Deuteronomy 32:4 - Yn Vible Casherick 1775 1819

⁴ Eshyn y Chreg, ta e obbraghyn jeant ayns creenaght erskyn earroo: son ta ooilley e raaidyn briwnys: Jee dy ynrickys, as fegooish mee-chairys; kiart as jeeragh t’eh.

Deuteronomy 32:4 ပူးပေါင်းရင်းမြစ်များ

Genesis 1:31

As honnick Jee dy chooilley nhee v’eh er chroo as cur-my-ner ve feer vie. As va’n fastyr as y moghrey yn cheyoo laa.

Genesis 18:25

Shen dy row foddey voïd, dy yannoo myr shoh, dy stroie yn vooinjer cairal marish ny mee-chrauee: as dy bee yn vooinjer cairal myr ny mee-chrauee, dy row shen foddey voïd: nagh jean briw yn seihll ooilley cairys y yannoo?

2 Samuel 22:47

Ta’n Chiarn bio; as bannit dy row my chreg, as ard-voylley dy row er ny choyrt da Jee, creg my haualtys.

2 Samuel 23:3

Ta Jee Israel er ghra, ta creg Israel er loayrt rhym’s, Shegin dasyn ta reill harrish deiney ve cairagh, reill ayns aggle Yee:

2 Recortyssyn 19:7

Shen-y-fa nish, lhig da aggle y Chiarn ve erriu, bee-jee er nyn dwoaie, as jean-jee nyn gurrym: son cha vel mee-chairys erbee marish y Chiarn nyn Yee, chamoo t’eh soiaghey jeh persoonyn, ny goaill giootyn.

Nehemiah 9:8

As hooar oo e chree ynrick kiongoyrt rhyt, as ren oo conaant rish, dy choyrt da e luight cheer ny Canaaniteyn, ny Hittiteyn, ny Amoriteyn, as ny Perizziteyn, as ny Jebusiteyn, as ny Girgashiteyn, as t’ou er chooilleeney dty ghoan, son t’ou ynrick:

Lioar Yob 34:10

Shen-y-fa clasht-jee rhym’s, shiuish gheiney creeney: foddey dy row eh veih Jee, dy yannoo olk; as veih’n Ooilley-niartal, dy yannoo mee-chairys.

Lioar Yob 35:14

Ga t’ou gra nagh jean oo eshyn y akin, ny-yeih ta briwnys kiongoyrt rish; shen-y-fa cur uss dty varrant ersyn.

Lioar Yob 36:23

Quoi t’er n’oardaghey yn raad echeysyn? ny quoi oddys gra, T’ou er n’yannoo mee-chairys?

Lioar Yob 8:3

Vel Jee cur briwnys neu-chorrym? as vel yn Ooilley-niartal cassey cairys?

Psalmyn 138:8

Nee’n Chiarn e chenjallys-ghraihagh y yannoo mie dooys: ta dty vyghin, O Hiarn, farraghtyn son dy bragh; ny jean beg y hoiaghey eisht jeh obbyr dty laueyn hene.

Psalmyn 145:17

Ta’n Chiarn cairagh ayns ooilley e raaidyn: as casherick ayns ooilley e obbraghyn.

Psalmyn 146:6

Ta jannoo cairys dauesyn ta surranse aggair: ta beaghey ny accryssee.

Psalmyn 18:2

Neem’s geamagh er y Chiarn, ta feeu dy ve er ny voylley: myr shen bee’m sauchey veih my noidyn.

Psalmyn 18:46

Nee’n chloan yoarree failleil: as bee ad agglagh ayns ny ynnydyn follit oc.

Psalmyn 19:7

Ta leigh yn Chiarn ny leigh gyn foill, niartaghey yn annym: ta recortyssyn y Chiarn shickyr, as coyrt creenaght da’n vee-hushtagh.

Psalmyn 31:5

Tayrn mee ass y ribbey t’ad er hoiaghey dy follit er my hon: son uss my niart.

Psalmyn 33:4

Son ta goo yn Chiarn firrinagh: as ooilley e obbraghyn ynrick.

Psalmyn 78:35

As chooinee ad dy nee Jee va’n niart oc: as dy row yn Jee ard nyn Ver-kionnee.

Psalmyn 9:16

Ta fys ain dy vel y Chiarn cooilleeney briwnys: ta’n mee-chrauee er ny chassey ayns obbyr e laueyn hene.

Psalmyn 90:16

Soilshee dt’obbyr da dty harvaantyn: as da nyn gloan dty ghloyr.

