Genesis 3:19 - Yn Vible Casherick 1775 1819

¹⁹ Ayns ollish dty vaaish nee oo gee dty arran, derrey chyndaa-ys oo gys yn ooir: son ass shen v’ou er dty ghoaill: son joan oo, as gys joan nee oo reesht chyndaa.

Genesis 3:19 ပူးပေါင်းရင်းမြစ်များ

Genesis 18:27

As dreggyr Abraham, as dooyrt eh, cur-my-ner nish, ta mee er ghoaill orrym dy loayrt rish y Chiarn, mish nagh vel agh joan as leoie.

Genesis 2:7

As ren y Chiarn Jee dooinney y chroo ass joan ny hooirey, as heid eh ayns ny stroanyn echey ennal y vea; as haink dooinney dy ve ny annym bio.

Genesis 23:4

Ta mee my yoarree, as my hroailtagh mêriu. Cur-jee dou cairys ayns grunt oanluckee mêriu, dy voddym yn marroo y oanluckey ass my hilley.

Genesis 3:18

Drineyn myrgeddin as onnaneyn nee eh gymmyrkey dhyt: as nee oo beaghey er lhuss y vagher.

Genesis 5:5

As va slane eash Adam nuy cheead as jeih bleeaney as feed, as hooar eh baase.

Lioar Yob 1:21

As dooyrt eh, Rooisht haink mee ass breïn my vayrey, as rooisht chyndaa-ym reesht gys yn ooir: yn Chiarn ren coyrt, as ta’n Chiarn er ghoaill ersooyl; bannit dy row ennym y Chiarn.

Lioar Yob 10:9

Cooinee, ta mee guee ort, dy vel oo er n’yannoo mee jeh’n chray; as der oo lhiat mee reesht gys y joan?

Lioar Yob 19:26

As ga, lurg my chrackan, dy der ny beishteigyn mow yn corp shoh, ny-yeih ayns my eill neem’s Jee y akin:

Lioar Yob 21:26

Nee ad lhie sheese co-laik ’sy joan, as coodee ny beishteigyn ad.

Lioar Yob 34:15

Ragh dy chooilley chretoor naardey cooidjagh, as yinnagh dooinney reesht chyndaa gys joan.

Lioar Yob 4:19

Cre-woad smoo ayndoosyn ta cummal ayns thieyn dy chray, ta’n undin oc ’sy joan, t’er ny vroo myr y lhemeen? T’ad goll naardey veih’n voghrey gys yn astyr: t’ad cherraghtyn son dy bragh, fegooish scansh ve jeant jeh.

Psalmyn 103:14

Son shione da cre jeh ta shin jeant: t’eh cooinaghtyn nagh vel shin agh joan.

Psalmyn 104:23

Ta dooinney goll magh gys e obbyr, as gys e laboraght: derrey’n astyr.

Psalmyn 104:29

Tra t’ou follaghey dt’eddin, t’ad seaghnit: tra t’ou goaill ersooyl yn ennal oc, t’ad geddyn baase, as t’ad chyndaït reesht gys nyn ooir;

Psalmyn 127:2

Mannagh vel y Chiarn freayll yn ard-valley: ta’n arreyder dooisht ayns fardail.

Psalmyn 22:15

Ta my niart chyrmit seose myr peesh dy haagh-craie, as ta my hengey lhiantyn gys my ghruntyn: as ver uss lhiat mee gys joan y vaaish.

Psalmyn 22:29

Nee nyn lheid ocsyn ooilley ta berchagh er y thalloo: gee as ooashley ’choyrt.

Psalmyn 90:3

T’ou chyndaa dooinney gys toyrt-mow: reesht t’ou gra, Tar-jee reesht, shiuish chloan gheiney:

Raaghyn Creeney 21:16

Eshyn ta er-shaghryn veih’n raad dy hushtey, bee e chronney marish ny merriu deyrit.

Ecclesiastes 1:13

As ren mee my chree y haaghey dy vriaght, as dy ronsaghey magh liorish creenaght dy chooilley nhee t’er ny yannoo fo niau: yn deinys trome shoh ta Jee er choyrt er cloan gheiney dy gholl ny hrooid.

Ecclesiastes 1:3

Cre’n vondeish t’ec dooinney jeh ooilley’n deinys t’eh dy ghoaill fo’n ghrian?

Ecclesiastes 12:7

Eisht nee’n joan chyndaa reesht gys yn ooir, myr ve; as nee’n spyrryd chyndaa reesht gys Jee veih haink eh.

Ecclesiastes 3:20

T’ad ooilley goll yn un raad, t’ad ooilley veih’n joan, as gys joan t’ad ooilley reesht chyndaa.

Ecclesiastes 5:15

Rooisht myr haink eh magh ass breïn e vayrey, hed eh roish, dy gholl myr haink eh, as cha vel nhee erbee jeh cooid e gheinys, ver eh lesh ersooyl ny laue.

Daniel 12:2

As nee ymmodee jeusyn, ta cadley ayns joan ny hooirey, doostey, paart gys bea dy bragh farraghtyn, as paart gys nearey as oltooan dy bragh farraghtyn.

1 Corinthianee 15:47

Va’n chied dooinney jeh’n thalloo, thallooinagh: ta’n nah ghooinney yn Chiarn veih niau.

Ephesianee 4:28

Lhig dasyn ren geid, gyn geid arragh; agh ny sleaie lhig da laboragh, gobbraghey lesh e laueyn shen ny ta mie, dy vod ve echey dy choyrt da’n ymmyrchagh.

1 Thessalonianee 2:9

Son ta cooinaghtyn eu, vraaraghyn, er y tooilleil as y deinys ain: son gobbraghey oie as laa, er-yn-oyr nagh jinnagh shin currym er veg eu, ren shin sushtal Yee y phreacheil diu.

2 Thessalonianee 3:10

Son dy jarroo tra va shin mêriu, hug shin yn sarey shoh diu, Fer erbee nagh jinnagh gobbraghey, nagh lhisagh eh gee.

Hebrewnee 9:27

As ’naght myr te er ny phointeil da deiney dy gheddyn baase un cheayrt, agh lurg shoh yn vriwnys: