Jeremiah 2:6

Chamoo t’ad er ghra, Cre vel y Chiarn hug lesh shin seose ass cheer Egypt, ren leeideil shin trooid yn aasagh; trooid cheer reeastaneagh, as ooiganagh; trooid cheer fowan-loshtee, as scadoo yn vaaish; cheer nagh jagh dooinney rieau ny hrooid, as raad nagh row dooinney erbee cummal?

Jeremiah 22:6

Son myr shoh ta’n Chiarn dy ghra rish thie ree Yudah, T’ou uss Gilead dooys, as mullagh Lebanon: ny-yeih son shickyrys neem’s faasagh y yannoo jeed, as ard-valjyn gyn cummaltee.

Jeremiah 4:26

Yeeagh mee, cur-my-ner, va’n cheer messoil ny aasagh, as va ooilley ny ard-valjyn echey lhieggit sheese kionfenish y Chiarn, as liorish eulys e yymmoose.

Jeremiah 51:43

Ta ny ard-valjyn eck ny hraartys, thalloo sponkit as fadaneagh, cheer gyn cummaltagh, chamoo ta mac dooinney cheet ny choair.

Jeremiah 51:5

Son cha vel Israel dy slane treigit, ny Judah, liorish e Yee, Chiarn ny flaunyssee; ga dy row yn cheer oc lhieent lesh peccah noi Fer-casherick Israel.

Ezekiel 16:22

As ayns ooilley dty olkys as dty vaarderys cha vel oo er chooinaghtyn er laghyn dty aegid, tra v’ou rooisht, as meayl, as sollit ayns dty uill hene.

Ezekiel 19:13

As nish t’ee soit ayns yn aasagh, ayns thalloo chirrym gaagit.

Hosea 13:15

Ga dy vel eh messoil mastey e vraaraghyn, hig geay-niar er, hig lomman lajer veih’n Chiarn seose ass yn aasagh, as chyrmee eh seose ny farraneyn-geill echey, as hed ny strooanyn ushtey echey naardey, nee eh spooilley ooilley tashtaghyn ny siyn aalin.

Hosea 2:10

As nish brah-ym yn drogh-vea eck fenish e maarderee, as cha jean fer erbee ish y livrey ass my laue.

Ashlish 17:16

As ver ny jeih eairkyn honnick oo er y veisht, dwoaie da’n streebagh, as ver ad mow ee, as rooishtee ad ee, as nee ad gee yn eill eck, as loshtee ad ee lesh aile.

Briwnyn 15:18

As v’eh feer phaagh, as deïe eh er y Chiarn, as dooyrt eh, T’ou er choyrt yn varriaght vooar shoh ayns laue dty harvaant; as nish voym baase lesh paays, as tuittym ayns laueyn ny chymmyltee shoh?