Psalmyn 97:2

Ta bodjallyn as dorraghys mygeayrt-y-mysh: ta cairys as briwnys coamrey e stoyl-reeoil.

Psalmyn 98:3

Ta’n Chiarn er hoilshaghey e haualtys: e chairys t’eh er hoiaghey magh dy foshlit ayns shilley ny ashoonyn.

Psalmyn 99:4

Ta pooar y ree graihagh er briwnys; t’ou er hoiaghey seose cairys: t’ou er chooilleeney briwnys as ynrickys ayns Jacob.

Exodus 34:6

As hie’n Chiarn shaghey kiongoyrt rish, as ren eh fockley magh, yn CHIARN, yn CHIARN JEE, myghinagh as graysoil, jeh surranse-foddey, as feoiltagh ayns mieys as ayns ynrickys,

Ecclesiastes 3:14

Ta fys aym, cre-erbee ta Jee dy yannoo, dy bee eh er son dy bragh: cha vod nhee erbee ve currit huggey, ny nhee erbee er ny ghoaill voish: as shoh ta Jee dy yannoo, dy voddagh sheelnaue aggle y ghoaill roish.

Isaiah 17:10

Er-yn-oyr dy vel oo er yarrood Jee dty haualtys, as nagh vel oo er smooinaghtyn er Creg dty niart; shen-y-fa nee oo soiaghey biljyn aegey aalin, as nee oo soiaghey eh lesh settyn joarree:

Isaiah 25:1

O Hiarn, she uss my Yee; ver-ym ard-ooashley dhyt, ver-ym moylley da dty ennym; son t’ou er n’yannoo reddyn yindyssagh; ta ny coyrleyn ayd’s er-dyn toshiaght cairys as firrinys.

Isaiah 26:4

Treisht-jee ayns y Chiarn dy bragh: son ayns y Chiarn Jehovah ta niart dy bragh farraghtyn.

Isaiah 28:16

Shen-y-fa shoh myr ta’n Chiarn Jee dy ghra, Cur-my-ner, ta mee soiaghey ayns Zion son undin, clagh, clagh phrowit, clagh-chorneilagh costal, undin shickyr: ersyn ta credjal cha bee oyr nearey.

Isaiah 30:18

As shen-y-fa nee’n Chiarn farkiaght dy ve graysoil diu, as shen-y-fa, bee eh er ny ghloyraghey, dy vod eh jannoo myghin erriu: son ta’n Chiarn ny Yee dy vriwnys: bannit t’adsyn ooilley ta farkiaght ersyn.

Isaiah 32:2

As bee yn dooinney shen myr scaa veih’n gheay, as fastee veih’n dorrin; myr awin ushtey ayns thalloo chirrym; myr scadoo creg vooar ayns cheer sponkit.

Jeremiah 10:10

Agh ta’n Chiarn yn Jee firrinagh, eshyn y Jee bio, as y Ree dy bragh farraghtyn: ec y chorree echeysyn bee’n seihll er-creau, as cha vod ny ashoonyn e yymmoose y ymmyrkey.

Jeremiah 9:24

Agh lhig dasyn ta boggyssagh, boggyssagh ayns shoh, dy vel toiggal as tushtey echey jeem’s, dy nee mish y Chiarn ta soilshaghey kenjallys-ghraihagh, briwnys, as cairys, er y thalloo: son ayns ny reddyn shoh ta mee goaill taitnys, ta’n Chiarn dy ghra.

Daniel 4:34

As ec kione ny laghyn shen, hrog mish Nebuchadnezzar my hooillyn gys niau, as haink my hushtey hym reesht, as vannee mee yn er smoo syrjey, as hug mee moylley as ooashley dasyn ta dy bragh beayn, e reiltys ta reiltys dy bragh farraghtyn, as e reeriaght ta veih sheeloghe gys sheeloghe.

Daniel 4:37

Nish ta mish Nebuchadnezzar cur moylley, as ard-voylley, as ooashley da ree ny flaunys, ta ooilley e obbraghyn firrinys, as e raaidyn briwnys, as adsyn ta gimmeeaght ayns moyrn t’eshyn niartal dy injillaghey.

Habakkuk 1:12

Nagh vel uss er-dy-rieau, O Hiarn my Yee, my er-casherick? cha vow mayd baase: O Hiarn, t’ou er vaagail magh ad son briwnys; as, O Yee niartal, t’ou er chiarail ad cour smaghtaghey.

