Genesis 8:21 - Yn Vible Casherick 1775 1819

²¹ As ren y Chiarn soiagh dy mie jeh’n oural, as dooyrt y Chiarn ayns e chree, Cha jean-ym arragh yn seihll y stroie er yn aght shoh, er coontey sheelnaue; ga dy vel smooinaghtyn chree dooinney peccoil veih e aegid: chamoo nee’m arragh dagh nhee bio y stroie, myr ta mee er n’yannoo.

Genesis 8:21 ပူးပေါင်းရင်းမြစ်များ

Genesis 3:17

As dooyrt eh rish Adam, Er-y-fa dy vel oo er choyrt geill da goan dty ven, as dy vel oo er n’ee jeh’n villey my-e-chione ren mee dty harey, gra, Cha negin dhyt gee jeh: cursit ta’n thalloo kyndagh rhyt’s: ayns trimshey nee oo gee jeh ooilley laghyn dty vea.

Genesis 4:12

Tra t’ou laboragh y thalloo, cha jean ee, maghey shoh, gymmyrkey dhyt’s e niart; dty yoarree, as dty wagaantagh vees oo er yn ooir.

Genesis 5:29

As ren eh genmys eh Noah, gra, Nee eh shoh shin y gherjaghey ayns nyn obbyr as tooilleil nyn laueyn, kyndagh rish y thalloo ta’n Chiarn er gheyrey:

Genesis 6:13

As dooyrt Jee rish Noah, Te roym dy choyrt jerrey er ooilley sheelnaue; son ta’n seihll kyndagh roo lhieent lesh tranlaase: as cur-my-ner stroie-ym ad marish y thalloo.

Genesis 6:17

As cur-my-ner, ver-yms lhiam son shickyrys thooilley dy ushtaghyn er y thalloo dy stroie dy chooilley eill, ayn ta’n ennal y vea, fo’n aer: as yiow dy chooilley nhee t’er y thalloo baase.

Genesis 6:5

As honnick Jee dy row mee-chraueeaght dooinney trome er y thalloo, as dy row dy chooilley yeearree jeh smooinaghtyn e chree soit er olk dy kinjagh.

Genesis 6:7

As dooyrt y Chiarn stroie-ym dooinney, ta mee er chroo veih eaghtyr y thallooin: chammah dooinney as baagh, as y cretoor snauee, as eeanlee yn aer: son ta arrys orrym dy vel mee er chroo ad.

Lioar Yob 14:4

Quoi oddys red glen y chur lesh ass red neu-ghlen? cha vod fer erbee.

Psalmyn 51:5

Cur-my-ner va mee er my chummey ayns olkys: as ayns peccah ren my voir m’y yiennaghtyn.

Psalmyn 58:3

Ta ny mee-chrauee frourtagh, dy jarroo veih breïn nyn mayrey: cha leah as t’ad er nyn ruggey, t’ad goll er-shaghryn, as loayrt breagyn.

Psalmyn 58:4

T’ad cha nieunagh as pyshoon ard-nieu: dy jarroo myr yn adder bouyr ta dooney ny cleayshyn eck;

Exodus 29:18

As nee oo lostey yn slane rea er yn altar; oural-losht eh gys y Chiarn; te ny hoar millish, ny oural chebbit lesh aile gys y Chiarn.

Exodus 29:25

As nee oo ad y ghoaill veih nyn laueyn, as lostey ad er yn altar, son oural-losht, son soar millish kiongoyrt rish y Chiarn: te oural jeant lesh aile gys y Chiarn.

Raaghyn Creeney 20:9

Quoi oddys gra, Ta mee er ghlenney my chree, ta mee seyr veih my pheccah?

Ecclesiastes 7:20

Son cha vel dooinney cairal er yn ooir cha mie shen, nagh vel jannoo peccah.

Isaiah 47:12

Shass nish er dty obbeeys, as er ymmodee dty phishagyn, t’ou er chur roo veih dty aegid; my she shen dy vod oo laue y yannoo jeu, as geddyn foays erbee lioroo.

Isaiah 47:15

Shoh myr nee adsyn rhyt’s t’ou er ghellal roo, eer marchanyn dty aegid: hed ad roue dagh dooinney gys e ynnyd hene; cha jean fer dty hauail.

Isaiah 48:8

Dy jarroo, cha ren oo clashtyn, chamoo ren oo toiggal; eer veih’n traa shen cha row dty chleaysh foshlit: son va fys aym’s dy jinnagh oo dellal dy feer volteyragh, as dy r’ou enmyssit dty ghrogh-yantagh veih’n vreïn.

Isaiah 53:6

Ta shinyn ooilley, myr kirree, er n’gholl er-shaghryn; ta shin er jyndaa dagh unnane ain gys e raad hene; as ta’n Chiarn er lhie ersyn yn loght ain ooilley.

Isaiah 65:6

Cur-my-ner, te scruit kiongoyrt rhym; cha bee’m my host, agh goym cooilleeney, eer slane cooilleeney ayns nyn oghrish,

Jeremiah 17:9

Ta’n cree molteyragh erskyn dy chooilley nhee, as mee-chrauee erskyn-towse: quoi oddys toiggal eh?

Jeremiah 18:12

As dooyrt ad, Cha vel saase nyn gour; agh nee mayd gimmeeaght lurg nyn aghtyn hene, as nee mayd dy chooilley ghooinney geiyrt da smooinaghtyn e chree mee-chrauee hene.

Jeremiah 8:6

Deaisht mee as chlin mee, agh va ny goan oc foalsey; cha ghow dooinney jeu arrys son e vee-chraueeaght, gra, Cre shoh ta mee er n’yannoo? dagh fer chyndaa gys e henn chliaghtey, myr ta’n cabbyl chionney stiagh gys y chaggey.

Ezekiel 20:41

Neem’s soiaghey jiuish lesh blass millish [nyn ourallyn], tra ver-ym lhiam shiu magh veih’n pobble, as shiu y haglym ass ny cheeraghyn, raad va shiu er nyn skeayley, as beem’s er my chasherickey ayndiu kiongoyrt rish ny ashoonee.

Leviticus 1:13

As nee eh yn mynnagh as ny cassyn y niee lesh ushtey: as ver y saggyrt lesh ad ooilley, dy lostey ad er yn altar: she oural-losht eh, chebbal jeant lesh aile, gys y Chiarn.

Leviticus 1:17

As nee eh scoltey eh lesh e skianyn er, agh cha der eh ad veih-my-cheilley: as loshtee’n saggyrt eh er y fuygh t’er aile yn altar: she oural-losht eh, chebbal jeant lesh aile, dy hoar millish gys y Chiarn.

Leviticus 1:9

Agh y mynnagh as e chassyn nee eh niee lesh ushtey: as loshtee yn saggyrt ooilley er yn altar, dy ve oural-losht, chebbal jeant lesh aile, dy hoar millish da’n Chiarn.

Leviticus 26:31

As ver-yms naardey nyn ard-valjyn, as stroie-ym ny chiambleyn eu: as cha jean-ym soiagh jeh nyn ourallyn-millish.

Leviticus 4:31

As nee eh goaill ass ooilley’n eeh, myr ta’n eeh er ny scarrey veih’n oural-casherick son shee; as nee yn saggyrt shen y lostey er yn altar son soar millish gys y Chiarn: as nee yn saggyrt lhiasaghey ’yannoo er e hon; as bee eh er ny leih da.

Leviticus 8:28

As ren Moses ad y ghoaill jeh ny laueyn oc, as ad y lostey er yn altar, er yn oural-losht: v’ad shoh chebbit dy chasherickey (Aaron as e vec) son oural-millish: te oural jeant lesh aile gys y Chiarn.

Earrooyn 15:3

As dy jean shiu oural lesh aile gys y Chiarn, chebbal-losht ny oural, ayns cooilleeney breearrey, ny ayns oural dy aigney-arryltagh, ny ayns nyn feaillaghyn casherick, son oural-millish roish y Chiarn, jeh’n chelloo ny jeh’n chioltane:

Noo Mian 15:19

Son magh veih’n chree ta cheet drogh smooinaghtyn, dunverys, brishey-poosey, maarderys, maarlys, feanish foalsey, goan mollaghtagh.

Noo Ean 3:6

Shen t’er ny ruggey jeh’n eill, te foalley; as shen t’er ny ruggey jeh’n Spyrryd, te spyrrydoil.

Romanee 1:21

Er-yn-oyr tra va toiggal oc dy Yee, cha ren ad eh y ghloyraghey myr Jee, chamoo v’ad booisal, agh haink ad dy ve fardalagh ayns nyn smooinaghtyn; as va’n cree ommijagh oc fo dorraghys.

Romanee 3:23

Son ta ooilley er n’yannoo peccah, as er jeet giare jeh gloyr Yee.

2 Corinthianee 2:15

Son ta shin gys Jee soar millish trooid Creest, ayndoosyn t’er nyn sauail, as ayndoosyn ta cherraghtyn.

Ephesianee 5:2

As immee-jee ayns graih, myr ta Creest myrgeddin er chur graih dooinyn, as er choyrt eh-hene er nyn son, chebbal as oural son soar millish da Jee.

Philippianee 4:18

Agh ta dy liooar aym, as er y phalchey: ta mee jeant magh, neayr’s hooar mee veih Epaphroditus shen hug shiu hym, chebbal dy hoar millish, oural booisal, lheid as nee Jee soiaghey jeh.

1 Ean 5:19

As ta fys ain dy vel shin veih Jee, as dy vel ooilley yn seihll ny lhie ayns mee-chraueeaght.

1 Samuel 26:19

Nish er-y-fa shen, ta mee guee ort, lhig da my hiarn y ree geaishtagh rish goan dty harvaant: my she’n Chiarn t’er dty ghreinnaghey m’oï, lhig da soiaghey jeh my vioys son lhiasaghey: agh my she cloan gheiney ad, my vollaght orroo fenish y Chiarn; son t’ad er my imman magh ’sy traa t’ayn veih cummal ayns eiraght y Chiarn, wheesh as dy ghra, Immee, as shirveish jeeghyn joarree.