Dobberan 2:16 - Yn Vible Casherick 1775 1819

¹⁶ Ta ooilley dty noidyn er vosley nyn meeal dt’oï: t’ad gannidys as snaggeraght lesh nyn veeacklyn: t’ad gra, Ta shin er lhuggey seose ee: ta shoh son shickyrys yn laa va shin jeeaghyn er y hon: ta shin er gheddyn, ta shin er vakin eh.

Dobberan 2:16 ပူးပေါင်းရင်းမြစ်များ

Psalmyn 109:2

As t’ad er loayrt m’oï lesh chengaghyn foalsey: t’ad er jeet mygeayrt-y-moom lesh focklyn dwoaiagh, as er chaggey m’oï gyn oyr.

Psalmyn 112:10

Hee yn mee-chrauee eh, as bee eh trimshey da: nee eh snaggeraght lesh e eeacklyn, as lheïe ersooyl; nee yeearree yn vooinjer vee-chrauee cherraghtyn.

Psalmyn 124:3

Veagh ny ushtaghyn, dy feer, er vaih shin: as veagh y thooilley er n’gholl harrish nyn annym.

Psalmyn 22:13

T’ad fosley nyn meeal orrym: myr lion jollyssagh buirroogh son spooilley.

Psalmyn 35:16

Marish ny brynnyree va grindeyryn connyssagh: ren snaggeraght orrym lesh nyn veeacklyn.

Psalmyn 35:21

Doshil ad nyn meeal orrym, as dooyrt ad: Gow nearey, gow nearey, honnick shin eh lesh nyn sooillyn.

Psalmyn 35:25

Ny lhig daue gra ayns nyn greeaghyn, Shen, shen, shoh myr baillin eh: chamoo lhig daue gra, Ta shin er choyrt mow eh.

Psalmyn 37:12

Ta’n vee-chrauee goaill coyrle noi’n dooinney ynrick: as snaggeraght er lesh e eeacklyn.

Psalmyn 41:8

Lhig da briwnys baaish cheet magh n’oï: as nish dy vel eh ny lhie, ny lhig da girree seose arragh.

Psalmyn 56:2

Ta my noidyn gagh laa goaill ayns laue dy my lhuggey seose: son t’adsyn ymmodee ta caggey m’oï, O uss smoo syrjey.

Psalmyn 57:3

Ver eh cooney hym veih niau: as sauee eh mee veih’n scammylt echeysyn baillish mee y stroie.

Isaiah 49:19

Son dty ynnydyn-vaghee faase as treigit, as cheer dty hraartys, bee ad dy jarroo nish ro choon son ny cummaltee, as bee adsyn ren uss y lhuggey seose eebrit foddey jeh.

Jeremiah 26:6

Eisht neem’s y thie shoh y yannoo myr Shiloh, as yn ard-valley shoh ny vollaght da ooilley ashoonyn yn ooir.

Jeremiah 29:18

As ver-ym eiyrtys orroo lesh y chliwe, yn ghortey, as y chramp, as nee’m ad y livrey dy ve scughit gys dy chooilley reeriaght ’sy theihll, dy ve son mollaght, as atchim, as faghid, as an-ghoo, mastey dy chooilley ashoon raad ta mee er n’eiyrt ad:

Jeremiah 50:17

Ta Israel ny cheyrrey chailjey; ta ny lionyn er n’eiyrt ersooyl eh: hoshiaght d’ee ree Assyria yn eill jeh, as ny lurg-syn ta ree Vabylon er chaigney e chraueyn.

Jeremiah 50:7

Quoi-erbee hooar ad, ren stroie ad: as dooyrt nyn noidyn, Cha vel shin ayns foill, son dy vel adsyn er n’yannoo peccah noi’n Chiarn, fendeilagh yn chairys; eer yn Chiarn, treishteil nyn ayraghyn.

Jeremiah 51:34

Ta Nebuchadrezzar ree Vabylon er my chur mow, t’eh er my vroo, t’eh er my yannoo saagh follym, t’eh er my lhuggey sheese myr dragon, t’eh er lhieeney e volg lesh my vee s’blaystal, as er my hilgey magh.

Dobberan 1:21

T’ad er chlashtyn dy vel mee gosnaghey, cha vel gerjeyder aym: ta ooilley my noidyn er chlashtyn jeh my heaghyn, goaill boggey dy vel oo er n’yannoo eh: lhig y laa orroosyn t’ou er n’oardaghey, as bee ad casley rhym’s.

Dobberan 3:46

Ta ooilley nyn noidyn er vosley nyn meeal nyn ’oï.

Ezekiel 23:32

Myr shoh ta’n Chiarn Jee dy ghra, Iu-ee oo jeh cappan dty huyr, dowin as lhean: bee oo er ny chraidey mysh, as ayns faghid; s’mooar te dy chummal.

Ezekiel 25:15

Myr shoh ta’n Chiarn Jee, dy ghra, Er-yn-oyr dy vel ny Philistinee er ghellal dy elgyssagh, as er ghoaill cooilleeney lesh cree myskidagh, dy stroie Judah, ayns nyn shenn noidys;

Ezekiel 25:3

As abbyr rish ny Ammoniteyn, Clasht-jee goo yn Chiarn Jee, Myr shoh ta’n Chiarn Jee dy ghra, Er son dy vel uss er ghra, Aha, noi yn ynnyd casherick aym’s, ec y traa ve er ny choyrt naardey, as noi thalloo Israel, tra ve treigit, as noi thie Yudah, tra v’ad goit ersooyl ayns cappeeys;

Ezekiel 25:6

Son myr shoh ta’n Chiarn Jee dy ghra, Er-yn-oyr dy vel uss er woalley dty vassyn, as er stampey lesh dty chassyn, as er ghoaill boggey ayns dty chree lesh ooilley dty vyskid noi cheer Israel:

Ezekiel 36:3

Shen-y-fa, jean phadeyrys, as abbyr, Myr shoh ta’n Chiarn Jee dy ghra, Er-yn-oyr dy vel ad er n’yannoo shiu follym-faase, as er lhuggey shiu seose er dagh cheu, shiu dy ve son eiraght da’n chooid elley jeh ny ashoonee, as dy vel shiu goit seose ayns beïll ny tutleryn, as son oltooan er y pobble:

Ezekiel 5:15

Myr shen bee eh ny oltooan, as an-ghoo, as raaue, as yindys da ny ashoonyn ta mygeayrt-y-mood, tra neem’s my vriwnyssyn y chooilleeney ort’s, ayns corree, as ayns eulys, as ayns oghsan dewil; ta mish y Chiarn er loayrt eh.

Hosea 8:8

Ta Israel sluggit seose: nish bee ad mastey ny ashoonee myr saagh gyn-ymmyd.

Micah 4:11

Nish myrgeddin ta ymmodee ashoonee chaglit dt’oï, ta gra, Lhig dooin jeeill y yannoo aynjee, as lhig da’n sooill ain jeeaghyn er Zion.

Jannoo 7:54

Tra cheayll ad ny goan shoh v’ad guint gys y chree, as shleeu ad nyn veeacklyn er.