Habakkuk 1:13

T’ou uss jeh sooillyn s’glenney na dy chur-my-ner yn olk, as cha vod oo jeeaghyn er mee-chairys: cre’n-fa t’ou lhiggey lhieusyn ta dellal dy molteyragh, as t’ou dty host, tra ta’n mee-chrauee stroie yn dooinney ta ny s’ynrick na eh-hene?

Zephaniah 3:5

Ta’n Chiarn cairal ayns y vean eck; cha jean eshyn dy aggairagh: moghrey lurg moghrey t’eh soilshaghey e vriwnys, cha vel eh failleil; agh cha vel veg y nearey er ny drogh-yantee.

Noo Mian 5:48

Bee-jee shiuish er-y-fa shen slane ynrick, eer myr ta nyn Ayr t’ayns niau slane ynrick.

Noo Ean 1:14

As ghow yn Goo er dooghys ny foalley, as ren eh baghey nyn mast’ ain (as hug shin my-ner yn ghloyr echey, yn ghloyr myr jeh’n ynrycan Mac er-ny-gheddyn jeh’n Ayr) lane dy ghrayse as dy irrinys.

Noo Ean 1:17

Son va’n leigh er ny choyrt liorish Moses agh haink grayse as firrinys liorish Yeesey Creest.

Noo Ean 14:6

Dooyrt Yeesey rish, Mish y raad, yn irriney, as y vea: cha vel dooinney erbee cheet gys yn Ayr, agh liorym’s.

Noo Ean 5:22

Son cha vel yn Ayr briwnys dooinney erbee; agh t’eh er livrey dy chooilley vriwnys gys y Mac:

Romanee 1:32

Ga dy vel toiggal oc jeh briwnys Yee, (dy vel adsyn ta cur rish lheid ny reddyn shoh toilchin baase) cha vel ny-lomarcan jannoo ny reddyn cheddin ad-hene, agh ta taitnys oc ayndoosyn ta cur roo.

Romanee 2:2

Agh ta fys ain dy vel briwnys Yee cordail rish yn irriney, n’oï adsyn ta cur rish lheid ny reddyn.

Romanee 2:5

Agh cordail rish creoghys dty chree vee-arryssagh, t’ou stoyral seose dhyt hene jymmoose cour laa’n yymmoose, as tra vees briwnys cairagh Yee er ny hoilshaghey;

Romanee 3:5

Agh myr ta’n neu-ynrickys ainyn soilshaghey magh ynrickys Yee, cre jir mayd? Vel Jee neu-chairagh ta goaill kerraghey? (ta mee loayrt myr dooinney)

1 Corinthianee 10:4

As ren ad ooilley giu yn jough spyrrydoil cheddin: (son ren ad giu jeh’n Chreg spyrrydoil shen deiyr orroo; as y Chreg shen va Creest.)

Deuteronomy 10:18

T’eh goaill seose cooish y chloan gyn ayr as y ven-treoghe, as shynney lesh y joarree, ayns coyrt da beaghey as coamrey.

Deuteronomy 32:15

Agh daase Jeshurun roauyr, as ren eh brebbal: t’ou uss er n’aase roauyr, as t’ou er n’ghoaill thummyd, t’ou coodit lesh saill; eisht hreig eh Jee ren eh y chroo, as hoie eh beg jeh creg e haualtys.

Deuteronomy 32:18

Er y Chiarn ren dty gheddyn, cha vel oo er chooinaghtyn, as y Jee ren dty chroo t’ou er yarrood.

Deuteronomy 7:9

Toig er-y-fa shen, dy nee yn Chiarn dty Yee, yn ynrycan Jee, yn Jee firrinagh, ta cooilleeney conaant, as myghin roosyn ta graihagh er, as freayll e annaghyn, gys thousane sheeloghe;

Jamys 1:17

Ta dy chooilley ghioot mie, as dy chooilley ghioot firrinagh veih’n yrjey, as cheet neose veih Ayr y toilshey, mârish nagh vel caghlaa erbee, ny scadoo dy hyndaa.

Jamys 4:12

Ta un er ayn ta bun y leigh, echey ta pooar dy hauail, as dy stroie: quoi oo hene ta briwnys fer elley?

1 Peddyr 2:6

Shen-y-fa myrgeddin te raït ayns goo Yee, Cur-my-ner, ta mee soiaghey ayns Sion ard-chlagh chorneilagh, reiht, costal: as eshyn ta credjal aynsyn cha bee eh mollit.

1 Samuel 2:2

Cha vel fer erbee casherick myr y Chiarn: son cha vel Chiarn erbee elley; chamoo ta creg erbee myr y Jee ain.