Genesis 7:4 - Yn Vible Casherick 1775 1819

⁴ Son ayns shiaghtin dy hraa ver-yms fliaghey er y thalloo, da-eed laa as da-eed oie: as dagh nhee bio ta mee er chroo, nee’m y stroie veih eaghtyr y thallooin.

Genesis 7:4 ပူးပေါင်းရင်းမြစ်များ

Genesis 2:5

As dy chooilley villey jeh’n vagher roish my row ad er yn ooir, as ooilley lossreeyn y vagher roish my daase ad; son cha row yn Chiarn Jee foast er choyrt fliaghey er yn ooir, as cha row dooinney ayn dy laboragh y thalloo.

Genesis 6:13

As dooyrt Jee rish Noah, Te roym dy choyrt jerrey er ooilley sheelnaue; son ta’n seihll kyndagh roo lhieent lesh tranlaase: as cur-my-ner stroie-ym ad marish y thalloo.

Genesis 6:17

As cur-my-ner, ver-yms lhiam son shickyrys thooilley dy ushtaghyn er y thalloo dy stroie dy chooilley eill, ayn ta’n ennal y vea, fo’n aer: as yiow dy chooilley nhee t’er y thalloo baase.

Genesis 6:3

As dooyrt y Chiarn, Cha jean my spyrryd dy kinjagh streeu rish dooinney, fakin nagh vel eh hene myrgeddin agh foalley: foast bee e eash shey-feed bleïn.

Genesis 6:7

As dooyrt y Chiarn stroie-ym dooinney, ta mee er chroo veih eaghtyr y thallooin: chammah dooinney as baagh, as y cretoor snauee, as eeanlee yn aer: son ta arrys orrym dy vel mee er chroo ad.

Genesis 7:10

As haink eh gy-kione, lurg shiaght laa dy row ushtaghyn y thooilley er y thalloo.

Genesis 7:12

As gheayrt y fliaghey er y thalloo da-eed laa as da-eed oie.

Genesis 7:17

As va’n thooilley da-eed laa er y thalloo; as ren ny ushtaghyn gatt, as dymmyrk ad seose yn arg, as ve troggit seose erskyn y thalloo.

Genesis 7:3

Jeh eeanlee yn aer myrgeddin shiaght piyryn, fyrryn as bwoirryn; dy reaylley ingan bio er slane eaghtyr y thallooin.

Genesis 8:10

As ren eh farkiaght foast shiaght laa elley, as hug eh reesht yn calmane magh veih yn arg.

Genesis 8:12

As duirree eh foast shiaght laa elley, as hug eh magh y calmane, nagh daink back huggey arragh.

Genesis 8:2

Va myrgeddin thooillaghyn y diunid, as uinniagyn yn aer dooint seose, as va’n fliaghey veih’n aer er ny lhiettal.

Lioar Yob 22:16

Va er nyn yiarey sheese roish nyn draa; yn undin oc va er ny choyrt mow lesh thooilley;

Lioar Yob 28:25

Dy chur trimmid da ny bodjallyn, as t’eh towse ny ushtaghyn dy kiart.

Psalmyn 69:28

Lhig daue tuittym veih un pheccah gys peccah elley: as gyn cheet stiagh gys dty ynrickys.

Jeremiah 28:16

Shen-y-fa myr shoh ta’n Chiarn dy ghra, Cur-my-ner, neem’s uss y scughey veih eaghtyr y thallooin: eer ’sy vleïn shoh hene yiow baase, son dy vel oo er n’ockley magh mee-viallys noi yn Chiarn.

Amos 4:7

As myrgeddin ta mee er lhiettal yn fliaghey veue, tra ta foast three meeaghyn gys yn ouyr, as hug mee fliaghey er un ard-valley, as cha dug mee fliaghey er ard-valley elley: huitt fliaghey er un vagher, as ren y magher fioghey nagh daink fliaghey er.

Ashlish 3:5

Bee eshyn yiow yn varriaght, coamrit ayns garmad gial; as cha der-ym yn ennym echey ass lioar y vea, agh goym rish e ennym kiongoyrt rish my Ayr, as fenish e ainleyn.