Genesis 11:7 - Yn Vible Casherick 1775 1819

⁷ Tar-jee, lhig dooin goll sheese, as ayns shen coyrt shaghrynys er y ghlare oc, nagh vod yn derrey yeh toiggal glare yn jeh elley.

Genesis 11:7 ပူးပေါင်းရင်းမြစ်များ

Genesis 1:26

As dooyrt Jee, Lhig dooin dooinney y chroo ayns y jalloo as y chaslys ain hene: as lhig da reill ve oc harrish eeastyn ny marrey, as harrish eeanlee yn aer, as harrish y maase, as harrish ooilley yn thalloo, as harrish dy chooilley nhee snauee t’er y thalloo.

Genesis 10:20

Ad shoh mec Ham, lurg nyn gynneeyn, rere nyn glaraghyn, ayns ny cheeraghyn oc, as ayns nyn ashoonyn.

Genesis 10:32

Ad shoh kynneeyn mec Noah, lurg nyn sheelogheyn, ayns nyn reeriaghtyn; as lioroo shoh va ny cheeraghyn er nyn rheynn er y thalloo lurg y thooilley.

Genesis 10:5

Lioroo shoh va ellanyn ny ashoonee er nyn rheynn lurg nyn cheeraghyn; dagh cheer lurg e ghlare hene, cordail rish nyn gynneeyn, ayns ny ashoonyn oc,

Genesis 11:5

As haink y Chiarn neose dy chur-my-ner yn ard-valley, as y toor va cloan gheiney dy hroggal.

Genesis 3:22

As dooyrt y Chiarn Jee, Cur-my-ner ta’n dooinney myr-yien er jeet dy ve myr unnane j’inyn, dy hoiggal mie as sie: as nish son nagh der eh magh e laue, as dy gow eh myrgeddin jeh billey’n vea, as gee jeh, as ve dy bragh beayn.

Genesis 42:23

As cha row fys oc, dy row Joseph toiggal ad: son loayr eh roo liorish fer va jannoo glare eddyr ad.

Lioar Yob 12:20

T’eh jannoo gyn bree glare ny fir-choyrlee, as cur shaghrynys er tushtey’n chenndeeaght.

Psalmyn 2:4

Eshyn ta baghey ayns niau ghearys orroo lesh craid: bee ad ec y Chiarn ayns faghid.

Psalmyn 33:10

Ta’n Chiarn coyrt bun-ry-skyn coyrle ny ashoonyn: as cur er saaseyn croutagh y phobble dy ve gyn-ymmyd, as cur shaghrynys er coyrleyn ny princeyn.

Psalmyn 55:9

Stroie ny chengaghyn oc, O Hiarn, as cur ad noi-ry-hoi: son ta mee er vakin neu-chairys as streeu ayns yn ard-valley.

Exodus 4:11

As dooyrt y Chiarn rish, Quoi t’er chummey beeal dooinney? ny quoi t’er n’yannoo yn bouyr, ny’n balloo? ny’n fakin, ny’n doal? nagh nee mish, yn Chiarn?

Isaiah 33:19

Cha jean oo fakin pobble dewil; pobble jeh glare ro ghowin er dty hon; jeh chengey yoarree, ro ghoillee dhyt dy hoiggal.

Isaiah 6:8

Myrgeddin cheayll mee coraa yn Chiarn, gra, Quoi nee’m y choyrt, as quoi hed er chaghteraght er nyn son? Eisht dooyrt mee, Ta mish ayns shoh; lhig dooys goll.

Jeremiah 5:15

Cur-my-ner, ver-yms lhiam erriu ashoon veih foddey, O hie Israel, ta’n Chiarn dy ghra: te ny ashoon niartal, te ny henn ashoon, ashoon nagh nhione dhyt y ghlare oc, chamoo t’ou, toiggal cre t’ad dy ghra.

1 Corinthianee 14:23

Shen-y-fa my ta’n slane cheeill er nyn jaglym cooidjagh ayns un voayl, as ad ooilley loayrt ayns glaraghyn joarree, as dy darragh stiagh adsyn nagh vel toiggal yn ghlare oc, ny credjal, nagh jir ad dy vel shiu ass nyn geeayl?

Deuteronomy 28:49

Ver y Chiarn lesh ashoon dt’oï veih foddey, veih ardjyn sodjey magh y theihll, cha bieau as ta’n urley getlagh, ashoon, nagh doig oo yn ghlare oc: