Ayns ollish dty vaaish nee oo gee dty arran, derrey chyndaa-ys oo gys yn ooir: son ass shen v’ou er dty ghoaill: son joan oo, as gys joan nee oo reesht chyndaa.
Son shegin dooin ooilley baase gheddyn, as ta shin myr ushtey deayrtit er y thalloo, nagh vod ve troggit reesht: chamoo ta Jee jannoo soiagh jeh persoon erbee; foast t’eh er n’oardaghey saase ’sy leigh, son coyrt lesh thie eshyn ta eiyrit magh veih e heer hene.
Ta laghyn yn eash ain three-feed bleïn as jeih: as ga dy vod deiney ’ve cha lajer as dy roshtyn kiare-feed bleïn; ny-yeih cha vel y troshid oc eisht agh deinys as trimshey; cha leah shen te er n’gholl shaghey, as ta shin goit jeh.
Myrgeddin, tra vees aggle orroo dy hooyl er boayl ard, as atchim rhymboo ’sy raad, as bee’n billey-almond ny vlaa, as bee’n lheimeyder-faiyr ny errey, as nee geearree failleil; er-yn-oyr dy vel dooinney goll gys e hie foddey-farraghtyn, as ny trimshee dobberan ayns ny straïdyn.
Dy vod oo graih y choyrt da’n Chiarn dty Yee, as ve biallagh gys e choraa, as dy vod oo lhiantyn huggey [son eshyn dty vioys, as lhiurid dty laghyn] dy vod oo cummal ayns y cheer, vreear y Chiarn da dty ayraghyn, da Abraham, da Isaac, as da Jacob, dy choyrt daue.